KUJINGUNIK KUD YOHAN

1 Kujingunik* kwa Yesu Kristu, kwamwinkishau kud Nzamb, mulong wa kumekesh kud atushalapol end yom yifanyidina kushiken piswimp ap. Ndiy wamutuma mwangel wend ni wayimekesha yom yiney kusutin yijingidij kud kashalapol wend Yohan, 2 wapana uman piur pa dizu da Nzamb ni piur pa uman wapanay Yesu Kristu, chakin kamu, piur pa yom yawonsu yamanay. 3 Wayuk kwend muntu utangina nich dizu da piur ni ayuk kwau antu ateshina mazu ma uprofet winou ni alimishina yom yifundinawamu, mulong chisu chantenchikau kal chid piswimp.

4 Yam Yohan, ku yikumangen sambwad yida mu provens wa Aziy:

El ranaken rijim ni chisambu yikal nen, kudokal kud “Ndiy udaku, wadingaku, ni wezina,” ni kudokal kud aspiritu sambwad ada kurutu kwa ditand dend, 5 ni kudokal kud Yesu Kristu, “Kaman Ushinshamena,” “muntu wavumbulau wa kusambish,” ni “Nyikel wa ant a pa divu.”

Kud ndiy utukatina ni watukwola ku yitil yetu kusutin mash mend—⁠ 6 watwikadisha ant ni in kupesh mulong wa Nzamb wend ni Tatukwend—⁠chakin kamu, uyaj ni dikand yikal kud ndiy chikupu ni chikupu. Amen.

7 Talany! Ukat kwez mu* madj, ni muntu mwawonsu ukumuman,* ap antu amupampa; ni antu a michid yawonsu ya pa divu akwibul pa ntul ni kwinan mulong wendendiy. Inge, Amen.

8 Yehova* Nzamb ulondin anch: “Yam Alfa ni Omega,”* “Ndiy udaku, wadingaku, ni wezina, Mwin Dikand Dawonsu.”

9 Am, mukadivar nen Yohan, umena mar pamwing niyenen ni kujijaman ni kutambul want mu uumwing ni Yesu, nading pa ditung ditazukinau anch Patimos mulong nalonda piur pa Nzamb ni kupan uman piur pa Yesu. 10 Kusutin spiritu utumbila, nashika pa dichuku da Nsalejetu, ni natesha kwinyim kwam dizu dikash mud chidjimin cha mpuny,* 11 dikat kulond anch: “Yom umena, yifunda mu muvungur ni utuma ku yikumangen sambwad: mu Efes, mu Simirin, mu Perigam, mu Tiyatir, mu Sardis, mu Filadelifiy, ni mu Laodiseya.”

12 Nakarumuka mulong wa kuman nany wading winlondishina, ni panakarumuka, namana mend ya lamp sambwad ya utad wa or, 13 ni pakach ni pakach pa mend ya lamp pading muntu umwing ufanijadina ni mwan a muntu, udjit nkandj mulemp ushikina ku yidjatil ni wading udjit nshipu ya utad wa or mwi ntul. 14 Chikwau kand, mutu wend ni nsuk jend yading yitok mud mavuj matok, yitok ya too, ni mes mend mading mud muzuzu wa kasu, 15 ni yidjatil yend yading mud utad wa kwivre muwamp* chisu chimwengurilau mu kasu, ni dizu dend dading mud masok ma mpol yijim.* 16 Ni wading ukwet atutumbu sambwad mu chikas chend cha katatuku, mu kan mwend mwading mubudikin mpak ya musamun yilemp ya nmwemu jaad, ni chifu chend chading mud muten piuzazina nakash. 17 Panamumana, nawila ku mend mend mud mufu.

Chad wangazuka chikas chend cha katatuku ni wangel anch: “Kangal wov wom. Yam wa Kusambish ni wa Nsuden, 18 ni uda mwom, nafa, pakwez tal! nid mwom chikupu ni chikupu, ni nikwet anfungul a rufu ni a Nzay.* 19 Chawiy fund yom wamana kal, yom yisadikina katat, ni yom yikusadika kupwa kwa yiney. 20 Mulong wa ujindj utumbila piur pa atutumbu sambwad wamanang mu chikas cham cha katatuku ni piur pa mend ya lamp sambwad ya utad wa or, ijik anch: Atutumbu sambwad amekeshin angel a yikumangen sambwad, ni mend ya lamp sambwad yimekeshin yikumangen sambwad.

2 “Kud mwangel wa chikumangen cha Efes, fund anch: Ey yawiy yom yilondinay ndiy ukweta atutumbu sambwad mu chikas chend cha katatuku ni wendina pakach pa mend ya lamp sambwad ya utad wa or: 2 ‘Nij yisal yey, mudimu wey ukash ni kujijaman kwey, ukuduulangap antu ayimp, ni anch wayipaka antu akata kulond anch ad atwimbuy, pakwez awiy kadap kwau, ni wajingunina anch ad akamakasu. 3 Ukat kumekesh kand kujijaman, wajijamedin mar mavud mulong wa dijin dam ni waziyinap. 4 Pakwez, chom nikufishina nich chawiy ech: washadishin kal rukat ruwadinga nich kwinsambishin.

5 “ ‘Chawiy vurik pisu wawidina, karumuk ni sal yom yiwasalang kwinsambishin. Anch ukarumukinap, nikwez kud ey, ni nikudosh mwend wey wa lamp pa ndond yau. 6 Ap mwamu, nikubazidin pa chom ech: ukisin yisal ya antu a mu chisak cha Nikola, yinikisina niyam. 7 Muntu ukweta matu atesh yom yilondinay spiritu ku yikumangen: Mwawonsu ukuwina, nikumwinkish mutapu wa kuda mabuj ma mutond wa mwom, uda mu paradis wa Nzamb.’

8 Kud mwangel wa chikumangen cha Simirin, fund anch: Ey yawiy yom yilondinay ‘wa Kusambish ni wa Nsuden,’ wafa kupwa wikal kand mwom: 9 ‘Nij mar mey ni uzwendj wey—⁠pakwez ud mpich—⁠ni nij kand masaal ma antu akata kulond ayinau anch ad in Yuda, chad awiy kadap kamu chakin, pakwez ad sinagog wa Satan. 10 Kangal wov wom wa yom yikimbina kukushiken. Tesh! Djabul ukudandamen kudjubwil amwing a pakach pen mu rukan chakwel akupakany nakash kamu, ni ukumanany mar mu machuku dikum. Mekesh kushinshaman kwey djat ni ku rufu, chad am nikukwinkish chibangul cha mwom. 11 Muntu ukweta matu atesh yom yilondinay spiritu ku yikumangen: Mwawonsu ukuwina, kakufap rufu ra kaad ap pakemp.’

12 “Kud mwangel wa chikumangen cha Perigam, fund anch: Ey yawiy yom yilondinay ndiy ukweta mpak ya musamun yilemp, ya nmwemu jaad: 13 ‘Nij ndond ushicha, kwawiy kulond anch, pawiy pada ditand da Satan; pakwez ap mwamu udandamedin kulamat ku dijin dam, ni kand kal utunangap ritiy rey mu am ap pa chirung cha Antipas, kashalapol wam ushinshamena, wajipinau pa ndond ushicha ey, pashichay Satan.

14 “ ‘Pakwez yom yikemp nikufishina nich yawiy ey: ukwet antu akata kulondul mafundish ma Balam, wamufundisha Balak mutapu wa kuyishikij an a Isarel ku kwipwakal, charumburik anch kuda yom yapeshinau kal kwa atupwany ni kusal yisal ya masandj.* 15 Chikwau kand, ukwet antu akata kulondul mafundish ma antu a mu chisak cha Nikola. 16 Chawiy karumuk. Anch bwat, nikwez kud ey pakad kulab, chad nikuyirishikish nich mpak ya musamun yilemp yibudikina mu kan mwam.

17 “ ‘Muntu ukweta matu atesh yom yilondinay spiritu ku yikumangen: Mwawonsu ukuwina, nikez kumwinkish mana wajindjikau, ni nikumwinkish kand diyal ditok pafundinau dijin disu, dakaday muntu ap umwing kwijik kudoshaku ukuditambula.’

18 “Kud mwangel wa chikumangen cha Tiyatir, fund anch: Ey yawiy yom yilondinay Mwan a Nzamb, ukweta mes mada mud muzuzu wa kasu ni ukweta yidjatil yida mud utad wa kwivre muwamp:* 19 ‘Nij yisal yey, rukat rey, ritiy rey, mudimu wey, ni kujijaman kwey, ni nij kand anch katat ey usadin yom yivud kusutamu kwinsambishin.

20 “ ‘Pakwez, chom nikufishina nich chawiy ech: ukat kumulam mband winou Jezabel, ukata kulond amwinend anch ud muprofet, ndiy ukat kufundish ni kuyibachik atushalapol am kusal yisal ya masandj* ni kuda yom yapeshinau kal kwa atupwany. 21 Namushidin chisu chakwel akarumuk, pakwez kakatinap kwend kukarumuk ni kulikap yisal yend ya masandj.* 22 Tesh! Nikimbin kumudjubwil mu ulal wa mayej, ni antu akata kusal nend makaj, nikuyimesh mar nakash, anch kakarumukinap ni kulikap yisal yend. 23 Nikuyijip anend ku chipupu chikata kujipan, chakwel yikumangen yawonsu yijik anch yam muntu ukata kushinshikin michim ni yitongijok yijingamina nakash,* ni nikumwinkish muntu ni muntu wa pakach pen yom yimuwanyidina kukwatijan ni yisal yend.

24 “ ‘Pakwez nikulejinany en antu akwau udanya mu chikumangen cha Tiyatir, en awonsu akad kulondul mafundish minam, en wakad kwijikany yom yitazukinau antu amwing anch “yom yikurikina ya Satan”: Nikutwikinanyap chisend chikwau. 25 Ching kusu chinech, lamany fe yom ukwetanya kushik ni panikwezina. 26 Ni mwawonsu ukuwina ni kulimish yisal yam kushik ni kwinsuden, nikez kumwinkish ulabu pa michid, 27 ni ukuyibing antu nich mukombu wa utad ujal chakwel ayipuchol mud manung ma kam, ulabu winou anginkishau kud Tatukwam. 28 Ni nikez kumwinkish katumbu wa pamanch.* 29 Muntu ukweta matu atesh yom yilondinay spiritu ku yikumangen.’

3 “Kud mwangel wa chikumangen cha Sardis, fund anch: Ey yawiy yom yilondinay ndiy ukweta aspiritu sambwad a Nzamb ni atutumbu sambwad: ‘Nij yisal yey, ni nij anch antu atongin anch ud mwom,* pakwez wafil kal kwey. 2 Lank,* ni kasikesh yom yishadinaku yada piswimp ni kufa, mulong natanin midimu yey yawonsu kand kal yipwa* kurutu kwa Nzamb wam. 3 Chawiy, dandamen kuvurik yom watambula ni kutesh, dandamen kuyilam, ni karumuk. Chakin, anch ulankinap, nikwez mud mwij, ni ukwijikap ap pakemp chisu nikweza.

