Mband Mwin Yuda Urumburil Mulong Wak Washinshikina Kand Ritiy Rend

Tulejap amboku piur pa mashakamin mey kudiosh ku wanikanch.

Navadika mu muvu wa 1979 mu États-Unis. Pinawanyisha mivu yisatu, anvajam ajipa uruu. Maku wanlila kukwatijan ni yishankur ya in Yuda ni wantuma kwilejin ku yeshivas, mashikol ma in Yuda. Pinawanyisha mivu 7, twaya kushakam mu Isarel, twasalaku muvu umwing, ni nilejina ku shikol yading mu mukal watazukangau anch Kibuzi, mwading andim nakash. Kupwa am ni Maku twaya kushakam mu Mexik.

Ap anch ndond twading tushicha mwadingap sinagog, pakwez nadandamena kulimish yishankur yam ya in Yuda. Nakishang mabuji dichuku dia Sabat, natangang Torah, ni nalembilang mu kusadin siddur, buku wetu wa malembil. Ku shikol, nayilejang chisu chawonsu arund nam anch relijon wetu ndiy relijon wa kusambish kamu. Nading kand kal nitangap buku utazikinau anch Manswik Masu, wisambidina nakash piur pa mudimu ni mafundish ma Yesu Kristu. Maku wankangesha kusal mwamu, chakwel kangal mafundish minam mayipisha manangu mam.

Chad mulong wak wakwata mupak wa kutang Manswik Masu?

Pinawanyisha mivu 17, nachirika mu États-Unis mulong wa kupwish shikol. Kwinakwa, muntu umwing nading nijikijadina nend walondang anch ud mwin Kristu, wanleja anch mwom wam ukurumburikap anch nimwijap Yesu.

Namwakula anch: “Antu amwitiyijina Yesu ashadikin kal.”

Ndiy wangipula anch: “Ov, watanginap kal Manswik Masu?”

Namwakula anch “Bwat.”

Chad walonda anch: “Anch chid mwamu, umenap kwey anch chidiap cha manangu kulond piur pa chom kanang chiwakad kwijik nawamp?”

Mazu mend manpukuna nakash, mulong am amwinam nading nij anch ud usup kulet yitongijok piur pa chom wakad kwijik kamu nawamp. Nasenda Bibil wend ni nasambisha kutang Manswik Masu.

Yom watanga yikala ni usu ik pad ey?

Nashimwoka nakash pinajingunina anch in kufund Manswik Masu ading in Yuda. Kupwa, pinadandamena kutang nakash, najingunina anch Yesu wading mwin Yuda muwamp ni wikepishina wading ukatina kuyikwash antu, kayisalangap uyimp. Naya ni ku bibliyotek ni nasenda mabuku mading misambidina piur pend. Pakwez kwikil ap buku umwing wanginkisha kashinsh anch ndiy wading Mesia. Makwau mading makat kulejan anch ndiy udia Nzamb​—ni chitongijok chinech chadingap kamu chovikena mu manangu mam. Anch chid mwamu, ing Yesu wamulembilang nany​—ov, wilembilang amwinend? Chikwau kand, Yesu wafa. Pakwez, Bibil ulondin piur pa Nzamb anch: “Ushiching chikupu.”a

Mutapu ik watana yakul ku yipul yiney?

Uyakin ukatap kupwitamijan, chawiy nakwata mupak wa kwijik uyakin. Nich mansoj ku mes, namulembila Nzamb nich win kashinsh​—kapamp ka kusambish kusal mwamu pakad kusadin siddur. Kupwa kamu kwa kupwish kulembil, akokala ku chis. Atuman a Yehova aad amband eza. Anginkisha mukand wau umwing wa kwilej nich Bibil. Mukand winou pamwing ni yom twambamba nau Atuman a Yehova, yanginkisha kamu kashinsh anch yitiyij yau yimedin pa Bibil. Chilakej, Atuman a Yehova itiyijin anch Yesu kadiap mu Usatu, pakwez ud “Mwan a Nzamb”b ni “disambishil dia yitang ya Nzamb.”c

Kupwa kwa chisu chikemp, nachirika ku Mexik ni nadandamena kwilej uprofet piur pa Mesia nau Atuman. Nashimwoka nakash pa kuman anch kud mauprofet mavud nakash piur pend! Pakwez, nidjidjekaku mu chisu kanang. Niyipula anch: ‘Ov, Yesu ndiy kwend muntu umwing wawanyisha uprofet winou?’ ni ‘Ing anch wading kwend muntu wasadinau mulong wa kusengan pa ndond yiney mud Mesia?’

Chad yom ik yakwinkisha kashinsh?

Atuman anleja mauprofet makad muntu kutwish kudimben. Chilakej, kurutu kwa mivu 700, muprofet Mike walonda anch Mesia wafanyina kuvadikin mu ul wa Betlehem mu Yudeya.d Kwikil muntu ukutwisha kukwat mupak piur pa ndond yikuvadikinay. Isay ndiy wasambela kulejan anch Mesia akez kamujip mud mpopol, pakwez akez kamujik nau ampich.e Yom yawonsu yiney yasambelau kulejan yawanyina pad Yesu.

Chom cha nsudiel changikisha kashinsh chading piur pa angakend a Yesu. Bibil ulondin anch Mesia wafanyina kuvadikin mu dijuku dia Mwant David.f Mulong in Yuda a pasak alamang ma list ma majuku mau ayinau ni mading mijiken kud antu awonsu, anch Yesu kavadikinap mu dijuku dia David, ing akankuny nend alejana chom chinech patok! Pakwez katwishap kusal mwamu, mulong kwadingap muntu ukutwisha kutadik anch Yesu kadingap wa mu dijuku dia David. Kulond kushal kwinyim, yisak ya antu avud amutazukang Yesu anch “Mwan a David.”g

Mu muvu wa 70 C.C.​—mivu 37 kupwa kwa rufu ra Yesu—​amasalay in Rom ashesha musumb wa Yerusalem, ni malist mamekeshina majuku mashadika ap masheshika. Chawiy, chakwel antu atwisha kujingunin dijuku diend, Mesia wafanyina kumekan kurutu kwa muvu wa 70 C.C.

Yom yiney yakushikija kwikal ni kashinsh ik?

Kuvurik Yijil 18:18, 19 wasambela kulejan anch Nzamb wafanyina kulangwish mu Isarel muprofet mud Moses. Nzamb amwinend walonda anch muntu mwawonsu “ukeza kalik kutesh mazu mam makalonday muruu mu dijin diam, chad yam amwinam nikeza kamwipulam muntu winou.” Kwilej Bibil mwawonsu chikurikina kwankwasha kwikal kamu nich kashinsh anch Yesu wa ku Nazaret ndiy wading muprofet winou.