MUKAND WA KUSAMBISH WA YOHAN

1 Yom yadinga kudosh kwinsambishin, yitwatesha, yitwamana nich mes metu, yitwatala ni yitwapukuna nich makas metu, piur pa dizu da mwom, 2 (inge, mwom aumekesha, twamana ni tupanin uman ni tukulejinany mwom wa chikupu wading kud Tatuku ni watumekeshinau), 3 yitwamana ni yitwatesha tukulejinanay niyen, chakwel niyen wikalany mu uumwing wa ukadivar niyetu. Uumwing wetu winou ud pamwing ni Tatuku ni pamwing ni Mwanend Yesu Kristu. 4 Ni tufundin yom yiney chakwel musangar wetu uwanyin.

5 Ou wawiy uruu twatesha ni tukulejinanya: Nzamb ud chitokish, ni mwi ndiy* mwikil mididim ap yikemp. 6 Anch twalond anch: “Tud mu uumwing ni ndiy,” pakwez tudandamedin kwendin mu mididim, tudimben ni tushichap kukwatijan ni uyakin. 7 Pakwez, anch twendidin mu chitokish mud muday ndiy amwinend mu chitokish, tud mu uumwing umwing ni mukwau, ni mash ma Yesu Mwanend matushitwishin ku chitil chin chawonsu.

8 Anch twalond anch “Tukwetap chitil,” twidimbin ayinetu ni uyakin udap mu etu. 9 Anch twalejan yitil yetu patok, ndiy ushinshamen ni utentamin mulong wa kutulikishin yitil yetu ni kutushitwish ku kuburen kutentam kwin kwawonsu. 10 Anch twalond anch “Twasalangap chitil,” tumukwatin Nzamb makasu, ni dizu dend kididap mu etu.

2 Anam akatish, nikufundidinany yom yiney chakwel kangal wasalany chitil. Pakwez anch muntu washiken kusal chitil, tukwet nkwash* uda pamwing ni Tatuku, Yesu Kristu, utentamina. 2 Ni ud chakupesh cha kuchakwish nich mulong* wa yitil yetu, chad kadap kusu ching mulong wa yitil yetwetu, pakwez kand mulong wa yitil ya mangand makabuj. 3 Ni ou wawiy mutapu twija anch tumwij, anch twadandamen kuziyin yijidik yend. 4 Anch muntu walond anch: “Nimwij,” pakwez kaziyidinap ku yijidik yend, ud mukamakasu, ni uyakin udap muday muntu winou. 5 Pakwez mwawonsu uziyidina dizu dend, rukat ra Nzamb arikadishin kal chakin kamu riwanyidina mu muntu winou. Kusutin chom chinech twij anch tud mu uumwing ni ndiy. 6 Muntu ulondina anch ushadin mu uumwing ni ndiy ufanyidin amwinend kudandamen kwiyendish mwiyendishay Yesu.

7 Akatish, nikufundidinany, kadap chijidik chisu, pakwez chijidik chikur chiwatambulanya kudosh kwinsambishin. Chijidik chinech chikur did dizu wateshanya. 8 Nikufundidinany kapamp kakwau kand chijidik chisu, chida chakin piur pend ni piur penen, mulong mididim yiyil mu kupwa ni chitokish chakin chasambishin kal kumunyik.

9 Muntu ulondina anch ud mu chitokish pakwez umukisin mukadivar nend, uchid kal mu mididim. 10 Muntu umukatina mukadivar nend ushadin mu chitokish, ni muday ndiy mwikil diyingishin da kwipwakal. 11 Pakwez muntu umukisina mukadivar nend ud mu mididim ni wendin mu mididim, kijap kuyilay, mulong mididim yamujadishang kal pa mes.