4 “ ‘Pakwez, ey ukwet antu akemp* ku Sardis alikina kujondish masun mau, ni akez kwend pamwing niyamam oku adjit masun matok, mulong awanyidin kusal mwamu. 5 Chawiy, mwawonsu ukuwina akumudjik masun matok, ni nikezap ap pakemp kujimwangesh dijin dend mu buku wa mwom, pakwez nikez kalond anch nimwij* kurutu kwa Tatukwam ni kurutu kwa angel end. 6 Muntu ukweta matu atesh yom yilondinay spiritu ku yikumangen.’

7 “Kud mwangel wa chikumangen cha Filadelifiy, fund anch: Ey yawiy yom yilondinay ndiy utumbila, uda wakin, ukweta nfungul wa David, ukata kufungul mu mutapu wakad muntu mukwau kutwish kufung ni kufung mu mutapu wakad muntu mukwau kutwish kufungul: 8 ‘Nij yisal yey—⁠tesh! Natek kal kurutu kwey chis cha kufungul, chakad kutwishau kufung kud muntu. Nij anch ap anch ukwet kwey usu ukemp, waziyidin ku dizu dam ni watuninap dijin dam. 9 Tesh! Antu a mu sinagog wa Satan akata kulond anch ad in Yuda chad awiy kadap kwau, pakwez adimben—⁠tesh! Nikuyilet ni kuyasish manungun* ku mend mey ni kuyijikish anch nakukata. 10 Mulong walamin dizu piur pa kujijaman kwam,* niyam nikukulam pa chisu cha kupak, chikweza pa divu da kabuj, mulong wa kuyipak antu ashicha pa divu. 11 Nezin pakad kulab. Dandamen kulam fe chom ukweta, chakwel kangal muntu watambul chibangul chey.

12 “ ‘Mwawonsu ukuwina—⁠nikumutek kwikal dinguj mu tempel wa Nzamb wam, ni kakez kabudikapamu ap pakemp, nikufund pa mpal ya muntu winou dijin da Nzamb wam, ni dijin da musumb wa Nzamb wam, Yerusalem Musu ushirikina mwiur kudokal kud Nzamb wam, ni dijin dam disu. 13 Muntu ukweta matu atesh yom yilondinay spiritu ku yikumangen.’

14 “Kud mwangel wa chikumangen cha Laodiseya, fund anch: Ey yawiy yom yilondinay Amen, kaman ushinshamena ni wakin, disambishin da yitang ya Nzamb: 15 ‘Nij yisal yey, ni nij anch utalelap ap uswaninap. Nisotil anch ing wad utalel ap uswanin. 16 Pakwez mulong ud kalengidij, kwawiy kulond anch uswaninap ap kutalal, nikimbin kukurik mu kan mwam. 17 Mulong ulondin anch: “Nid mpich, nikadil kal ni mapit mavud, ni nikwetap kuswir kwa chom ap chimwing,” pakwez wijap anch ud chimanamar, ntany, kazwendj, mputames, ni wa kanzikis, 18 nikuyudin kwez kud am chakwel ulanda utad wa or wengurilau mu kasu mulong wikal mpich, ni masun matok chakwel udjala mulong kangal antu aman winzikis wey uletina usany, ni mwon wa mes wa kupan pa mes mey chakwel umana.

19 “ ‘Awonsu nikatina nikat kuyikand, ni kuyipup. Chawiy ikal ni mushiku ni karumuk. 20 Tesh! Niminy ku chis ni nikat kukwokal. Muntu mwawonsu ukutesha dizu dam ni wazuril ku chis, nikwandam mu chikumbu chend ni tukuda nend pamwing yakuda ya urel. 21 Mwawonsu ukuwina nikumwinkish mutapu wa kushakam pamwing niyamam pa ditand dam, mud mutapu nawina am ni kushakam pamwing ni Tatukwam pa ditand dend. 22 Muntu ukweta matu atesh yom yilondinay spiritu ku yikumangen.’ ”

4 Kupwa kwa yom yiney, namana chis cha kwazuril mwiur, ni dizu da kusambish natesha dikat kwinlondish dading doviken mud chidjimin cha mpuny,* danleja anch: “Kandam kunoku, chakwel nikulej yom yifanyidina kusadik.” 2 Kupwa kwa yom yiney, kapamp kamwing spiritu utumbila wasambisha kusal mukach mwam, ni namana ditand mwiur, ni muntu umwing wading ushich pa ditand. 3 Muntu wading ushicha wading umeken mud diyal da jasp ni diyal da sardwan,* ni ditand dawonsu ading adinyingumukin kud nkongal wading ufanakena ni diyal da emerod.

4 Ditand dined ading adinyingumukin kud matand makum maad ni yinying (24), ni namana pa matand minam pading pashich amakurump makum maad ni yinying (24) adjita masun matok ni yibangul ya utad wa or ku mitu. 5 Ku ditand kwading kubudikin milayilay, mazu ni yidjimin ya nzaj; kwading kand malamp sambwad makat kulabuk mizuzu ya kasu kurutu kwa ditand, ni malamp minam mamekeshin aspiritu sambwad a Nzamb. 6 Kurutu kwa ditand, kwading chom chimwing chadinga mud karung wa dikalash, chizazina ni cha zwang.*

Pakach ni pakach pa ditand* ni kuns kwa ditand kwading yitang yinying yikweta mwom yading yizwila nich mes too kurutu ni kwinyim. 7 Chitang cha kusambish chikweta mwom chading chifanaken ni ntambu, ni chitang cha kaad chikweta mwom chading chifanaken ni musamb a ngomb ikwal, chitang cha kasatu chikweta mwom chading chikwet chifu mud cha muntu, ni chitang cha kanying chikweta mwom chading chifanaken ni mbur utwikina. 8 Yitang yinying yikweta mwom yiney, chitang ni chitang chading chikwet mapur musamban; yading yizwil nich mes too mujimbu wa kabuj ni mukach. Ni uchuku ni muten, yadandamenang kulond anch: “Utumbila, utumbila, utumbila ud Yehova* Nzamb, Mwin Dikand Dawonsu, wadingaku, udaku, ni wezina.”

9 Chisu chawonsu chiyapanang yitang yikweta mwom uyaj, kalimish ni kujikitish kud Muntu wading ushicha pa ditand, Ndiy ushicha chikupu ni chikupu, 10 amakurump makum maad ni yinying (24) asang manungun kurutu kwa Muntu wading ushicha pa ditand ni amwifukwilang Muntu ushicha chikupu ni chikupu, ni adjubulang yibangul yau kurutu kwa ditand, oku akat kulond anch: 11 “Yehova* Nzamb wetu, ey uwanyidin kutambul uyaj, kalimish, ni ukash, mulong yey watanga yom yawonsu, ni mulong wa rusot rey yikalaku ni ayitanga.”

5 Namana mu chikas cha katatuku cha Muntu wading ushicha pa ditand mwading muvungur wa kufund mutambu ni mutambu,* ni wading wa kufung nich yijingidij* sambwad. 2 Kupwa namana mwangel ukweta dikand ukat kutoy anch: “Nany uwanyidina kutanguril muvungur ni kubukon yijingidij?”* 3 Pakwez kwikil muntu ap umwing mwiur, ap pa divu, ap kwinshin kwa divu watwisha kutanguril muvungur ap kuutal mukach. 4 Nadila nakash mulong kwamekanap muntu ap umwing wading uwanyidina kutanguril muvungur ap kuutal mukach. 5 Pakwez mukurump umwing wanleja anch: “Lik kudil. Tal! Ntambu wa muchid wa Yuda, muj wa David, ndiy wawinin kal chakwel atanguril muvungur ni yijingidij sambwad.”

6 Chad namana mwan a mukoku wading umekena mud amujipang kal wiminy pakach ni pakach pa ditand ni pa yitang yinying yikweta mwom ni pakach pa amakurump, wading ukwet miseng sambwad ni mes sambwad, mes mamekeshin aspiritu sambwad a Nzamb atumau pa divu dawonsu da kabuj. 7 Kapamp kamwing waseja kurutu ni watambul muvungur mu chikas cha katatuku cha Muntu wading ushicha pa ditand. 8 Patambulay muvungur, yitang yinying yikweta mwom ni amakurump makum maad ni yinying (24) asa manungun kurutu kwa Mwan a Mukoku, ni awonsu ading akwet tudad ni yibakud ya utad wa or yading yizwila too nich diseng da malash. (Diseng da malash dimekeshin malembil ma antu atumbila.) 9 Ni awanga muminy usu wading ulondina anch: “Uwanyidin kutambul muvungur ni kutanguril yijingidij, mulong akujipa, ni kusutin mash mey, wamulandina Nzamb antu ku michid yawonsu, ku mazu mawonsu,* ku antu awonsu, ni mu jingand jawonsu, 10 ni wayikadisha ant ni in kupesh mulong wa Nzamb wetu, ni afanyidin kuyikel mud ant pa divu.”

11 Namana ni kutesh dizu da angel avud ading anyingumukina ku ditand ni yitang yikweta mwom ni amakurump, awonsu ading tutikit ni tutikit, tunan ni tunan, 12 ni ading akat kulond nich dizu da piur anch: “Mwan a Mukoku wajipau uwanyidin kutambul ukash, mapit, manang, usu, kalimish, uyaj, ni chiyukish.”

13 Ni natesha yitang yawonsu yida mwiur, pa divu, kwinshin kwa divu, mu karung, ni yom yawonsu yidamu yikat kulond anch: “Chiyukish, kalimish, uyaj, ni dikand yikal kud Muntu ushicha pa ditand ni kud Mwan a Mukoku chikupu ni chikupu.” 14 Yitang yinying yikweta mwom yading yikat kulond anch: “Amen!” chad amakurump asa manungun ni ifukwil.

6 Patangurilay Mwan a Mukoku chijingidij chimwing chading* pakach pa yijingidij* sambwad, namana ni kutesh umwing wa pakach pa yitang yinying yikweta mwom, walond nich dizu dadinga mud nzaj anch: “Ez!” 2 Namana kabar mutok, ni muntu wading ushichap wading ukwet wut wa nseu; chad amwinkisha chibangul, ni wabudika mulong wa kuya kuyiwin akankuny nend ni kuyipandakan.

3 Patangurilay Mwan a Mukoku chijingidij cha* kaad, natesha chitang cha kaad chikweta mwom chalond anch: “Ez!” 4 Kabar mukwau wading ukweta ulombu wa kasu wabudika, ni amwinkisha muntu wading ushichap ulabu wa kudosh chisambu pa divu chakwel antu ajipijan, ni amwinkisha kand mpak ya musamun yijim.

