Mulong Wa Kumwimburij Yesu Ufanyidin Kwikal . . .

MWIN RANAKEN

Mulong wading muntu uwanyidina, Yesu kamanap mar mawonsu makata kuyishiken antu. Pakwez, wading uyovidin antu ranaken nakash. Wakata kwipan mulong wa kuyikwash ni kusal yom yawonsu yadingau nich kuswir. Chakin kamu, ranaken rend rawiy ramubachika ayikwasha antu akwau. Mwikadil winou awisambidin mu Shapitre wa 32, 37, 57, 99.

USWAPELA KUSEJIN

Antu a yimbu yawonsu—ansand ap amapal—iyova anch akutwish kumusejin Yesu mulong kimekeshap anch wading muntu ukwatikena nakash ap wa usey nakash kuyisutamu antu akwau. Antu inay asangera nakash untu wa Yesu, chawiy chasangerangau kwikal nend pamwing. Mulong wa kwijik yom yiney, tal Shapitre wa 25, 27, 95.

MWIN KULEMBIL

Yesu wambambanga yisu yivud ni Tatukwend mu malembil, ku ujindj ap padingay pamwing ni in kwifukwil akin. Ndiy walembilanga yisu yivud, kadiap ching kusu pa chisu cha kudia. Walembilang mulong wa kumujikitish Tatukwend, kumutumbish ni kwit ukwash kurutu akwata mipak ya usey. Yilakej yiney ayisambidin mu Shapitre wa 24, 34, 91, 122, 123.

MWIN KUPAN

Yisu yivud padingay nich kuswir kwa kupim ap kwa kwipuwangej, Yesu wadandamena kutek maswir ma antu akwau pa ndond ya kusambish. Kadingap ni mwikadil wa kutek maswir mend pa ndond ya kusambish. Pa mulong winou, ndiy watushila chilakej chiwamp tufanyidina kwimburij. Ukutwish kwilej mutapu wamekeshay chilakej chend chiwamp mu Shapitre wa 19, 41, 52.

MWIN KULIKISHIN

Yesu kalejanap kusu anch chifanyidin kulikishin—pakwez wamekesha amwinend chilakej cha kulikishin payilikishinangay in kwilejend ni antu akwau. Ukutwish kutongin pa yilakej yidia mu Shapitre wa 26, 40, 64, 85, 131.

MWIN MUSHIKU

Asambela kulejan anch in Yuda avud akez kumulik Mesia ni akankuny end akez kumujip. Chawiy, mulong wa yom yiney Yesu wafanyina kukepish mushiku wend mulong wa kuyikwash antu. Pakwez, ndiy wamekesha mushiku mu kuchidij difukwil diakin. Ndiy washa chilakej chiwamp cha kwikal in mushiku kudi in kwilej awonsu arishina nich yoziu ap azengodinau. Tal Shapitre wa 16, 72, 103.

MWIN KWIKEPISH

Yesu wading uyisutinamu antu akad kuwanyin mu mitapu yivud nakash, mudi kwikal ni ronganyin ap manangu. Kuwanyin kwend kwawiy kwamukwasha ikal ni ukash wa mujimbu uwanyidina ni ukaliweny uwanyidina wa kujingunin yom ya antu akwau adingay nend. Pakwez, wayisadinanga antu akwau nich kwikepish. Ukutwish kutan malejan ma kwikepish mu Shapitre wa 10, 62, 66, 94, 116.

MWIN KUSHIMPISH MUCHIM

Yesu wayimekeshina yisu yivud in kwilejend ni antu akwau kushimpish kwend kwa muchim chisu chakanganyau kumwimburij ni kusadin yom yayifundishay. Nich kushimpish muchim wachirikinang malejan ma usey mafanyina kuyikwash amusejina Yehova piswimp. Ukutwish kutan yilakej ya mwikadil winou mu Shapitre wa 74, 98, 118, 135.