12 Anam Akatish, nikufundidinany, mulong yitil yen akulikishidinanyay kal mulong wa dijin dend. 13 Atatuku, nikufundidinany mulong wilejinany kal kumwijik udingaku kudosh kwinsambishin. Ansangarum, nikufundidinany mulong wamupandakenany kal muyimp. Anikanch, nikufundidinany mulong wilejinany kal kumwijik Tatuku. 14 Atatuku, nikufundidinany mulong wilejinany kal kumwijik udingaku kudosh kwinsambishin. Ansangarum, nikufundidinany mulong ukwetany usu ni dizu da Nzamb dishich mu en, ni wamupandakenany kal muyimp.

15 Kangal wakatany mangand ap yom yida mu mangand. Anch muntu wakat mangand, rukat ra Tatuku ridap mwi ndiy; 16 mulong yom yawonsu yida mu mangand—⁠maku ma mujimbu ni maku ma mes ni muntu kumekesh yom yikwetay mu mwom*—⁠yidokilap kud Tatuku, pakwez yidokil ku mangand. 17 Chikwau, mangand mayil mu kujiy* ni maku mau, pakwez muntu usadina rusot ra Nzamb ukushakam chikupu.

18 Anikanch, chid chisu cha nsuden, wateshanya anch mwin kumurishikish Kristu wezin, chad katat in kumurishikish Kristu amekan kal, kwawiy twijikidina anch chid chisu cha nsuden. 19 Adokala kud etu, pakwez kadingap etwetu;* mulong anch ading etwetu, afanyina kushal netu. Pakwez adokala chakwel ayimekesh anch awonsu kadap etwetu. 20 Ni akuzizidinany kal many kud utumbila, ni en awonsu ukwetany ronganyin. 21 Nikufundidinany, kadap mulong wijanyap uyakin, pakwez mulong uwijany, ni mulong kwikil makasu madokiling ku uyakin.

22 Nany uda mukamakasu anch kadap muntu utadikina anch Yesu ud Kristu? Ndiy winou mwin kumurishikish Kristu, muntu umutadikina Tatuku ni Mwan. 23 Muntu umutadikina Mwan kadap kand mu uumwing ni Tatuku. Pakwez muntu mwawonsu witiyidina anch umwitiyijin Mwan ud kand mu uumwing ni Tatuku. 24 Chad en, yom wateshanya kudosh kwinsambishin yifanyidin kushal mu en. Anch yom wateshanya kudosh kwinsambishin yashal mu en, niyen ukushalany kand mu uumwing ni Mwan ni mu uumwing ni Tatuku. 25 Kupwa, ech chawiy chom chatukanay amwinend—⁠mwom wa chikupu.

26 Nikufundidinany yom yiney mulong wa antu apakishina kukupumbulany. 27 Chad en, kuzizin many kwakuzizinanyay kushadin pad en, ni ukwetanyap kuswir kwa kukufundishany kud muntu; pakwez kuzizin many kwakuzizinanyay kukufundishinany piur pa yom yawonsu ni kud kwakin, kudap kwa makasu. Mud mutapu kwakufundishanya, shalany mu uumwing ni ndiy. 28 Komb katat, anam akatish, shalany mu uumwing ni ndiy, chakwel pakumumekeshau tutwish kulond pakad wom ni chakwel kangal twaurik nend nich usany pa chisu cha kwikalaku kwend. 29 Anch wijany anch utentamin, wijany kand anch muntu mwawonsu usadina yom yitentamina amuvala kud ndiy.

3 Talany rukat ra mutapu ik ratumekeshinay Tatuku, chakwel atutazuk anch an a Nzamb! Ni mwamu tuda kamu. Yawiy yom mangand matwijap, mulong kimamwijikap ndiy. 2 Akatish, tud katat an a Nzamb, pakwez chitukwikala kand kal achimekesh. Twij anch pakumumekeshau tukwikal mud ndiy, mulong tukumuman mutapu uday kamu. 3 Ni muntu mwawonsu ukweta ruchingej riner, ukat kwishitwish amwinend, mud mutapu winiwa wishitwilay.