5 Patangurilay Mwan a Mukoku chijingidij cha* kasatu, natesha chitang cha kasatu chikweta mwom chalond anch: “Ez!” Chad namana kabar mujal, ni muntu wading ushichap wading ukwet chipim* mu chikas. 6 Natesha mud dizu pakach ni pakach pa yitang yinying yikweta mwom dalond anch: “Kilo* umwing wa tidiku ku denye* umwing, akilo* asatu a masang ku denye umwing; kangal washesh many ma oliv ni maar ma nviny.”

7 Patangurilay Mwan a Mukoku chijingidij cha* kanying, natesha dizu da chitang cha kanying chikweta mwom dalond anch: “Ez!” 8 Namana kabar utokirikina, ni muntu wading ushichap ading amupidin anch Rufu. Ni Nzay* yading yimulondwil kamu piswimp piswimp. Ni ayinkisha ulabu pa chikunku chimwing pa yinying ya divu, mulong wa kujipan nich mpak ya musamun yilemp, nich kamungun, nich yipupu yikata kujipan, ni kusutin annam a mu masuku a pa divu.

9 Patangurilay Mwan a Mukoku chijingidij cha* katan, namana mwinshin mwa chintamb mipim* ya antu ajipau mulong wa dizu da Nzamb ni mulong wa uman wapanau. 10 Atoya anch: “Mukaleng Mwant, ey utumbila ni wakin, uchingedin djat ni chisu ik mulong wa kuyirumburish antu ashicha pa divu, ni kufundakesh mash metu?” 11 Ni awonsu ayinkisha ankandj atok, ni ayileja kupimaku mu chisu chikemp, kushik ni pakuwanyina uvud wa ambay nau atushalapol ni akadivar nau ading akimbinau kujip mud mwayijipau awiy.

12 Patangurilay Mwan a Mukoku chijingidij cha* musamban, namana kwasadik kuzal kwa divu kukash, chad muten wajala bwi mud chinzany,* ni ngond mwawonsu wasunza gee mud mash, 13 chad atutumbu a mwiur apaloka pansh mud muukata mutond wa fig kupalish mabuj mau makad kuswa anch aunyikesh kud rinkind mukash. 14 Ni diur dadokala mud muvungur uvunginau, chad mikandu yawonsu ni matung mawonsu ayishemunona pa jindond jau. 15 Chad ant a pa divu, antu akweta ulabu, atulal a amasalay, ampich, antu akweta usu, asuk awonsu, ni antu awonsu akweta want ipau ajingama mu mandam ni mu mayal mada ku mikandu. 16 Chad ayilejang mikandu ni mayal anch: “Tuwilany ni tujindjikany chakwel kangal twamekan kud Muntu ushicha pa ditand ni ku ujim wa Mwan a Mukoku, 17 mulong dichuku dijim da ujim wau dawanyin kal, ni nany ukutwisha kwiman?”

7 Kupwa kwa yom yiney, namana angel anying iminy ku makonk manying ma divu, ading alamin fe rinkind munying wa pa divu, chakwel kangal rinkind ap umwing atut pa divu ap pa karung ap pa mutond ap umwing. 2 Ni namana mwangel mukwau udokil kwingangel, ni wading ukwet chijingidij cha* Nzamb mwom; ni walonda nich dizu dikash kud angel anying inkishau ulabu wa kudisal divu nayimp ni karung, 3 anch: “Kangal wadisalany divu nayimp, ap karung ap mitond, kushik ni patukuyitekina atushalapol a Nzamb wetu yijingidij* pa jimpal jau.”

4 Chad natesha uvud wa antu awonsu atekau yijingidij: tunan chitot makum manying ni tunying (144 000), atekau yijingidij, adokala ku michid yawonsu ya an a Isarel:

9 Kupwa kwa yom yiney, namana chisak chijim cha antu, kwikil muntu ap umwing watwisha kuyichind, ading adokil mu jingand jawonsu, ku michid yawonsu, ku antu awonsu, ni ku mazu mawonsu.* Ni ading iminy kurutu kwa ditand ni kurutu kwa Mwan a Mukoku, adjit ankandj alemp atok; ni ading akwet milal ya mabu mu makas. 10 Chad adandamena kutoy anch: “Dipandish detu didokil kud Nzamb wetu, ushicha pa ditand, ni kud Mwan a Mukoku.”

11 Angel awonsu ading anyingumukin ku ditand ni amakurump ni yitang yinying yikweta mwom, chad asa manungun* kurutu kwa ditand ni amwifukwila Nzamb, 12 ni kulond anch: “Amen! Chifanyidin kushiman, ni uyaj, ni manang, ni kujikitish, ni kalimish, ni ukash, ni usu yikal kud Nzamb wetu chikupu ni chikupu. Amen.”

13 Chad mukurump umwing wangipula anch: “Antu inay adjita ankandj alemp atok, ad anany ni kwisu kudokilau?” 14 Kapamp kamwing namwakula anch: “Nsalejam, yey wija.” Chad ndiy wanleja anch: “Inay awiy antu adokila mu mar makash, ni atutin kal ankandj au alemp ni kuyitokishin mu mash ma Mwan a Mukoku. 15 Chawiy chidau kurutu kwa ditand da Nzamb ni akat kumusadin mudimu utumbila muten ni uchuku mu tempel wend; ni Muntu ushicha pa ditand ukutandjek mwinkand wend pad awiy. 16 Awiy kakez kwovap kand nzal ap impu, ni kakez kwovap kand kuswan kwa muten ap kwa chirungul chin chawonsu chisansena, 17 mulong Mwan a Mukoku, uda pakach ni pakach pa ditand, ukwikal kafung wau ni ukuyitwal ku misul ya mem ma mwom. Ni Nzamb ukez kakuswol mansoj mawonsu ku mes mau.”

8 Patangurilay Mwan a Mukoku chijingidij cha sambwad, mwiur mwanineta zoong piswimp mu chikunku cha saa. 2 Chad namana angel sambwad iminy kurutu kwa Nzamb, ni ayinkisha jimpuny* sambwad.

3 Mwangel mukwau, wading ukweta nnung ya utad wa or ya kwoshin diseng da malash, washika ni wimana ku chintamb, chad amwinkisha diseng da malash divud mulong wa kudoshin pa chintamb cha utad wa or chadinga kurutu kwa ditand pading palembilau antu awonsu atumbila. 4 Mish ya diseng da malash dading doshinay mwangel* yakandama mwiur kud Nzamb pamwing ni malembil ma antu atumbila. 5 Ni kapamp kamwing mwangel wanona nnung ya kwoshin diseng da malash, wizwishamu kasu* kadinga pa chintamb ni wakichil pa divu. Chad kwikala anzaj, mazu, milayilay ni kuzal kwa divu. 6 Ni angel sambwad adinga ni jimpuny* sambwad irijeka mulong wa kusambish kujibul.

7 Wa kusambish wabula mpuny* yend. Chad kwikala ruval wa mayal ni kasu kabombakena ni mash, ni ayidjubwila yawonsu pa divu; chad chikunku chimwing pa yisatu cha divu chatema, chikunku chimwing pa yisatu cha mitond chatema, ni masuku mawonsu matalel matema.

8 Mwangel wa kaad wabula mpuny* yend. Chad chom chimwing chading chifanakena ni mukandu ujim uzutina kasu achidjubwila mu karung. Ni chikunku chimwing pa yisatu cha karung chikala mash; 9 ni chikunku chimwing pa yisatu cha annam* a mu karung afa, ni chikunku chimwing pa yisatu cha maat chajiya.

10 Mwangel wa kasatu wabula mpuny* yend. Chad katumbu mujim wading uzutina kasu mud lamp waturika pansh, ni wapalikina pa chikunku chimwing pa yisatu cha atuwit ni pa misul ya mem. 11 Katumbu winou dijin dend Kuril.* Chad chikunku chimwing pa yisatu cha mem charila, ni antu avud afa ku mem, mulong amaridisha.

12 Mwangel wa kanying wabula mpuny* yend. Chad chikunku chimwing pa yisatu cha muten achibula, ni chikunku chimwing pa yisatu cha ngond ni chikunku chimwing pa yisatu cha atutumbu, chakwel chikunku chimwing pa yisatu cha yom yiney yawonsu chijala ni chikunku chimwing pa yisatu cha dichuku chafanyinap kwikal ni chitokish, chilik chimwing ni uchuku.

13 Chad namana ni kutesh mbur ukat kutwik mwiur* ni kulond nich dizu dikash anch: “Riyind, riyind, riyind kud antu ashicha pa divu mulong wa yidjimin yikwau ya jimpuny* yikimbinau angel akwau asatu ashala kal kubul!”

9 Mwangel wa katan wabula mpuny* yend. Chad namana katumbu wadokala mwiur wapalik pa divu, ni amwinkisha nfungul wa ruwengil rakad musul.* 2 Ndiy wafungula ruwengil rakad musul,* chad mwabudika mish mud mish ya ruteng ra kasu rijim, ni mish yiney yajadisha muten ni rinkind. 3 Mu mish yiney mwabudika atubol, ni apalangana pa divu; kupwa ayinkisha ulabu mud ukwetingau atwinvand a pa divu. 4 Ayileja kulik kushesh masuku ma pa divu ap chifukis ap chimwing chitalel ap mutond ap umwing, pakwez ayileja kuyisum ching kusu antu akad chijingidij cha* Nzamb pa jimpal jau.

5 Kayinkishap atubol ulabu wa kuyijip antu, pakwez wa kuyimesh mar mu angond atan, ni mar mafanyinau kuletish mading mud kusansan kukatay muntu kwov anch amusum kud kanvand. 6 Mu machuku minima, antu akez kakimb rufu pakwez kakez karumanap, akez kwov ja kufa, pakwez rufu rikez kayichin.

7 Atubol ading afanaken ni atubar ada a kurijek mulong wa kurish njit; pa mitu yau pading yom mud yibangul ya utad wa or, ni yifu yau yading mud yifu ya antu, 8 pakwez ading akwet nsuk mud nsuk ja amband. Ni mazeu mau mading mud ma antambu, 9 ading akwet nkibu jadinga mud nkibu ja utad ujal. Ni masok ma mapur mau mading mud masok ma matemb mapwitinau kud atubar ayila mau kwi njit. 10 Ading akwet kand mikil yikweta nmuny mud ja atwinvand, ni mu mikil yau mwawiy mwading ulabu wa kuyimesh nich antu mar mu angond atan. 11 Ading akwet mwant umwing uda mwangel wa ruwengil rakad musul.* Mu Hebereu dijin dend ndiy Abadon,* pakwez mu Grek akat kumutazuk anch Apoliyon.*

12 Mar ma kusambish masut kal.* Tal! Mar makwau maad makat kwez kupwa kwa yom yiney.

13 Mwangel wa musamban wabula mpuny* yend. Ni natesha dizu dadokal ku miseng ya chintamb cha utad wa or chida kurutu kwa Nzamb 14 damwel mwangel wa musamban wading ukweta mpuny* anch: “Yisuburila angel anying akasinau ku kawit mujim wa Eferat.” 15 Chad angel anying arijekau mulong wa saa, dichuku, ngond, ni muvu ayisuburila mulong wa kujip chikunku chimwing pa yisatu cha antu.

