Ukwet Usu Kuyisutamu Ayilembil

Pashikau in kwilej ku chikumu kupwa kwa kupand pakimbau kujiy mu karung, ading ovil wom nakash mulong wa yom yayishikenang. Antu aad in chisum nakash adinga nich usu wa ayilembil, adiokala mu jinzay jadinga piswimp ni eza mau kurutu kwa Yesu! Umwing wa antu inay, ndiy wading wovishena wom nakash, mulong wading mwin chisum nakash ni ading amutakedin kudi ayilembil mu mivu yivud nakash.

Muntu winou mwin chisum nakash wading kwendol wa kanzikis. Uchuku ni muten “wading ni kwendangan mu [jinzay] ni pa mikandu. Wading ni kwisupol ku mayal.” (Marko 5:5) Wading mudi nnam wa chidiany wovangau wom nakash kudi antu pa kusut mwinjil. Antu amwing apakisha kumukas moj ni miyolal, pakwez wakatwola miyolal yamukasau ku mend ni ku makas. Kwikil muntu ap umwing wadinga ni usu wa kurish nend.

Pasejay muntu winou ni paway ku mend ma Yesu, ayilembil ading amuyikedina amubachika kutoy anch: “Yesu, Mwan a Nzamb Upandakena Piur pa yawonsu, ov, mulong ik ukweta ni yamam? Nakwilembil mu dijin dia Nzamb, kangal wanmesh mar!” Chawiy, Yesu wamekesha anch ukwet usu kuyisutamu ayilembil pamulejay anch: “Ey, chilembil muyimp, mudiokala [muntu] winou.”—Marko 5:7, 8.

Chimeken patok anch, muntu winou wading ni ayilembil avud. Chawiy, Yesu wamwipula anch: “Dijin diey nany?” chad wamwakula anch: “Dijin diam Legion, mulong tudi avud.” (Marko 5:9, TMK) Chisak cha Legion cha in Rom chading ni yitot ya amasalay; chawiy, ayilembil avud amuyikela muntu winou mulong wa kumumesh mar. Chawiy chamwilembilau Yesu anch “kangal watulej kuya mu dibuku diakad musul.” Chimeken anch ayilembil inay ading ij dirumburish diading diyichingedina pamwing ni mukurump wau Satan.—Luka 8:31.

Kwading ayibond uvud 2000 ading ni kudia piswimp ni mwi kurumbuk, annam inay ading ijondila kukwatijan nich Chijil, chawiy in Yuda kafanyinap kuyipitin annam inay mu musumb. Ayilembil alonda anch: “Tutwala kwetu mu ayibond chakwel tukayandama mu kach.” (Marko 5:12, TMK) Chawiy, Yesu wayileja ayilembil inay kuya kwandam mu ayibond. Pa chisu chinicha ayibond awonsu uvud wa 2000 atombuka ni aya mau awonsu idjibwil mu karung.

Pamanau antu ading ni kulam ayibond inay yom yiney, awiy aya kulejan rusangu riner pakad kulab mu musumb ni mu mal. Chawiy, antu eza mau chakwel amana yom yasadikang. Pashikau antu inay, amumana muntu wading ni ayilembil wayerikang kal ni ulondin katat nawamp. Chading chom chishimokishina mudi ik pamutanau muntu winou udjit masun ni ushich ku mend ma Yesu!

Antu atesha rusangu riner ap amumana muntu winou ova wom nakash ni kateshap kurumburik kwa yom yiney yamushikenang muntu winou. Chawiy amuleja Yesu kapamp kamwing chakwel adiokala mwi ngand yau. Pandamay Yesu mu waat chakwel aya, muntu winou wadioshau ayilembil wamwilembila Yesu chakwel aya nend pamwing. Pakwez, Yesu wamuleja muntu winou anch: “Chirik kwol kwey, ukayilej anamakwey yom yakusadilay kal [Yehova] ni mutapu wakwovilay kal ey riy.”—Marko 5:19.

Yisu yivud Yesu wading ni kuyilej antu awonsu okangay chakwel kangal ayilejamu antu akwau, kakatap anch antu amwitiyija kusutil kusu ku jinsangu jikuteshau kudi antu akwau. Pakwez, pa chisu chinicha, muntu wadioshau ayilembil wimenap amwinend usu wadingay nich Yesu ni watwisha kuyilejamu antu akwau aburena mutapu wa kumanijan ni Yesu. Uman wend wafanyina kumekesh patok jinsangu jamakasu japalangana piur pa kushadik kwa ayibond. Chawiy, muntu winou waya kulejan mu Dekapol mwawonsu yom yamusadinau kudi Yesu.