4 Muntu mwawonsu ukata kusalang chitil ujipining kand chijil, mulong chitil kud kujip chijil. 5 Wijany kand anch Yesu weza* mulong wa kudosh yitil yetu, ni mwi ndiy mwikil chitil. 6 Muntu mwawonsu uda mu uumwing ni ndiy kadandamediningap kusal chitil; muntu mwawonsu udandamedina kusal chitil kamumanap ndiy ap kushiken kumwijik. 7 Anam akatish, kangal muntu wakudimbany; muntu mwawonsu usadining yom yitentamina utentamin, mud mutapu uday winiwa utentamina. 8 Muntu udandamedina kusal chitil udokil kud Djabul, mulong Djabul wasambisha kusal chitil kudokal kwinsambishin.* Yawiy yezinay* Mwan a Nzamb, mulong wa kushesh midimu ya Djabul.

9 Muntu mwawonsu wavadinau kal kud Nzamb kakatap kudandamen kusal chitil, mulong rubut* Rend rishich muday ndiy, ni kakutwishap kudandamen kusal chitil, mulong amuvadin kal kud Nzamb. 10 An a Nzamb ni an a Djabul akat kumekan patok kusutin chom ech: Muntu mwawonsu wakad kusal yom yitentamina kadokilap kud Nzamb, ni muntu wakad kumukat mwanamakwend. 11 Mulong ou wawiy uruu wateshanya kudokal kwinsambishin, anch tufanyidin kukatijan umwing ni mukwau; 12 kadap mud Kayin, wading udokila kud muyimp ni wamujipa mwanamakwend. Ni mulong wak wamujipa? Mulong yisal yend yading yiyimp. Pakwez ya mwanamakwend yading yitentamin.

13 Kangal washimwokany akadivar pa kuman anch mangand makukisinany. 14 Twij anch twadokil kal ku rufu kwez ku mwom, mulong tuyikatin anamakwetu. Muntu mwawonsu wakad kukat ushadin mu rufu. 15 Muntu mwawonsu umukisina mwanamakwend ud mwin kujipan, ni wijany anch kwikil mwin kujipan ukweta mwom wa chikupu ushicha mwi ndiy. 16 Twashikedin kal kwijik rukat, mulong Yesu Kristu wapana mwom* wend mulong wetwetu, ni niyetu tufanyidin kupan mwom* yetu mulong wa anamakwetu. 17 Pakwez muntu mwawonsu ukweta yom ya ku mujimbu ya mangand minam ni wamuman mwanamakwend uda mu maswir chad walik kumumekeshin ranaken, mutapu ik rukat ra Nzamb rishicha mwi ndiy? 18 Anam akatish, tufanyidin kukatan, kadap kusu mu mazu ap nich rudim, pakwez mu yisal ni uyakin.

19 Kusutin chom chinech tukwijik anch tudokil ku uyakin, ni tukudutish michim yetu* kurutu kwa Nzamb 20 chikalap nchik diyingishin dikutufishina nich michim yetu, mulong Nzamb ud mujim kusutamu michim yetu ni wij yom yawonsu. 21 Akatish, anch michim yetu yitufishinap nich, tukutwish kulond pakad wom kud Nzamb; 22 ni chom chawonsu tukata kwit ukat kutwinkishach, mulong tuziyidin ku yijidik yend ni tusadin yom yimusangareshina. 23 Chad, ech chawiy chijidik chend: anch twikal ni ritiy mu dijin da Mwanend Yesu Kristu ni tukatijan umwing ni mukwau, mud mutapu watwinkishay chijidik. 24 Chikwau kand, muntu mwawonsu ulimishina yijidik yend ushadin mu uumwing ni ndiy, ni ndiy mu uumwing ni muntu winiwa. Ni kusutin spiritu watwinkishay, twij anch ushadin netu mu uumwing.