16 Amasalay awonsu endishang atubar ading tutikit twaad twa tutikit;* natesha uvud wau. 17 Ou wawiy mutapu namana atubar mu chishimushimu ni antu ading ashichap: Ading akwet nkibu jisunzina mud kasu, ja ble,* ni ja jon uda mud sufre. Mitu ya atubar yading mud mitu ya antambu, ni mu tun twau mwabudikang kasu, mish, ni sufre. 18 Chikunku chimwing pa yisatu cha antu ayijipa kusutin yipupu yisatu yiney: kasu, mish, ni sufre yabudikang mu tun twau. 19 Ulabu wa atubar wading mu tun twau ni mu mikil yau, mulong mikil yau yading mud annak ni yading yikwet mitu, ni yawiy yameshanangau nich mar.

20 Pakwez antu ashalaku alika kufa ku yipupu yiney kakarumukap ku midimu ya makas mau; pakwez adandamena kwifukwil ayilembil ni atupwany a utad wa or, wa argent, wa kwivre, a mayal, ni a mitond, akad kutwish kuman ap kutesh ap kwend. 21 Ni kakarumukap kudokal ku kujipan kwau ap ku yisal yau ya ayilembil ap ku yisal yau ya masandj* ap ku wij wau.

10 Chad namana kand mwangel mukwau ukweta dikand ukat kudokal mwiur ni kushirik pansh, wading udjit didj,* pa mutu wend pading nkongal, chifu chend chading mud muten, ni mend mend mading* mud manguj ma kasu, 2 ni mu chikas chend mwading muvungur ukemp wa kuvunguril. Ni wadjata mwend wend wa katatuku pa karung, pakwez wa kamaku pa divu, 3 chad watoya nich dizu dikash mud mukatay ntambu kwony. Ni patoyay, mazu ma anzaj sambwad mabarika.

4 Chad palondau anzaj sambwad, nading nikimbin kufund, pakwez natesha dizu dadokala mwiur dalond anch: “Lam ujindj wa* yom yalondau kal anzaj sambwad, ni kangal wayifund.” 5 Mwangel namana wiminy pa karung ni pa divu, wazambula chikas chend cha katatuku mwiur, 6 ni wachipa mu dijin da Muntu ushiching chikupu ni chikupu, watanga diur ni yom yawonsu yidamu, divu ni yom yawonsu yidap, ni karung ni yom yawonsu yidamu. Walonda anch: “Kwikil kand kuchingel. 7 Pakwez pakushikay mwangel wa sambwad piswimp ni kubul mpuny* yend, ujindj utumbila walejanay Nzamb mud rusang ruwamp kud atushalapol end aprofet ukuwanyin.”

8 Ni natesha dizu dadokala mwiur danlej kand kapamp kakwau anch: “Yang, utambul muvungur wa kutanguril uda mu chikas cha mwangel wiminya pa karung ni pa divu.” 9 Chawiy naya kud mwangel ni namulej kwinginkish muvungur ukemp. Ndiy wanleja anch: “Kwat ni uda, ukuril mu ditont mwey, pakwez mu kan mwey ukutaal mud woch.” 10 Natambula muvungur ukemp mu chikas cha mwangel ni nawuda, mu kan mwam wading utaadin mud woch, pakwez panauminya, mu ditont mwam mwarila. 11 Chad anleja anch: “Ufanyidin kand kulejan uprofet piur pa antu, michid, mazu,* ni ant avud.”

11 Chad anginkisha dileny dadinga mud mutond* pading panlejinay anch: “Tumbuk ni pim ndond yitumbila ya tempel wa Nzamb, chintamb, ni antu ifukwidinamu. 2 Pakwez chipang chida pol pa ndond yitumbila ya tempel, chilika ni kangal wachipim, mulong achipanin kal kud antu a michid, ni akuudjatol musumb utumbila mu angond makum manying ni yaad (42). 3 Nikuyibachik atuman am aad adjita yinzany kulejan uprofet mu machuku kanan yitot yaad ni makum musamban (1 260).” 4 Atuman inay aad awiy amekeshinau kusutin mitond yaad ya oliv ni mend ya lamp yaad, ni iminy kurutu kwa Mwant wa divu.

5 Anch muntu wakimb kuyisal nayimp, kasu kakubudik mu tun twau ni kuyosh akankuny nau. Chakin kamu, anch muntu wakimb kuyisal nayimp, wawiy mutapu ukumujipau. 6 Atuman inay aad akwet ulabu wa kufung diur chakwel kangal ruval wanak mu machuku makulejanau uprofet, akwet kand ulabu wa kukarumun mem kwikal mash ni kulet yipupu ya mitapu yawonsu pa divu mud mukatinau.

7 Pakupwishau kupan uman, nnam wa mu masuku utuntukina mu ruwengil rakad musul* ukuyirishikish, wayipandakan ni wayijip. 8 Mijimbu yau yikez kwikal mwi njil yijim ya musumb ujim utazukinau mu chifanakesh anch Sodom ni Idjibit, mwamujipinau kand Nsalejau pa mutond. 9 Chad antu a mitapu yawonsu, michid yawonsu, mazu mawonsu,* ni jingand jawonsu akez kutal mijimbu yau mu machuku masatu ni chikunku ni kakwitiyap anch ajik* mijimbu yau mwi nzay. 10 Chad antu ashicha pa divu akusangar mulong wa rufu rau ni kusal musambu, ni akez katumijadin yipan, mulong aprofet inay aad ayimesha antu ashicha pa divu mar nakash.

11 Kupwa kwa machuku masatu ni chikunku, spiritu wa mwom wadokala kud Nzamb wayandama, ni imana, chad antu ayimana ova wom nakash. 12 Chad atesha dizu dikash dadokala mwiur dayilej anch: “Kandamany kunoku.” Ni akandama mwiur mu madj, ni akankuny nau ayimana.* 13 Pa chisu chinicha kwasadika kuzal kwa divu kukash, ni chikunku chimwing pa dikum cha musumb chawa; ni antu tunan sambwad (7 000) ayijipa mulong wa kuzal kwa divu, ni antu akwau ova wom nakash, chad apana uyaj kud Nzamb wa mwiur.

14 Mar ma kaad masut kal.* Tal! Ma kasatu makat kwez mau.

15 Mwangel wa sambwad wabula mpuny* yend. Chad mwiur mwalanka mazu makash anch: “Want wa mangand wikal kal Want wa Nsalejetu ni wa Kristu wend, ni ukuyikel mud mwant chikupu ni chikupu.”

16 Ni amakurump makum maad ni yinying (24) ading ashicha pa matand kurutu kwa Nzamb asa manungun* ni amwifukwil Nzamb, 17 ni kulond anch: “Tukujikitishin Yehova* Nzamb, Mwin Dikand Dawonsu, udaku ni wadingaku, mulong wamekesh kal* ukash wey ujim ni mulong wasambish kal kuyikel. 18 Pakwez antu a michid ajimana nakash, niyey amwiney wajimana, ni chisu chatenchikau chawanyin kal mulong wa kuyirumburish afu ni kuyifut atushalapol ey aprofet ni antu atumbila ni antu akata kwov dijin dey wom, ikal ajim ap akemp, ni kuyishesh antu akata kushesh* divu.”

19 Ni mwiur, ndond yitumbila ya tempel wa Nzamb yazurika, ni mushet wa mansuk mend wamekana mwi ndond yitumbila ya tempel wend. Chad kwalanka milayilay, mazu, anzaj, kuzal kwa divu, ni ruval mukash wa mayal.

12 Kupwa chijingidij chijim chamekana mwiur: Mband umwing wading udjit muten, ngond wading mwinshin mwa yidjatil yend, ni ku mutu wend kwading chibangul cha atutumbu dikum ni yaad (12), 2 ni wading ukwet madikaj. Chad wading ukat kudil mulong wa kusansan ni misong ya kuval.

3 Kwamekana kand chijingidij chikwau mwiur. Tal! Iyazangomb mujim wa ulombu wa kasu, wading ukwet mitu sambwad ni miseng dikum, ni pa mitu yend pading yibangul* sambwad; 4 ni mukil wend wakaka* chikunku chimwing pa yisatu cha atutumbu a mwiur, ni wayidjubwil pa divu. Iyazangomb wadandamena kwiman kurutu kwa mband wading ukimbina kuval, chakwel anch waval ndiy amuda mwanend.

5 Chad mband wavala mwan ikundj, ukuyitakela* antu a michid yawonsu nich mukombu wa utad ujal. Ni mwanend amusenda* kapamp kamwing amutwal kud Nzamb ni ku ditand dend. 6 Ni mband wachinina mwi mpay mwamurijekinau ndond kud Nzamb ni mwafanyinau kumudishin mu machuku kanan yitot yaad ni makum musamban (1 260).

7 Chad kwalanka njit mwiur: Mikayel* nau angel end arisha nend iyazangomb, ni iyazangomb pamwing nau angel end arisha, 8 pakwez katwishap kupandakan,* ni mwiur mwamekanap kand ndond ya awiy kushakam. 9 Chawiy amudjubula iyazangomb mujim, nnak mukur, utazukinau anch Djabul ni Satan, ukata kupumbul antu ashicha pa divu da kabuj; amudjubwila pa divu, ni angel end ayidjubula nend pamwing. 10 Ni natesha dizu dikash mwiur dalond anch:

“Katat dipandish, ukash, Want wa Nzamb wetu, ni ulabu wa Kristu wend yikal kal yakin, mulong amudjubul kal mwin kuyifund akadivar netu ukata kuyifund muten ni uchuku kurutu kwa Nzamb wetu! 11 Ni amuwina kusutin mash ma Mwan a Mukoku ni kusutin uman walejanau, ni kakatap mipim* yau djat ni ku rufu. 12 Chawiy maur sangarany kwen pamwing ni en ushichanyamu! Riyind kud divu ni karung, mulong Djabul washirik kal kud en, ni ukwet ujim nakash, mulong wij anch kwamushal kal kwend ka chisu kakemp.”

