Mazu ma Nsambishil

“Am napamina mu ul ukemp mu provens wa kwimpat,” Dauda wa ku Sierra Leone ulondil. “Dichuku dimwing, panadinga mwan mukemp, kwikalaku matend piur pa divu pakach pa dijuku diam ni dijuku dikwau. Mawonsu matendinanga divu dimwing. Mulong wa kupwish ntad, amutazuka ngang umwing. Ndiy wamwinka ikundj mukwau chintadin, chad wamubwika malakany. Kusut kwa chisu chikemp ikundj wa mwishin mwa malakany wasambisha kuzalzal ni kusuril. Patalangay mu chintadin, wabaroka: ‘Nimumen ikundj umwing ipal ukat kushejin piswimp! Udjit yidjal yitok. Udi mulemp ni kakulakaj, mwin jimvu ni ukat kwend kwa kuzengamzengam.’

“Wadinga ni kurumburil Ngak’ikundj! Chad wikala mwin kukwachik kurumbangan ni kubarok: ‘Ang witiyinanyip yinilondila, ezany wimenany ayinen!’ Chakin, ap muntu umwing pakach petu kadingap ni muchim ukash wa kutal! Ngang wamudutisha ndiy kwa kumuzizin nsompu ja mayij ni mem, nsompu jasendinangay mu katay.

“Kwa kulondilang kusutin sakadikalash, ‘Ngak’ikundj’ wakatula anch divu didi dia dijuku dietu. Wamuleja ngak mband anch ufanyidin kudim pakad chakamish. Dijuku dikwau ditiya dirumburish diend. Mulong aukatula.”

Yishimu mud yiney yimekening nakash ku Afrik wa ku rand. Kunoku, mud kand ku mitambu yikwau ya mangand, tutu twa antu akat kwitiyinang anch afu akat kuyang mwi ngand ya aspiritu, mu yin ngand ey akutwish kuman ni kutakel miom ya antu a panap pansh. Ov ritiyin riner rid rakin? Ov chakin afu adiku aom? Ang bwat, a nnany akata kudimban kwikal mud aspiritu a afu? Kwijikang yakul ya kashinsh ku yin yipul ey kupandiken usey. Udi mulong wa kufa ni kupand.