Mulong Wak In Kwilej A Yesu Kajidinap Yakudia?

Yohan Mubatish amuteka mu rukan machuku makemp kupwa kwa Yesu kusal musambu wa Pasak wa muvu wa 30 C.C. Yohan wakata anch in kwilejend amulondula Yesu, pakwez angond alondulaku kupwa kwa kumutek Yohan mu rukan, kadiap awonsu amulondula Yesu.

Katat paseja piswimp chisu cha kusal musambu wa Pasak mu muvu wa 31 C.C. in kwilej amwing a Yohan eza kumwipul Yesu anch: “Ov, mulong wak etu nau Afaris tukat kujil yakudia tupamp tuvud, pakwez in kwilejey kakujilangap yakudia?” (Mateu 9:14) Afaris amananga anch kujil yakudia chading chinshankur cha relijon. Chawiy, Yesu wasadina chilakej chimwing cha Mufaris witongina anch wading utentamin padingay ni kulembil anch: “Nzamb, nakujikitish kinidiap mudi antu akwau. . . Nikat kujilang yakudia tupamp twaad pa rubing.” (Luka 18:11, 12, TMK) Chimeken anch in kwilej a Yohan niyawiy ading ni chinshankur chinech cha kujilang yakudia. Pamwing ap ajila yakudia mulong wa kumekesh runeng rau chisu chamutekau Yohan mu rukan. Pakwez, antu akwau iyipula anch mulong wak in kwilej a Yesu kajidinap yakudia, pamwing ap mulong wa kumekesh niyawiy ushon wau piur pa yom yamusalau Yohan.

Yesu wayakula mu kusadin chilakej ech: “Ov, utongilany anch [arund] atazukinau ku musambu wa uruw akutwish kwov ushon pachidiau nend ngatan pamwing? Bwat, chikasiken! Pakwez dichuku dikez kushik dikez kumudioshau ngatan pakach pau, chad awiy akez kujil yakudia.”—Mateu 9:15.

Yohan walonda anch Yesu wading mudi ngatan. (Yohan 3:28, 29) Chakin kamu, padingay Yesu kandikal afa in kwilejend kajilangap yakudia. Pakwez, pafay Yesu, in kwilejend adila ni ajila yakudia mulong wa ushon. Yom yiney yaswimpa chisu chavumbukay Yesu! Chawiy, awiy kafanyinap kand kujil yakudia mulong wa kumekesh runeng rau.

Kupwa, Yesu wasadina kand yilakej yaad yilondina anch: “Kwikil muntu ukata kuchimin chibel chisu pa [disun] dikur. Anch wasal mwamu, chibel chisu chikwipwit, chapwish [disun ] dikur, chad dipan dikupandakan kujimb. Chawiy chimwing kand, kwikil muntu ukuteka maar ma nviny masu mu jinsab jikur ja yikit. Anch wasal mwamu, maar ma nviny masu makubuz jinsab jinej, chawiy maar masu makwichikin pansh, ni yikit yikusheshik. Pakwez maar ma nviny masu mafanyidin kumalong mu jinsab jisu ja yikit.” (Mateu 9:16, 17) Yom ik yakimbay kulond Yesu?

Yesu wayikwasha in kwilej a Yohan Mubatish ijika anch kwikil muntu ukweta mbil ya kuyishinshikin in kwilej a Yesu chakwel alondula yisal ya yinshankur yatekau in Yuda a pasak mudi kujil yakudia. Chawiy, Yesu kezap mulong wa kutenchik ni kudandamen nich mitapu yikur ya kwifukwil yadinga piswimp ni kujiy. Difukwil diakasikeshinay Yesu didiap difukwil dikwatijadina ni yinshankur ya in Yuda a pasak yatekau kudi antu. Yesu kapakishap ap pakemp kusal mudi utekin chibel chisu pa disun dikur ap kutek maar ma nviny masu mwi nsab ya chikit chikur.