Kwisu Kuyila Mwom Wey?

• Antu avud iyandjikin nakash mu milong ya kukimb mwom wa pichuku-pichuku ni kwitekin kachisu kakemp ka kutongin kwisu kuyilau.

• Bibil utulejin piur pa yishiken yipandakena kuwap yidia kurutu. Ukat kutubabesh kand anch kukwikal kukarumuk kukash kurutu oku mu yitenchik ya muntu pa mangand mawonsu. Chakwel twisakina ni kwiyep ubaj, tufanyidin kukwat mupak swa.

• Kudi antu amwing ija yilondila Bibil ni akat kupakish kuyisadil pakwez akat kushil ndond yakamish ya mwom yiyibachika mu kusal yom yiyimp.

• Ov usanger mutapu uyila mwom wey? Anch watenchik midimu ya kusal, ov ukat kutongin mutapu yikutwisha kwikal nich usu pa jintong jey ja chikupu mu mwom wey?

[Kamushet/Yipich chidia pa paj wa 9]

Chom Ik Chipandakena Usey Kud Ey?

Ov mutapu ik ukutwisha kulejan usey wa yom yilondwila ey? Yiteka nimero.

Yom yiney yivud yikwet ndond yifanyidina mu mwom, pakwez piufanyidina kutond, chisu chidinga cha kusambish? cha kaad? ni yikwau.

․․․ Kwipuwangesh/kwiswedish

․․․ Mudimu wam

․․․ Ukash wa mujimbu wam

․․․ Musangar wam

․․․ Mwin kwol kwam

․․․ Anvaj am

․․․ An am

․․․ Chikumbu cha ufun, masun mawamp

․․․ Kwikal wa kusambish mu yom yawonsu nisadila

․․․ Kumwifukwil Nzamb

[Kamushet kadia pa paj wa 10]

Ov Kutond Kwey Kukutwadil ku Usotila Chakin Kuya?

SHINSHIKIN YOM EY

KWIPUWANGESH/KWISWEDISH: Ov kutond kwam kwa kwiswedish kukat kwinkasikesh? Ov kukat kulet yovil yikash yikutwisha kutek ukash wa mujimbu wam mu chak ap kwinletin ulim mu mwom? Ov udi mulad wa “masengan” ukweta yovil yikash ya musangar mu asaa akemp pakwez ukutwisha kulet ushon machuku mavud? Ap anch kwipwish usweral kunitondina kufanyidin, ov nikat kusutish chisu chilemp mu chilik chakwel anch nikat kuburen chisu cha kusal yom ya usey nakash?

MUDIMU WAM: Ov ukat kukwash mud mutapu wa kumenaku maswir ma mwom, ap anch nidi chakin muswik wa mudimu? Ov mudimu wam witin chisu chivud ni usu uvud mu chilik chakwel anch ukash wa mujimbu wam udi mu chak? Ov nisotil kuwejinaku kand chisu cha piur ku mudimu wam ap anch nisotil kusutishap chisu ni mwin kwol kwam ap ni an am? Anch mukurump wam wa mudimu wangit kusal mudimu ujondishina kom kam ap usadila anch ukwata pa yisu ya yisakin ya muspiritu, ov nikusal mudimu winou chakwel kulam mudimu wam?

UKASH WA MUJIMBU WAM: Ov niumen kwikal chom chamwamu, ap anch nikat kushinshikin chakwel kuulam nawamp? Ov usendin chikunku chilemp mu minsamb yam? Ov mutapu niushinshikidina umekeshin kubangin kwa dijuku diam?

MUSANGAR WAM: Ov chidi chom cham cha kusambish kubangin? Ov niutekin pa ndond ya kusambish kupandakan musangar wa mwin kwol kwam ap wa dijuku diam? Ov mutapu niukimbina wambaten nich difukwil dia Nzamb wakin?

MWIN KWOL KWAM: Ov nimumening mwin kwol kwam mud murund nam ching kusu pa chisu cha kwisangaresh mulong wa kupwish maku mam? Ov nikat kumusadil mwin kwol kwam nich kalimish, mud muntu ufanyidina kalimish? Ov ritiy mudiay Nzamb rikwet usu pa mutapu nikata kumusadil mwin kwol kwam?

ANVAJ AM: Ang uchidi mwanikanch, ov nikat kuyiziyil anvaj am​—⁠kuyakul nich kalimish, kusal mudimu wingikishinau, kwez ku chikumbu pa chisu chitinau, kwipuk arund ni mijikit yilikinau? Anch udi muntu mukurump, ov nikat kuyitesh anvaj am nich kalimish, kuyinkish ukwash ufanyidina pa chisu chiswiridinau? Ov mutapu nishicha nau udi utakedilau kusutil ku yom nikweta ap udi kusutil ku chiyul cha Dizu dia Nzamb?

