Ku Chikumu Cha Karung Wa Galalia

Urel wa nsudien wadingay pamwing ni atwimbuy end, Yesu wayileja anch: “Pinikeza kuvumbuk kwikal kand mwom, nikez kutakelaku kuya ku Galalia.” (Mateu 26:32; 28:7, 10) Chawiy in kwilej avud asambisha kuya ku Galalia, ni yom ik yayau kusal?

Chawiy Pita wayileja in kwilej akwau musamban anch: “Am naya kal ni kuta ansh.” In kwilej akwau musamban amwakula anch: “Niyetu tusotil tuya ney.” (Yohan 21:3) Uchuku wakabuj kakwatap insh ap umwing. Piswimp ni kucha, Yesu wamekana ku chikumu, pakwez in kwilej kamwijikap. Yesu wayela anch: “Anen, ukwetanyap chakudia?” Awiy amwakula anch: “Bwat!” Yesu wayileja anch: “Djibwilany wand ku mutambu wa katatuku wa waat, chad ukukwatany ansh.” (Yohan 21:5, 6, TMK) Akwata ansh avud ni akanganya kuukak wand mulong wa miril ya ansh.

Yohan wamuleja Pita anch: “Komb, Nsalejetu!” (Yohan 21:7) Kapamp kamwing Pita wadjala kabwik wend wadjolay chisu chading chitilau ansh. Widjibwila pa karung ni wasambisha kwisay chintamp cha ametre 90 mulong wa kushik ku chikumu. In kwilej akwau ashala mu waat alondula pakemp pakemp pading pakakinau wand.

Pashikau ku chikumu, amana “kasu ka makal padi insh, amana kand [mukat].” Yesu wayileja anch: “Letanyap ansh amwing wakwatanya kal.” Pita wakaka wand wading ni ansh 153 ajim nakash mulong wa kuudiosh mu waat! Yesu walonda anch: “Ezany, udiany.” Kwikil mwin kwilej wend ap umwing wapakamu kumwipul anch: “Ov, yey nany?” mulong awonsu ading ij anch wading Yesu. (Yohan 21:10-12) Kinak kading kapamp ka chisatu kamekanay Yesu kudi in kwilejend.

Yesu wayinkisha muntu ni muntu chikunku cha mukat ni cha insh mulong wa kudia. Pading pashinshikidinau in kwilej pa ansh akwatau, Yesu wamwipula Pita anch: “Simon mwan wa Yohan, ey winkatin am kusutamu ay?” Ov, Pita wading ukatin nakash mudimu wend wa kuta ansh kusutamu mudimu wamwinkishau kudi Yesu kusal? Pita wamwakula anch: “Mwaning, Nsalejam, wijany anch nikukatilany.” Chawiy Yesu wamwela anch: ‘Yidisha an amikoku am.’—Yohan 21:15.

Yesu wamwipula kand kapamp ka kasatu anch: “Ov, Simon, mwan a Yohan, ey winkatil am?” Pamwing ap Pita washimoka chawiy chakulay anch: “Mwaning, Nsalejam, wijany anch nikukatilany.” Yesu wamwela kand anch: “Lam amikoku am [akemp].”—Yohan 21:16.

Yesu amwipula kand kapamp ka kasatu anch: “Ov, Simon, mwan a Yohan, ey winkatil am?” Katat Pita wiyipula pamwing ap anch Yesu widjidjekin mulong wa kushinshaman kwam. Pita wamwakula nich ushon anch: “Nsalejam, en yen wijanya yom yawonsu. En wijany kal anch, am nikukatilany.” Kapamp kakwau Yesu wakasikeshina pa yom yafanyinay Pita kusal pamulejay anch: “Yidisha an amikoku am [akemp].” (Yohan 21:17) Chakin kamu, antu akweta chisend cha kutakel mu chikumangen afanyidin kuyitek amikoku mu diyind dia Nzamb.

Yesu wading ni mushiku wa kuwanyish chisend chamwinkishau kusal kudi Nzamb. Katat umulejin Pita anch ukwikal ni chisend cha chilik chimwing. Yesu walonda anch: “Piwading nsangarum, wading ni kudjal amwiney, ni kuya kwawonsu kuusotila. Pakwez piukunanapa, ukez kwonan makas, chad muntu mukwau ukez kukukas ni kukutwal kuwakad ey kukat.” Chikwau kand Yesu wamukasikesha Pita anch: ‘Dandamen kwinlondul’—Yohan 21:18, 19.

Pita wamumana kambuy Yohan ni wamwipula anch: “Mwant, ing muntu ou ukez kusal nchik?” Chikwau kand yom ik yela kumushiken kambuy wading ukatinau nakash kudi Yesu? Yesu wakula anch: “Anch nisotil anch ndiy ashakam mwom djat ni pinikuchirikina, ov, [chikutadin] nchik ey?” (Yohan 21:21-23) Pita wafanyina kumulondul Yesu pakad kwinan piur pa yom yela kuyishiken antu akwau. Chawiy, Yesu wamekesha patok anch Yohan kakufap swa mudi atwimbuy akwau mulong Yesu ukez kumwinkish yishimushimu ya kwez kwa Yesu mu Want wend wa dikand.

Chakin kamu, kudi yom yivud yasalay Yesu kusutamu yom yafundau.