13 Chad pamanay iyazangomb anch amudjubwil kal pa divu, wamuzengola mband wavala mwan ikundj. 14 Pakwez mband amwinkisha mapur maad ma mbur mujim chakwel atwikin mwi mpay pa ndond yend, pafanyinau kumudishin mu chisu chimwing ni yisu ni chikunku cha chisu chimwing,* kulemp ni nnak.

15 Chad nnak warika mu kan mwend mem mavud madinga mud kawit kwinyim kwa mband, mulong wa kumujiyish.* 16 Pakwez divu deza mulong wa kumukwash mband, ni divu dasula mu kan, daminy kawit mwawonsu warikay iyazangomb mu kan mwend. 17 Chawiy iyazangomb wamujimena mband ni waya mulong wa kurish njit nau anend akwau ashalaku,* akata kuziyin ku yijil ya Nzamb ni akweta mudimu wa kupan uman piur pa Yesu.

13 Chad wimana* pa usukuril wa karung.

Ni namana nnam wa mu masuku ukat kubudik mu karung, wading ukwet miseng dikum ni mitu sambwad, ni pa miseng yend pading yibangul* dikum, pakwez pa mitu yend pading majin ma masaal. 2 Chad nnam wa mu masuku namana wading mud chisump, pakwez mend mend mading mud ma chiseng a ntambu, ni kan kend kading mud ka ntambu. Iyazangomb wamwinkisha nnam winou ukash wend, ditand dend, ni ulabu ujim.

3 Namana anch mutu wend umwing autapa mu mutapu wa kuujip, pakwez chitat chinech chafanyina kumujip chayerika, chad antu awonsu a pa divu amulondula nnam wa mu masuku ni kushimwok. 4 Awiy amwifukwila iyazangomb mulong ndiy wamwinkisha nnam wa mu masuku ulabu, ni amwifukwila nnam wa mu masuku nich mazu manam: “Nany uda mud nnam wa mu masuku, ni nany ukutwisha kurish nend?” 5 Amwinkisha kan kading kalondina nich kwitutul ni kusaalan, ni amwinkisha ulabu wa kusal mud mwading mukatinay mu angond makum manying ni yaad (42). 6 Chad wasula kan kend wasambish kumusaal Nzamb, kusaal dijin dend ni ndond yishichingay, ni kuyisaal awonsu ashiching mwiur. 7 Amulika chakwel ayirishikish antu atumbila ni kuyipandakan, chad amwinkisha ulabu pa michid yawonsu, pa antu awonsu, pa mazu mawonsu,* ni pa jingand jawonsu. 8 Ni antu awonsu ashicha pa divu akez kumwifukwil. Kudosh kamu kwatekinau mufulandal wa mangand, kwikil ap umwing wafundau dijin mu muvungur wa mwom wa Mwan a Mukoku wajipau.

9 Anch muntu ukwet matu, atesh. 10 Anch muntu ufanyidin kuya mu winkwal, ukuya mu winkwal. Anch muntu wajipan nich mpak ya musamun,* niyend afanyidin kumujip nich mpak ya musamun. Chawiy chifanyidinau antu atumbila kujijaman ni kwikal ni ritiy.

11 Kupwa namana nnam wa mu masuku mukwau ukat kudokal pa divu, wading ukwet miseng yaad mud mwan a mukoku, pakwez wasambisha kulond mud iyazangomb. 12 Wasadina ulabu wawonsu wa nnam wa mu masuku wa kusambish mu mes mwend. Ni wabachika divu ni antu ashichap kumwifukwil nnam wa mu masuku wa kusambish, wayerika ku chitat chafanyina kumujip. 13 Wasala yilay* yijim, washikena ap ku kudosh kasu mwiur ni kukalet pa divu mu mes ma an a antu.

14 Wayipumbula antu a pa divu kusutin yilay yamulikinau kusal mu mes ma nnam wa mu masuku, pading payilejinay antu a pa divu kusal chirumbidij cha nnam wa mu masuku watapau mpak ya musamun pakwez wadandamena kwikal mwom. 15 Amulika chakwel apan mwom* ku chirumbidij cha nnam wa mu masuku, chakwel chirumbidij cha nnam wa mu masuku chilond ni kuyijipesh awonsu akulika kwifukwil chirumbidij cha nnam wa mu masuku.

16 Ukat kuyishindil antu awonsu—⁠akemp ni ajim, ampich ni atuzwendj, antu akweta want ipau ni asuk—⁠kutambul chijingidij pa chikas chau cha katatuku ap pa mpal, 17 chakwel kangal muntu ap umwing atwish kuland ap kulandish anch kakwetap chijingidij, kwawiy kulond anch dijin da nnam wa mu masuku ap uvud wa dijin dined. 18 Pinap pawiy pafanyidina kwikal nich manang: Muntu ukweta manang apampish uvud wa nnam wa mu masuku, mulong ud uvud wa chiwuntu,* ni uvud wend ud yitot musamban makum musamban ni musamban (666).

14 Kupwa namana Mwan a Mukoku wiminy pa Mukandu wa Ziyon, pamwing nau antu tunan chitot makum manying ni tunying (144 000) ading afundinau dijin dend ni dijin da Tatukwend pa jimpal jau. 2 Natesha chidjimin chading chidokila mwiur chading mud chidjimin cha mpol yijim* ap mud chidjimin cha nzaj mukash; ni chidjimin natesha chading mud cha in kuwang ading awangina nich tudad. 3 Ni akat kuwang muminy wading wovikena mud muminy usu kurutu kwa ditand ni kurutu kwa yitang yinying yikweta mwom ni amakurump, kwikil muntu ap umwing wading utwishina kwilej muminy winou chikurikina, ching kusu antu tunan chitot makum manying ni tunying (144 000) alandau pa divu. 4 Inay awiy antu alika kwijondish nau amband; chakin kamu, ad mud atujik. Inay awiy antu adandamedina kumulondul Mwan a Mukoku kwawonsu kuyilay. Ayilanda pakach pa an a antu mud mabuj ma kusambish mulong wa Nzamb ni mulong wa Mwan a Mukoku, 5 ni katanap makasu mu tun twau; kakwetap chidik ap chimwing.

6 Namana mwangel mukwau wading utwikina mwiur,* ni wading ukwet rusang ruwamp ra chikupu ra kulejan kud antu ashicha pa divu, mu jingand jawonsu, ku michid yawonsu, ku mazu mawonsu,* ni kud antu awonsu. 7 Wading ukat kulond nich dizu dikash anch: “Mwovany Nzamb wom ni panany uyaj kud ndiy, mulong chisu chikuyirumburishay antu chawanyin kal, chawiy mwifukwilany Ndiy watanga diur, divu, karung, ni misul ya mem.”

8 Mwangel mukwau wa kaad walondula, ukat kulond anch: “Wawa kal! Babilon Mujim wawa kal, ndiy wayinishina antu a michid yawonsu maar mend ma nviny makata kuletish yovil yikash ya kusal yisal ya masandj!”*

9 Mwangel mukwau wa kasatu wayilondula, ukat kulond nich dizu dikash anch: “Mwawonsu ukumwifukwila nnam wa mu masuku ni chirumbidij chend, ni mwawonsu ukutambula chijingidij pa mpal ap pa chikas chend, 10 niyend ukuna maar ma nviny ma ujim wa Nzamb michilau pakad kumabomb ni chom chikwau mu rupas ra ujim Wend, ni akumumesh mar mu kasu ni mu sufre ku mes kwa angel atumbila ni kwa Mwan a Mukoku. 11 Ni mish ya kasu kayimeshina mar* yikudandamen kuya mwiur chikupu ni chikupu, antu amwifukwidina nnam wa mu masuku ni chirumbidij chend ni awonsu atambwila chijingidij cha dijin dend kakwikalap ni chisu cha kwiswedish uchuku ap muten. 12 Pinap pawiy pafanyidinau antu atumbila kujijaman, awiy adandamedina kuziyin ku yijil ya Nzamb ni kulam fe ritiy muday Yesu.”

13 Ni natesha dizu dadokala mwiur dalond anch: “Fund anch: Ayuk kwau afu afila mu uumwing ni Mwant kusambish katat. Chakin kamu, spiritu ulondin anch iswedish ku midimu yau yikash, mulong yom yasalau yiyilondwil.”*

14 Kupwa namana didj ditok, ni pading pashich muntu wading ufanikena ni mwan a muntu, ukwet chibangul cha utad wa or ku mutu ni mpak ya kwangul nich yambukina ku chikas.

15 Mwangel mukwau wabudika mwi ndond yitumbila ya tempel, oku ukat kumutazuk muntu wading ushicha pa didj nich dizu dikash anch: “Non mpak yey ya kwangul nich ni angul, mulong chisu cha kwangul chawanyin kal, ni yakwangul ya pa divu yaswa kal kamu.” 16 Chad muntu wading ushicha pa didj wasutisha mpak yend ya kwangul nich pa divu, ni divu adangula.

17 Mwangel mukwau niyend wabudika mwi ndond yitumbila ya tempel uda mwiur, niyend wading ni mpak ya kwangul nich yambukina.

18 Mwangel mukwau niyend wabudika pa chintamb, ni wading ukwet ulabu pa kasu. Ni wamutazuka muntu wading ni mpak ya kwangul nich yambukina, nich dizu dikash anch: “Non mpak yey ya kwangul nich yambukina ni katul yizakas ya nviny wa pa divu, mulong mabuj ma nviny wend maswa kal.” 19 Mwangel wasutisha mpak yend ya kwangul nich pa divu ni wakatula nviny wa pa divu, chad wamudjubwil mu dibuku dijim da kukamin nviny da ujim wa Nzamb. 20 Mabuj ma nviny amakamina pol pa musumb, ni mash mabudika mu dibuku da kukamin nviny, chad makaninika kushik ni kwi mbwambu ja atubar ni mapalangana mu akilometre piswimp yitot yaad makum chidivu ni musamban (296).*

15 Namana kand chijingidij chikwau mwiur, chijim ni chishimwokishena, angel sambwad adinga ni yipupu sambwad. Yiney yawiy yipupu ya nsuden, mulong kusutin yawiy, ujim wa Nzamb ukushik kwinsuden.

2 Namana chom chimwing chadinga mud karung wa dikalash mwadinga yom ya kubomb nich kasu, chad in kumuwin nnam wa mu masuku ni chirumbidij chend ni uvud wa dijin dend ading iminy piswimp ni karung wa dikalash, akwet tudad twa Nzamb. 3 Ading akat kuwang muminy wa Moses, kashalapol wa Nzamb, ni muminy wa Mwan a Mukoku anch:

“Yehova* Nzamb, Mwin Dikand Dawonsu, midimu yey yid yijim ni yishimwokishena. Mwant wa chikupu, jinjil jey jitentamin ni jid jakin. 4 Yehova,* nany ukulika kukwov ey wom ni kutumbish dijin dey? Mulong yey kwey ushinshamena! Antu a michid yawonsu akwez ni akwifukwil kurutu kwey, mulong ajingunin yijidik yey yitentamina.”

