MUKAND WA KAAD WA YOHAN

1 Yam ipal ikundj,* kud mband watondinau kal ni kud anend, anikatina chakin kamu, ni kadap ching am, pakwez kand ni awonsu ashikedina kal kwijik uyakin, 2 mulong wa uyakin uda mu etu ni ukwikala netu chikupu. 3 Tukwikal nich ranaken rijim, riy, ni chisambu, yidokila kud Nzamb Tatuku ni kud Yesu Kristu, Mwan a Tatuku, nich uyakin ni rukat.

4 Nikwet musangar nakash mulong nateshin anch aney amwing endidin mu uyakin, mud muda chijidik twatambula kud Tatuku. 5 Chawiy katat nikwitin ey, mband watondinau kal, anch: Tukatijanany umwing ni mukwau. (Nikufundidinany, kadap chijidik chisu, pakwez chatwading nich kudokal kwinsambishin.) 6 Ni oku kwawiy kurumburik kwa rukat: Anch tudandamen kwend kukwatijan ni yijidik yend. Ech chawiy chijidik mud muwateshanya kudokal kwinsambishin, anch: Ufanyidinany kudandamen kwendin mu rukat. 7 Mulong in kudimban avud alankin mu mangand, antu akad kwitiyin anch Yesu Kristu weza mu mujimbu wa mbij. Winou ndiy mwin kudimban ni mwin kumurishikish Kristu.

8 Babalany ayinen, chakwel kangal washadishany yibudikin yiwamp ya mudimu twasala, pakwez chakwel utambulany difut dawonsu. 9 Muntu mwawonsu wakad kushal mu mafundish ma Kristu ni uwejidinaku pa mafundish minam kadap mu uumwing ni Nzamb. Muntu ushadina mu mafundish minam, ndiy uda mu uumwing ni Tatuku ni mu uumwing ni Mwan. 10 Anch muntu wez kwol kwen pakwez kaletinap mafundish minam, kangal wamwakany mu yikumbu yen ap kumwinkish moy. 11 Mulong muntu ukumwinkisha moy unungin chikas ku yisal yend yiyimp.

12 Nikwet yom yivud ya kukufundinany, pakwez nikatinap kusal mwamu pa dipaper ni ink.* Nitongin kwez kwinaku ni kwambamb nen mes ni mes, chakwel musangar wen upandakan.

13 An a yayey mband watondinau kal akupanidin moy.