Kwisu Kuyila Mangand Minam?

Milong yikash ni yishiken yiyimp nakash yikadil kal jinsangu ja pichuku-pichuku kwawonsu mu mangand! Ov yirumburikin ik?

DIKING DIA MUNTU PA REND: Mabomb makat kubarikin mu yiku. Akat kuyilozin alej ni ansand a shikol ku shikol. Akat kuyikam an twimpang ni kuyitwal kwindjing anch anvajau kwikil. Amband ni amapal akat kuyipurumukin ni kuyiy mukach mwa muten.

MWIKADIL WA RELIJON: Megliz makwashin yisak yasina njit. Amakurump a yikumbu ya winzamb ayifishin nich mulong wa chisend chikwetau cha Kunongish kwa kabil ap muchid. Amwimpel akat kuyisadil ansand ni ayangadim mu usund wau; ni egliz ukat kubwik kwend mes. Antu avud alikin kuya ni kukumangan; ni yikumbu ya winzamb akat kuyilandish.

NDOND TUSHICHA: Matikit akat kumakatul mitond mulong wa wingend-a-mushing. Ndond ja masang ap matikit jashadil kal zwang-zwang-zwang kud atuzweny mu kukimb kwa ukwash. Mem amayipishin kal, kimawapinap kand kuna. Yishoshot ya mu yapu ni mitapu yikwau ya kukwat ansh yiyisheshin nakash. Rinkind wa kupim amuyipishin kal.

KUTAN UKWASH WA MWOM: Mu jingand ja Afrik jidia kurul kwa Sahara akat kumufut muntu piswimp $480 (U.S.) pa muvu. Amakurump a yapu in ris akat kuwish yapu, ni kusha tutikit twa antu pakad mudimu wa kusal. Wij usadil anch antu ashadisha nfalang jilaminau chisu chisadilau mudimu mu mwom wau.

KUKEP KWA YAKUDIA: Piswimp antu 800 000 000 mu mangand alel ni nzal.

NJIT: Antu 100 000 000 ni kusut ashadishin mwom wau mulong wa njit mu chitot cha 20 cha mivu. Kudi mat ma nikleyer mavud makutwisha kujiyish muchid wa muntu tupamp tuvud. Njit ja an-a-ngand. Kuyizadish antu wom wa rufu kwapalangen kal nakash mu mangand mawonsu.

CHIPUPU NI MAYEJ MAKWAU: Kudiosh mu muvu wa 1918, musong wa mashik wa Espagne wajipa antu 21 000 000. SIDA wikadil kal katat “musong ukash ujiyishina antu mu rusangu ra muntu.” Musong wa ruvundish (cancer) ni mayej ma rudung yiletin runeng mu mangand mawonsu.

Kangal kwimanyin ching kusu pa jinsangu jinej ja katat. Ov yidi kwau yishiken ya mwamu? Ap yidi chikunku cha yishiken yikweta dirumburik diakin kamu?

[Kamushet/Chipich chidia pa paj wa 5]

Ov Chakin Kamu Nzamb Ukat Kutubangin?

Chinenganenau mulong wa yishiken ya ushon ap mulong wa kufa kwa muntu, antu avud akat kwiyipul mulong wak Nzamb kakatap kukangesh yom yiney kusadik.

Chakin kamu Nzamb ukat kutubangin. Uletin umutakel wakin ni ukwash wakin katat. (Mateu 11:​28-30; 2 Timote 3:​16, 17) Wasala kal yitenchik chakwel kupwish rawonsu chisum, mayej ni rufu. Yitenchik yend yimekeshin anch kabangidinap ching kusu antu a muchid umwing pakwez antu a michid yin yawonsu, a tubil twawonsu, ni a jindim jawonsu.​—⁠Midimu 10:​34, 35.

Mu chilik ik tukata kubangin rusot ra Nzamb? Ov umwij Sakatang wa diur ni divu? Dijin diend nany? Rutong rend ridi risu? Ndiy wakwil ku yipul yiney mu Bibil. Mwawiy mutulejinay yikusalay chakwel kupwish chisum, mayej ni rufu. Chakwel anch tutaninamu ukwash, ov chom ik chitinau ku mutambu wetu? Tuswiridin kwilej piur pend ni rutong rend. Mutapu ik tukutwisha kuchingejin kwisakin mu yitenchik yend pakad kutek ritiy mudiay ndiy? (Yohan 3:16; Hebereu 11:⁠6) Chidi kand cha usey kuziyin ku yom yitinay. (1 Yohan 5:⁠3) Ov ukat kubangin nakash kusal mwamu?

Chakwel kutesh kurumburik kwa mulong ulikidinay Nzamb mikadil ya katat, tufanyidin kutesh mulong umwing wa usey nakash. Bibil urumburil mulong winou. Pa paj wa 15 wa mukand winou, ukutwish kwilej mutapu udia mulong winou.