5 Kupwa kwa yom yiney, namana ndond yitumbila ya mwinkand wa uman yazurik mwiur, 6 chad angel sambwad ading akweta yipupu sambwad abudika mwi ndond yitumbila, adjit masun ma ndand muwamp ni uzazina, ni ading adjit kand anshipu a utad wa or mu jintul. 7 Chitang chimwing pakach pa yitang yinying yikweta mwom chayinkisha angel sambwad yibakud sambwad ya utad wa or yading yizwila too nich ujim wa Nzamb, ushiching chikupu ni chikupu. 8 Chad ndond yitumbila yizwula mish too mulong wa uyaj wa Nzamb ni mulong wa ukash wend, ni kwikil muntu ap umwing watwisha kwandam mwi ndond yitumbila kushik ni papwila yipupu sambwad ya angel sambwad.

16 Chad natesha dizu dikash dadokala mwi ndond yitumbila dayilej angel sambwad anch: “Yangany, wichilany yibakud sambwad ya ujim wa Nzamb pa divu.”

2 Mwangel wa kusambish waya, wichil chibakud chend pa divu. Chad makolong makash ni mavukina mayikwata antu ading akweta chijingidij cha nnam wa mu masuku ni ifukwilang chirumbidij chend.

3 Mwangel wa kaad wichila chibakud chend mu karung. Chad karung wikala mash mud ma muntu wafang kal, ni yitang yawonsu yikweta mwom* yafa, chakin kamu, yom ya mu karung.

4 Mwangel wa kasatu wichila chibakud chend mu atuwit ni ku misul ya mem. Chad yikala mash. 5 Natesha mwangel ukweta ulabu pa mem walond anch: “Ey, Muntu udaku ni wadingaku, ushinshamena, ey utentamin, mulong wakwatin mupak anch yom yiney yifanyidin kushiken, 6 mulong awiy ichila mash ma antu atumbila ni ma aprofet, ni ey wayinkish kal mash chakwel ana; yiyiwanyidin kamu.” 7 Chad natesha chintamb chalond anch: “Mwawiy, Yehova* Nzamb, Mwin Dikand Dawonsu, kurumburish kwey kud kwakin ni kutentamin.”*

8 Mwangel wa kanying wichila chibakud chend pa muten, chad muten awinkisha ulabu wa kuyosh antu nich kasu. 9 Chad antu ayosha kusutin chirungul chikash, pakwez asaala dijin da Nzamb, wadinga ni ulabu pa yipupu yiney, ni kakarumukap kwau ni kupan uyaj kud ndiy.

10 Mwangel wa katan wichila chibakud chend pa ditand da nnam wa mu masuku. Ni want wend wajala bwi, chad antu asambisha kuda jindim jau mulong wa kusansan, 11 pakwez amusaala Nzamb wa mwiur mulong wa kusansan ni makolong mau, ni kakarumukap ku midimu yau.

12 Mwangel wa musamban wichila chibakud chend pa kawit mujim wa Eferat, chad mem mend mauma chau mulong wa kuyirijekin ant a kwingangel* njil.

13 Chad namana mazu masatu mijondila mapepilau madinga* mud amizabu mabudik mu kan mwa iyazangomb, mu kan mwa nnam wa mu masuku ni mu kan mwa muprofet wa makasu. 14 Chakin kamu, mad mazu mapepilau kud ayilembil ni masala yilay, ni mapalangana kud ant ashicha pa divu da kabuj mulong wa kuyikumangej pamwing mulong wa njit ja dichuku dijim da Nzamb Mwin Dikand Dawonsu.

15 “Tesh! Nikat kwez mud mwij. Wayuk kwend muntu udandamedina kuchish ku mes ni ulamina masun mend,* chakwel kangal enda kanzikis ni antu aman usany wend.”

16 Ni mayikumangejina ant pa ndond yitazukinau mu Hebereu anch Armagedon.*

17 Mwangel wa sambwad wichila chibakud chend mu rinkind. Chad natesha dizu dikash dadokala mwi ndond yitumbila ya ditand dalond anch: “Yasadik kal!” 18 Chad kwalanka milayilay, mazu, anzaj, ni kwasadika kuzal kwa divu kukash kwakad kusadikangap kal kudosh kwikadinau antu pa divu, kwading kuzal kwa divu kujim ni kukash. 19 Musumb ujim waurika mu yikunku yisatu, ni misumb ya antu a michid yawa; chad Nzamb wamuvurika Babilon Mujim, mulong wa kumunish rupas ra nviny wa ujim wend ukash. 20 Chikwau kand, matung mawonsu machina mau, ni mikandu yashadika. 21 Kupwa, mayal ma ruval majim, diyal ni diyal dading dilimin piswimp talant* umwing, madokala mwiur mayiturikin antu, chad antu amusaala Nzamb mulong wa chipupu cha mayal ma ruval, mulong chipupu chinech chading kamu chijim nakash.

17 Umwing wa angel sambwad ading akweta yibakud sambwad weza ni wanlej anch: “Ez nikulej mutapu ukumurumburishau ndumb mujim ushicha pa mem mavud, 2 ant a pa divu asala nend yisal ya masandj,* ni antu ashicha pa divu alewin kal maar ma nviny ma yisal yend ya masandj.”*

3 Ni kusutin ukash wa spiritu, wansenda wantwal mwi mpay. Chad namana mband ushich pa nnam wa mu masuku wa ulombu usunz wading wizwila too nich majin mamusaadina Nzamb ni wading ukweta mitu sambwad ni miseng dikum. 4 Mband wading udjit masun masunzurikina kwa kujal ni masunz, ading amupwembujodin nich utad wa or, mayal ma usey ni usang, ni mu chikas chend mwading rupas ra utad wa or rading rizwila sens nich yom yitakanena ni yijondila ya yisal yend ya masandj.* 5 Pa mpal yend ading afundinap dijin dimwing da ujindj anch: “Babilon Mujim, makwau wa andumb ni wa yom yitakanena ya pa divu.” 6 Ni namana anch mband winou wading walewang kal nich mash ma antu atumbila ni mash ma atuman a Yesu.

Panamumana, nashimwoka nakash. 7 Chawiy mwangel wangipula anch: “Washimwok kal mulong wak? Nikimbin kukurumburil ujindj wa mband winou ni wa nnam wa mu masuku umusendina, ukweta mitu sambwad ni miseng dikum: 8 “Nnam wa mu masuku wamanang wadingaku, chad kadapaku kand, pakwez ukimbin kubudik mu ruwengil rakad musul,* ni ukuya ku disheshik. Chad antu ashicha pa divu—⁠awiy alikau kufund majin mu muvungur wa mwom kudosh kwatekinau mufulandal wa mangand—⁠akushimwok pakumanau anch nnam wa mu masuku wadingaku, chad kadapaku kand, pakwez ukwikalaku.

9 “Chinech chitin ronganyin ni manang: Mitu sambwad yimekeshin mikandu sambwad, yikweta misong pashichay mband winou. 10 Kud kand ant sambwad: Atan awil, umwing udaku, ni mukwau kand kal ashik; pakwez pakushikay, ufanyidin kushal mu kachisu kakemp. 11 Ni nnam wa mu masuku wadingaku pakwez kadapaku kand, ud kand mwant wa chinan, pakwez udokil kud ant sambwad, ni uyil ku disheshik.

12 “Miseng dikum wamanang yimekeshin ant dikum akad kal kutambul want, pakwez akutambul ulabu wa kuyikel mu saa umwing pamwing ni nnam wa mu masuku. 13 Awonsu akwet chitongijok chimwing, chawiy akat kumwinkish nnam wa mu masuku ukash ni ulabu wau. 14 Akumurishikish Mwan a Mukoku, pakwez Mwan a Mukoku ukuyipandakan, mulong ud Nsalej wa ansalej ni Mwant wa ant. Chikwau kand, antu aday nend, atazukau, atondau ni ashinshamena niyau akupandakan.”

15 Kupwa mwangel wanleja kand anch: “Mem wamanang, pada pashichay ndumb, mamekeshin antu, yisak ya antu, michid ni mazu.* 16 Chad miseng dikum wamanang ni nnam wa mu masuku, akumukis ndumb, amusheshin yom yawonsu, ni amusha kanzikis, chad akuda misuny yend ni kumwosh shitit nich kasu. 17 Mulong Nzamb wachiteka mu michim yau chakwel awanyish chitongijok chend, mwaning, chakwel awanyish chitongijok chau chimwing kusutin kupan want wau kud nnam wa mu masuku, kushik ni pakuwanyina mazu ma Nzamb. 18 Ni mband wamanang umekeshin musumb ujim uyikedina ant a pa divu.”

18 Kupwa kwa yom yiney, namana mwangel mukwau udokil mwiur ukat kushirik pansh nich ulabu ujim, chad uyaj wend wamunyika pa divu. 2 Ni watoya nich dizu dikash anch: “Wawa kal! Babilon Mujim wawa kal, ni wikal kal ndond ya kushakam ayilembil ni ndond ya kukumangen ayilembil awonsu* ni atujil awonsu ijondila ni akisinau! 3 Mulong kusutin maar ma nviny makata kuletish yovil yikash ya yisal yend ya masandj,* wayikwatin kal antu a michid yawonsu, ni ant a pa divu asala nend yisal ya masandj, in kwisak* a pa divu ikala ampich kusutin yom yivud ya usey ya mband winou yapitay pakad usany.”

4 Chad natesha dizu dikwau dadokala mwiur, dalond anch: “En antwam, budikanyamu, anch ukimbinanyap kubombakan nend mu yitil yend, ni anch ukatinanyap kutambul chikunku cha yipupu yend. 5 Mulong yitil yend yaruzwamin kal djat ni mwiur, ni Nzamb wavurikin yisal yend yiyimp. 6 Musalany mud mwayisalay akwau, mwaning, muchirishinany tupamp twaad yom yasalay; mu rupas mwarijekinay maar, murijekinanyamu ndiy tupamp twaad. 7 Mulong wibaza nakash ni wading ni mapit mavud mapitay pakad usany, mumeshany mar ni mudidishany mu mutapu umwing. Mulong udandamedin kulond mu muchim wend anch: ‘Am nid mwant,* nidap kwam mwadamufu, ni nikez kadilap dichuku ap dimwing.’ 8 Chawiy chikweza yipupu yend mu dichuku dimwing, rufu, madil, ni kamungun, ni akumwosh kamu shitit nich kasu, mulong Yehova* Nzamb umurumburishina, ukwet usu.