AN AM: Ov niyovil anch nikwet chisend cha kuyifundish usey wa ngikadil yiwamp, ap anch nikat kuchingejin anch shikol yikuyifundish? Ov nikat kusutish chisu pamwing ni an am, ap anch nikat kuchingejin anch akusutishil chisu ku yom ya kusengan nich, televizion ap ordinater? Ov nikat kuyipup chisu ni chisu anch asal yakad kufanyin nich yijil ya Nzamb, ap anch nikat kuyipup ching anch najimanang kal?

CHIKUMBU CHA UFUN, MASUN MAWAMP: Kubangin kwam nikata kubangin kumekan kwa mujimbu wam ni yom yam​—⁠kumekeshin ik pa chitongijok nichingejina kuyinkish amutej nam? wimpich wa dijiku diam? ov kumekeshin anch nidi mwin kumwifukwil Nzamb?

KWIKAL WA KUSAMBISH MU YOM YAWONSU NISADILA: Ov nitongin anch chidi cha usey kusal yom nich utatombu? Ov nikat kwikasikesh kwikal wa kusambish? Ov nikat kwovang fu ku muchim anch muntu mukwau wasal chom chipandakena kuwap?

KUMWIFUKWIL NZAMB: Ov kwitiyik kud Nzamb kudi kwa usey nakash kud am kupandakanamu kwitiyik kud mwin kwol kwam, kud an am, kud anvaj am, ap kud mukurump wam wa mudimu? Chakwel anch nikal nich mashakamin mawamp ma mwom, ov chiwapidil anch niteka mudimu wa Nzamb pa ndond ya kaad?

SHINSHIKIN NAWAMP CHIYUL CHA BIBIL

Ndond ik yikwetay Nzamb mu mwom wey?

Mulej 12:13: “Mwova Nzamb wakin wom, ni lam yijil yend. Mulong wawiy mudimu wawonsu wa muntu.”

IYIPULA: Ov mwom wam umekeshin anch nimen yom mu mutapu winou? Ov kuziyil ku yijil ya Nzamb kumekeshin mutapu nibangidina yisend yam ku chikumbu, ku mudimu, ap ku shikol? Ap kand, ov yisakin yikwau ap yakamish ya mwom yimekeshin anch nikat kwitekin chisu mulong wa Nzamb?

Urund wa mutapu ik ukweta ni Nzamb?

Jinswir 3:​5, 6: “Mukungamena [Yehova NW] ni muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi ndiy, ni ndiy ukez katenchik jinjil jey.”

Mateu 4:10: ‘Chifanyidin kumwifukwil Yehova Nzamb wey, ni kumusadil ndiy kusu.’

IYIPULA: Ov wawiy mutapu nikata kwiyov piur pa Nzamb? Ov midimu yam ya pichuku-pichuku, ni mutapu nikata kupwish yikokujol yam, yimekeshin kuchingej ni kwipan kwinoku?

Ov kutang ni kwilej Bibil kukwet usey ik kud ey?

Yohan 17:3: “Antu akwikal nich mwom wa chikupu anch akwijik ey Nzamb wakin, ni kumwijik Yesu Kristu watuma ey.”

IYIPULA: Ov usey nitekina ku kutang Dizu dia Nzamb ni kuditongijokin nakash kumekeshin anch nitiyijin chinech?

Kukumangan ku yikumangan ya chikumangen cha Ukristu kukwet usey ik kud ey?

Hebereu 10:​24, 25, MM: “Tutalijanany muntu ni mukwau chakwel tukwashijanany kumekesh rukat ni kusal yisalijok yiwamp. Kangal twalikany chaku cha kukumangan pamwing, . . . mulong umenany anch, Dichuku dikurumburishay Nsalejetu dikat kusej piswimp.”

Kuseng 122:1: “Am nasangara panlejau anch, ‘Tuyany ku chikumbu cha Mwant Nzamb.’ ”

IYIPULA: Ov mwikadil wa mwom wam umekeshin kusanger kwa umutakel winou udia mu Dizu dia Nzamb? Ngond wasutina ou, ov naburedin chikumangan cha Ukristu ap chimwing mulong nalikin chom chikwau chikal pa ndond ya kusambish?

Ov ukwet mushiku mu kuyilej antu akwau piur pa Nzamb ni kushilamu kwend?

Mateu 24:​14, MM: “Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman . . . , chad lel disudiel dia mangand dieza.”

Mateu 28:​19, 20: “Chawiy en yangany kwen ku michid yawonsu uyikadishany in kwilej, . . . uyilejany kusal yom yawonsu yinakulejanya en.”

Kuseng 96:2: “Muwangilany Yehova, shimanany dijin diend. Lejanany pichuku ni pichuku [rusangu ruwamp  NW] ra dipandish diend.”

IYIPULA: Ov chakin kamu mudimu winou ukwet ndond yifanyidina mu mwom wam? Kusadil kwam mu mudimu winou kumekeshin kwitiyij kwam kashinsh ka yisu mutushicha?