4 Akatish, kangal witiyijany dizu dawonsu dipepidinau,* pakwez pakany mazu mapepidinau* mulong wa kuman anch madokil kud Nzamb, mulong aprofet a makasu avud alankin mu mangand.

2 Ou wawiy mutapu ukwijikanya anch dizu dipepidinau didokil kud Nzamb: Dizu dawonsu dipepidinau ditiyidina anch Yesu Kristu weza mu mujimbu didokil kud Nzamb. 3 Pakwez dizu dawonsu dipepidinau dakad kumwitiyin Yesu didokilap kud Nzamb. Dined dawiy dizu dipepidinau kud mwin kumurishikish Kristu dawateshanya anch dezin, ni katat did mu mangand.

4 Udokilany kud Nzamb, anam akatish, ni wayipandakenany kal aprofet inay a makasu mulong uda mu uumwing niyenen ud mujim nakash kusutamu uda mu uumwing ni mangand. 5 Awiy adokil ku mangand; chawiy chilondinau yom yidokila ku mangand, ni mangand makat kuyitesh. 6 Etu tudokil kud Nzamb. Mwawonsu ushikedina kumwijik Nzamb ukat kututesh; mwawonsu wakad kudokal kud Nzamb kakatap kututesh. Wawiy mutapu tukata kwauril dizu dipepidinau da uyakin ni dizu dipepidinau da makasu.

7 Akatish, tudandamenany kukatijan umwing ni mukwau, mulong rukat ridokil kud Nzamb, ni mwawonsu ukatena amuvadin kal kud Nzamb ni umwij Nzamb. 8 Muntu mwawonsu wakad kukatan kilejap kumwijik Nzamb, mulong Nzamb ud rukat. 9 Ou wawiy mutapu wamekana rukat ra Nzamb kud etu: Nzamb wamutuma Mwanend kapokal mu mangand chakwel tutambul mwom kusutin ndiy. 10 Rukat pa mulong winou ridap anch yetu twamukata Nzamb, pakwez anch ndiy watukata etu ni wamutuma Mwanend mud chakupesh cha kuchakwish nich mulong wa* yitil yetu.

11 Akatish, anch wawiy mutapu watukatay Nzamb, komb niyetu tufanyidin kukatijan umwing ni mukwau. 12 Kwikil muntu wamumenap kal Nzamb. Anch twadandamen kukatijan umwing ni mukwau, Nzamb ushich mu etu ni rukat rend arikadishin riwanyidina mu etu. 13 Ou wawiy mutapu twija anch tushadin nend mu uumwing ni ndiy mu uumwing niyetwetu, mulong watwinkishin kal spiritu wend. 14 Chikwau kand, etu ayinetu twamana ni tupanin uman anch Tatuku wamutuma Mwanend mud mupandish wa mangand. 15 Mwawonsu witiyidina anch Yesu ud Mwan a Nzamb, Nzamb ushadin nend mu uumwing ni ndiy mu uumwing ni Nzamb. 16 Ni twilejin kal kwijik ni kwitiyij rukat rikwetay Nzamb mulong wetwetu.

Nzamb ud rukat, ni muntu ushadina mu rukat ushadin mu uumwing ni Nzamb ni Nzamb ushadin mu uumwing ni ndiy. 17 Wawiy mutapu warikadishinau kal rukat riwanyidina mu etu, chakwel tutwish kulond pakad wom* pa dichuku da dirumburish, mulong mutapu uday ndiy, wawiy kand mutapu tuda niyetu mu mangand minam. 18 Mu rukat mwikiling wom, pakwez rukat riwanyidina rikat kwopat* wom. Mulong wom utukangeshining kuya kurutu. Chakin, muntu ukweta wom kamwikadishap uwanyidina mu rukat. 19 Tukaten, mulong ndiy watukata wa kusambish.