9 “Ni ant a pa divu asala nend yisal ya masandj* ni apita nend yom yivud ya usey pakad usany akez kudil, kwibul pa ntul ni kwinan mulong wendendiy pakumanau mish ya kutem kwend. 10 Akez kwimen palemp mulong wa wom wa mar makumumeshau ni kulond anch: ‘Yowoo, Yowoo, ey musumb ujim, Babilon, musumb ukash, mulong dirumburish dey dashik kal mu saa umwing kwend kusu!’

11 “Chikwau kand, in kwisak a pa divu akez kushikok ni kumudil, mulong kakumanap kand muntu ukulanda yom yau: 12 Utad wa or, utad wa argent, mayal ma usey, usang, ndand muwamp, masun masunzirikina kwa kujal, masun mada livliv, masun masunz; chom chawonsu chasalau ni mbau ja res ruwamp, ni chom chawonsu chasalau nich mazeu ma ndjamb, mitond ya usey, kwivre, utad ujal, ni mayal ma ulombu kushalijan; 13 ni diseng da yom ya mukach mwa mitond yikweta res ruwamp, yom ya kutaadish nich yakuda ya mwi ngand ya End, diseng da malash, many ma malash, diseng da malash ditok, maar ma nviny, many ma oliv, wung uwamp, tidiku, angomb, amikoku, atubar, matemb, asuk, ni mwom* ya antu. 14 Mwaning, yom yiwamp* wading ukatina katat yakuchin kal kulemp, yakuda yawonsu yitaadina ni yom yawonsu yiwamp yakushadik kal, ukuyimanap kand.

15 “In kwisak alandishang yom yiney ni ikala ampich mulong wendendiy, akez kwimen palemp mulong wa wom wa mar makumumeshau, akez kashikok ni kudil, 16 anch: ‘Yowoo, Yowoo, ey musumb ujim, wada udjita masun ma ndand muwamp, masunzirikina kwa kujal, masunz, ni wada upwembujodinau nakash nich yom ya utad wa or, mayal ma usey, ni usang, 17 mulong mu saa umwing kwend kusu mapit minam mawonsu amashesh kal!’

“Amakurump awonsu a maat, in kwendangan pa mem awonsu, in kusal mudimu mu waat, ni antu awonsu asadining midimu pa karung akwimen palemp, 18 chad pakumanau mish ya kutem kwend akez kadil anch: ‘Musumb ik wada mud musumb ujim?’ 19 Akez kiyichil rufunfut pa mitu, oku akat kudil, kushikok, ni kulond anch: ‘Yowoo, yowoo, ey musumb ujim, mwapitidinau antu awonsu akweta maat mulong wa dipit dey, mulong mu saa umwing kwend kusu akusheshin kal yom yawonsu!’

20 “A! Ey diur, sangar kwey mulong wa yom yamushikena kal, ni en antu atumbila, atwimbuy nau aprofet, mulong Nzamb wamurumburish kal mulong wenen!”

21 Chad mwangel ukweta dikand wazambula diyal dijim,* wadidjubwil mu karung ni walond anch: “Wawiy winou mutapu ukez kamudjubulau Babilon musumb ujim nich usu, ni kakez kamekanap kand. 22 Kakez kateshap kand kwol kwey in kuwang ni tudad, in kubul mizik, in kupep mishiy, ni in kubul jimpuny.* Kakez katanap kand kwol kwey mwin kusal mudimu ap umwing, ni masok ma mayal majim makez kwovakanap kand kwol kwey. 23 Kwikil kand chitokish cha lamp chikeza kamunyik kwol kwey, ni kwikil kand dizu da ngatan ap da ngachik dikeza kwovakan kwol kwey; mulong in kwisak ey ading antu akweta ulabu pa divu, ni kusutin yisal yey ya ayilembil, wayipumbwil antu a michid yawonsu. 24 Mwaning, kwol kwend kwawiy kwataninau mash ma aprofet, ma antu atumbila, ni ma antu awonsu ajipau pa divu.”

19 Kupwa kwa yom yiney, natesha mud dizu dikash da yisak yijim ya antu mwiur. Alonda anch: “Mushimanany Yah!* Dipandish, uyaj, ni ukash yid ya Nzamb wetu, 2 mulong kurumburish kwend kud kwakin ni kutentamin. Mulong wamurumburish kal ndumb mujim wayipishina divu nich yisal yend ya masandj,* ni wafundakesh kal mash ma atushalapol end mada pa makas mend.”* 3 Ni pakad kulab, awiy alonda kand kapamp ka kaad anch: “Mushimanany Yah!* Mulong mish ya kutem kwa musumb winou yidandamedin kukaninik chikupu ni chikupu.”

4 Chad amakurump makum maad ni yinying (24) ni yitang yinying yikweta mwom asa manungun mulong wa kumwifukwil Nzamb ushicha pa ditand, ni alonda anch: “Amen! Mushimanany Yah!”*

5 Chikwau kand, dizu dadokala ku ditand ni dalond anch: “Mushimanany Nzamb wetu, en atushalapol end awonsu, akemp ni ajim, umwovilanya wom.”

6 Ni natesha mud dizu da yisak yijim ya antu, mud chidjimin cha mpol yijim* ni mud chidjimin cha anzaj akash. Alonda anch: “Mushimanany Yah,* mulong Yehova* Nzamb wetu, Mwin Dikand Dawonsu, wasambish kal kuyikel! 7 Tusangarany ni kuzangijal ni tupanany uyaj kud ndiy, mulong chisu cha kwatan cha Mwan a Mukoku chashik kal ni mukajend wirijekang kal. 8 Mwaning, amwitiyin kudjal masun ma ndand muwamp, uzazina, ni winangina—⁠mulong ndand muwamp umekeshin yisal yitentamina ya antu atumbila.”

9 Mwangel wanleja kand anch: “Fund anch: Ayuk kwau antu atazukinau ku musambu wa uruw wa Mwan a Mukoku.” Wanleja kand anch: “Minam mawiy mazu makin ma Nzamb.” 10 Chad nawila ku mend mend mulong wa kumwifukwil. Pakwez wangela anch: “Babal! Kangal wasal mwamu! Niyam nid kwam mbay ney musuk ni mbay wa akadivar ney akweta mudimu wa kupan uman piur pa Yesu. Mwifukwila Nzamb! Mulong uman piur pa Yesu wawiy upepidila uprofet.”

11 Namana diur da kwazuril, chad namana kabar mutok. Ni muntu wading ushichap amutazukin anch Ushinshamena ni Wakin, ni ukat kurumburish ni kurish njit nich kutentam. 12 Mes mend mad muzuzu wa kasu, ni pa mutu wend pad yibangul* yivud. Ni amufundin dijin dakad kwijikan kud muntu ap umwing, ching kusu ndiy amwinend, 13 ni wading udjit disun dikweta* yibik ya mash, ni amutazukin anch Dizu da Nzamb. 14 Chikwau kand, amasalay a mwiur ading adjita masun ma ndand muwamp, mutok ni winangina ading amulondwil pa atubar atok. 15 Ni mu kan mwend mubudikin mpak ya musamun yilemp, mulong wa kuyibul nich antu a michid, ni ukuyitakel* nich mukombu wa utad ujal. Chikwau kand, ndiy udjatina nviny uda mu dibuku da kukamin mabuj ma nviny da ujim ukash* wa Nzamb Mwin Dikand Dawonsu. 16 Pa disun dend,* mwaning, pa kataf kend, afundinap dijin dimwing anch: Mwant wa ant ni Nsalej wa ansalej.

17 Namana mwangel mukwau wiminy mu muten, chad wayitazuka atujil awonsu akata kutwik mwiur* nich dizu dikash anch: “Ezany kunoku, kumanganany mulong wa musambu ujim wa Nzamb 18 chakwel udany mbij ja ant, mbij ja atulal a amasalay, mbij ja amakundj akweta usu, mbij ja atubar ni antu ashichap, ni mbij ja awonsu, mbij ja antu akweta want ipau, ja asuk, ni mbij ja akemp ni ajim.”

19 Chad namana nnam wa mu masuku ni ant a pa divu nau amasalay au akumanganang kal pamwing mulong wa kumurishikish ndiy wading ushicha pa kabar ni amasalay end. 20 Chad amukwata nnam wa mu masuku, pamwing ni aprofet a makasu asalang yilay kurutu kwend mulong wa kuyipumbul antu atambula chijingidij cha nnam wa mu masuku ni antu ifukwila chijingidij chend. Pading pachidau aom, awonsu aad ayidjubwila mu dijiy da kasu ni sufre. 21 Pakwez akwau ayijipa nich mpak ya musamun yilemp yabudika mu kan mwa ndiy ushicha pa kabar. Chad atujil awonsu ikuta mbij jau.

20 Ni namana mwangel umwing wading ukat kushirik kudokal mwiur, wading ukwet mu chikas chend rufungul wa ku ruwengil rakad musul* ni muyolal ujim. 2 Chad wamukwata iyazangomb, nnak mukur, utazukinau anch Djabul ni Satan, wamukas mu mivu kanan (1 000). 3 Chad wamudjubwila mu ruwengil rakad musul,* wafungaku, ni watekaku chijingidij* chakwel kangal kand wayipumbul antu a michid kushik ni pakupwila mivu kanan (1 000). Kupwa kwa yom yiney, afanyidin kumulikishaku mu kachisu kakemp.

4 Chad namana matand, ni antu ading ashichap ayinkisha ulabu wa kurumburish. Mwaning, namana mipim* ya antu ajipau* mulong wa uman wapanau piur pa Yesu ni mulong alonda piur pa Nzamb, ni antu alika kumwifukwil nnam wa mu masuku ap chirumbidij chend ni alika kutambul chijingidij pa mpal ni pa chikas chau. Achirika kand ku mwom ni ayikela pamwing ni Kristu mu mivu kanan (1 000). 5 (Afu akwau kachirikap ku mwom kushik ni papwila mivu kanan [1 000].) Dined dawiy divumbuk da kusambish. 6 Ayuk kwau ni ikal atumbila awonsu akuvumbulau mu divumbuk da kusambish; rufu ra kaad rikwetap usu pad awiy, pakwez akwikal in kupesh a Nzamb ni a Kristu, ni akuyikel nend pamwing mu mivu kanan (1 000).

7 Chad pakupwa kamu mivu kanan (1 000), Satan akumulikishaku mu rukan, 8 ni ukubudik mulong wa kuya kupumbul antu a michid ada ku makonk manying ma divu, mwaning, Gog ni Magog, ukuyikumangej pamwing mulong wa njit. Uvud wau ud mud usukuril wa mu karung. 9 Apalangana pa divu da kabuj ni anyimburika chibeng cha antu atumbila ni musumb ukatinay Nzamb. Pakwez kasu kadokala mwiur ni kayosh awonsu. 10 Chad Djabul wayipumbulang amudjubwila mu dijiy da kasu ni sufre, mwadingay nnam wa mu masuku ni muprofet wa makasu; ni akuyimesh mar* muten ni uchuku chikupu ni chikupu.