20 Anch muntu walond anch: “Nimukatin Nzamb,” pakwez ndiy umukisin mwanamakwend, ud mukamakasu. Mulong muntu wakad kumukat mwanamakwend, umenay, kakutwishap kumukat Nzamb, wakaday kuman. 21 Ni tukwet chijidik ech chatwinkishay: Muntu mwawonsu umukatina Nzamb ufanyidin kand kumukat mwanamakwend.

5 Muntu mwawonsu witiyijina anch Yesu ndiy Kristu amuvadin kud Nzamb, ni muntu mwawonsu umukatina Nzamb wavala, umukatin wavalau kud ndiy. 2 Ou wawiy mutapu twija anch tuyikatin an a Nzamb: Anch twamukat Nzamb ni twaziyin yijidik yend. 3 Mulong kumukat Nzamb kurumburikin chom ech: Anch tulimish yijidik yend, ni yijidik yend kiyiliminap, 4 mulong muntu mwawonsu wavadinau kal* kud Nzamb ukat kupandakan mangand. Ni ech chawiy chom chatukwasha kupandakan mangand: Ritiy retu.

5 Nany ukutwisha kupandakan mangand? Ov, kadap muntu witiyijina anch Yesu ud Mwan a Nzamb? 6 Ndiy winou weza kusutin mem ni mash, Yesu Kristu, kadap kusu ching nich mem, pakwez nich mem ni nich mash. Ni spiritu upanin uman, mulong spiritu ud uyakin. 7 Mulong kud in kupan uman asatu: 8 Spiritu, mem, ni mash; ni yawonsu yisatu yovijadin.

9 Anch twitiyining uman wa antu, uman wa Nzamb ud ujim nakash. Mulong ou wawiy uman upaninay Nzamb, uman wapanay piur pa Mwanend. 10 Muntu utekina ritiy muday Mwan a Nzamb ukwet uman mwi ndiy amwinend, muntu wakad ritiy muday Nzamb umukwatin makasu, mulong katekinap ritiy mu uman wapanay Nzamb piur pa Mwanend. 11 Ni ou wawiy uman, Nzamb watwinkisha mwom wa chikupu, ni mwom winou ud muday Mwanend. 12 Muntu mwawonsu uda mu uumwing ni Mwan ukwet mwom winou; muntu mwawonsu wakad kwikal mu uumwing ni Mwan a Nzamb kakwetap mwom winou.

13 Nikufundidinany yom yiney chakwel wijikany anch ukwetany mwom wa chikupu, en utekinanya ritiy ren mu dijin da Mwan a Nzamb. 14 Ni ak kawiy kashinsh tukweta piur pa Nzamb,* anch chikalap nchik chom tumwitina kukwatijan ni rusot rend, ukat kututesh. 15 Ni anch twij anch ukat kututesh piur pa chom chawonsu twitina, twij anch tukutambul yom twitina, mulong twamwitinay ndiy.

16 Anch muntu wamuman mwanamakwend ukat kusal chitil chakad kushikij ku rufu, alembil, ni Nzamb ukumwinkish mwanamakwend mwom, inge, ukuupan kud akad kusal chitil chishikijina ku rufu. Kud chitil chikata kushikij ku rufu. Piur pa chitil chinech nimulejinap kulembil. 17 Kuburen kutentam kwawonsu chid chitil, pakwez kud chitil chakad kushikij ku rufu.

18 Twij anch muntu mwawonsu wavadinau kal kud Nzamb kakatap kudandamen kusal chitil, pakwez muntu* wavadinau kal kud Nzamb ukat kumushinshikin, ni muyimp kakutwishap kumusal chom.* 19 Twij anch tudokil kud Nzamb, pakwez mangand mawonsu amayikedin kud muyimp. 20 Pakwez twij anch Mwan a Nzamb weza, ni watwinkishin kal manang* chakwel tushiken kumwijik uda wakin. Ni tud mu uumwing ni ndiy uda wakin, kusutin Mwanend Yesu Kristu. Ndiy winou Nzamb wakin ni mwom wa chikupu. 21 Anam akatish, ilamany kwa atupwany.