11 Chad namana ditand dijim ditok ni Muntu wading ushichap. Divu ni diur yachina mau kurutu kwend, ni kwamekanap kand ndond mulong wa awiy. 12 Ni namana afu, ajim ni akemp, iminy kurutu kwa ditand, ni mivungur ayitangurila. Pakwez atangurila kand muvungur ukwau; wawiy muvungur wa mwom. Afu ayirumburisha kukwatijan ni yom yading yifundinau mu mivungur ni kukwatijan ni yisal yau. 13 Chad karung wapana afu adingamu, rufu ni Nzay* yapana afu adingamu, ni ayirumburisha, muntu ni muntu kukwatijan ni yisal yend. 14 Chad rufu ni Nzay* ayidjubwila mu dijiy da kasu. Dijiy da kasu dimekeshin rufu ra kaad. 15 Chikwau kand, awonsu ading akad kufundau majin mu buku wa mwom ayidjubwila mu dijiy da kasu.

21 Chad namana diur disu ni divu disu; mulong diur dikur ni divu dikur yasutin, ni karung kadapaku kand. 2 Namana kand musumb utumbila, Yerusalem Musu, ukat kushirik kudokal mwiur kud Nzamb ni ading amurijekang kal mud ngachik wapwembujolangau kal mulong wa nfumwend. 3 Chad natesha dizu dikash dadokala ku ditand dalond anch: “Talany! Mwinkand wa Nzamb ud pakach pa antu, ukushakam nau, ni awiy akwikal antwend. Ni Nzamb amwinend ukwikal nau. 4 Ni ukukuswol mansoj mawonsu ku mes mau, kukwikalap kand rufu ap madil ap kushikok ap kusansan. Yom yikur yasutin kal.”

5 Chad Muntu wading ushicha pa ditand walonda anch: “Talany! Nikat kusal yom yawonsu yisu.” Walonda kand anch: “Fund, mulong mazu minam mad ma kuchingejin* ni makin.” 6 Ni wanleja anch: “Mawanyin kal! Yam Alfa ni Omega,* disambishil ni disuden. Muntu mwawonsu wovila impu ya mem nikumwinkish chamwamu* mem madokila ku musul wa mem ma mwom. 7 Muntu mwawonsu ukuwina, ukuswan yom yiney, am nikwikal Nzamb wend ni ndiy ukwikal mwanam. 8 Pakwez antu akweta wom, akad ritiy, atakanena ni ijondila, in kujipan, akata kusal yisal ya masandj,* akata kusal yom ya ayilembil, in kwifukwil atupwany, ni akamakasu awonsu akuyidjubwil mu dijiy da kasu ni sufre. Dijiy dined dimekeshin rufu ra kaad.”

9 Umwing wa angel sambwad ading akweta yibakud sambwad yading yizwila too nich yipupu sambwad ya nsuden weza ni wanlej anch: “Ez nikulejay ngachik, mband wa Mwan a Mukoku.” 10 Chawiy, kusutin ukash wa spiritu, wansenda wantwal ku mukandu ujim ni ulemp, ni wanleja Yerusalem, musumb utumbila, ukat kushirik kudokal mwiur kud Nzamb 11 ni wading ukwet uyaj wa Nzamb. Kuzaz kwend kwading mud kwa diyal da usey nakash, mud diyal da jasp dizazina ni da zwang.* 12 Wading ukwet rubumbu rijim ni rilemp ra yis dikum ni yaad (12), ni ku yis kwading angel dikum ni yaad (12), ni pa yis ading afundinap majin ma michid dikum ni yaad (12) ya an a Isarel. 13 Kwingangel kwading yis yisatu, kwiyand yis yisatu, kurul yis yisatu, ni kurand yis yisatu. 14 Rubumbu ra musumb rading rikwet kand mufulandal wa mayal dikum ni yaad (12), ni pa mayal minam pading majin dikum ni yaad (12) ma atwimbuy dikum ni yaad (12) a Mwan a Mukoku.

15 Chad muntu wading winlondishina wading ukwet dileny da utad wa or da kupim nich, mulong wa kupim musumb, yis yend ni rubumbu rend. 16 Musumb wading ukwet makonk manying milikena, pa kulep pading piliken ni pa kujimb. Chad wapima musumb ni dileny, ni watana akilometre piswimp tunan twaad yitot yaad ni makum maad (2 220);* kulep, kujimb ni kulep pa kuya mwiur yading yiliken. 17 Wapima kand rubumbu, ni watana ametre piswimp makum musamban ni yinying (64),* kukwatijan ni chipim cha mwan a muntu, chida kand chipim cha mwangel. 18 Rubumbu aritunga nich mayal ma jasp, ni musumb autunga nich utad wa or muwamp nakash uda mud dikalash da zwang. 19 Mifulandal ya rubumbu ra musumb ading ayipwembujodin nich mayal mawamp ma mitapu ni mitapu: mufulandal wa kusambish wading wa jasp, wa kaad wa safir, wa kasatu wa kalisedwan, wa kanying wa emerod, 20 wa katan wa sardonik, wa musamban wa sardwan, wa sambwad wa krizolit, wa chinan wa beril, wa chidivu wa topaz, wa dikum wa krizopraz, wa dikum ni umwing (11) wa yasent, wa dikum ni yaad (12) wa ametist. 21 Chikwau kand, yis dikum ni yaad (12) yading ya usang dikum ni yaad (12); chis ni chis achisala nich usang umwing. Ni njil yijim ya musumb yading ya utad wa or muwamp, mud dikalash da zwang.

22 Namanapamu tempel, mulong Yehova* Nzamb Mwin Dikand Dawonsu ndiy tempel wa musumb, pamwing ni Mwan a Mukoku. 23 Ni musumb wadingap ukweta kuswir kwa muten ap kwa ngond mulong wa kumunyikamu, mulong uyaj wa Nzamb wawiy umunyikinamu, ni lamp wend ndiy Mwan a Mukoku. 24 Chad antu a michid akez kwendin mu chitokish cha musumb winou, ni ant a pa divu akez kuletamu uyaj wau. 25 Yis ya musumb winou kakez kayifungap ap pakemp muten, mulong mwinamwa mukez kwikalap uchuku. 26 Ni akez kuletamu uyaj ni kalimish ka antu a michid. 27 Pakwez chom chawonsu chijondila ni muntu mwawonsu usadina yom yitakanena ni mukamakasu kakez kandamapamu ap pakemp; ching kusu antu afundinau majin mu muvungur wa mwom wa Mwan a Mukoku awiy akwandamamu.

22 Chad mwangel wanleja kawit wa mem ma mwom, wa zwang,* wading ubudikina ku ditand da Nzamb ni da Mwan a Mukoku 2 ni wading usutidin pakach ni pakach pa njil yijim ya musumb. Ku mutambu ni mutambu wa kawit, kwading mitond ya mwom yasongang mabuj tupamp dikum ni yaad (12) pa muvu, yasongang mabuj ngond ni ngond. Ni mayij ma mitond yiney mading ma kuyok nich antu a michid.

3 Ni kwikil chom ap muntu ukuyindamishau mu musumb. Pakwez ditand da Nzamb ni da Mwan a Mukoku dikwikal mwinimwa, ni atushalapol end akumusadin mudimu utumbila; 4 awiy akuman chifu chend, ni dijin dend dikwikal pa jimpal jau. 5 Chikwau kand, kukwikalap uchuku ap pakemp, ni kakwikalap nich kuswir kwa chitokish cha lamp ap cha muten, mulong Yehova* Nzamb ukuyimunyikin chitokish chend, ni akuyikel chikupu ni chikupu.

6 Wanleja anch: “Mazu minam mad ma kuchingejin* ni makin; mwaning, Yehova,* Nzamb wayipepila aprofet, wamutumin mwangel wend mulong wa kuyilej atushalapol end yom yifanyidina kushiken piswimp ap. 7 Tesh! Nezin pakad kulab. Wayuk kwend muntu uziyidina ku mazu ma uprofet wa muvungur winou.”

8 Inge, am Yohan, yam natesha ni kuman yom yiney. Panayitesha ni kuyiman, nawila ku mend ma mwangel wanleja yom yiney mulong wa kumwifukwil. 9 Pakwez wangela anch: “Babal! Kangal wasal mwamu! Niyam nid kwam mbay ney musuk ni mbay wa akadivar ney aprofet ni wa antu aziyidina ku mazu ma muvungur winou. Mwifukwila Nzamb.”

10 Wanleja kand anch: “Kangal wajindjik* mazu ma uprofet wa muvungur winou, mulong chisu chatenchikau kal chid piswimp. 11 Muntu wakad kutentam adandamen kulik kutentam, ni muntu wijondila adandamen kwend kwijond; pakwez muntu utentamina adandamen mu kutentam, ni muntu utumbila adandamen kwikal utumbila.

12 “ ‘Tesh! Nezin pakad kulab, ni nikwet difut nipanina mulong wa kumufut muntu mwawonsu kukwatijan ni yisal yend. 13 Yam Alfa ni Omega,* wa kusambish ni wa nsuden, disambishil ni disuden. 14 Ayuk kwau antu atutina ankandj au alemp, chakwel ikal ni mbil ya kuya ku mitond ya mwom ni chakwel atwish kwandam mu musumb kusutin yis yend. 15 Pol pa musumb pad atubu,* antu akata kusal yom ya ayilembil, akata kusal yisal ya masandj,* in kujipan, in kwifukwil atupwany, ni muntu mwawonsu ukatina makasu ni ukata kudimban.’

16 “ ‘Yam Yesu, natuma mwangel wam mulong wa kupan uman kud en piur pa yom yiney ku yikumangen. Yam muj ni mwan wa* David ni katumbu wa pamanch* uzazina.’ ”

17 Chad spiritu ni ngachik adandamedin kulond anch: “Ez!” ni muntu mwawonsu uteshina alond anch: “Ez!” ni muntu mwawonsu wovila impu eza; muntu mwawonsu ukatina atambul chamwamu* mem ma mwom.

18 “Nimulejin muntu mwawonsu uteshina mazu ma uprofet wa muvungur winou anch: Anch muntu wawejaku chom ku yom yiney, Nzamb ukumuwejin niyend yipupu yifundinau mu muvungur winou; 19 ni anch muntu wadoshaku chom ku mazu ma muvungur wa uprofet winou, Nzamb ukumukangesh kuda mabuj ma mitond ya mwom ni kwandam mu musumb utumbila, yom yifundinau mu muvungur winou.

20 “Muntu ulejena yom yiney ulondin anch: ‘Chakin, nezin pakad kulab.’ ”

“Amen! Ez, Nsalejam Yesu.”

21 El ranaken rijim ra Nsalejetu Yesu rikal nau antu atumbila.