Yijikish kud Atutum

IN KWAKAN In kwakan ayitekin mulong wa kukukwashany. Ovijanany nau nawamp amboku ni kulondul umutakel wau pa milong yitadina ndond ya kwimikin motak ni jinking, ndond ja kushakam antu, kulam yitwamu ni yom yikwau.

DIBATISH Ching anch kud umutakel ukwau, ndond ya antu akubatishau yifanyidin kwikal pantaliken ni chimet. Antu akubatishau afanyidin kushakam pa ndond yiney kurutu kwa diskur dia dibatish dikusadika Diampos pamanch. Muntu ni muntu ufanyidin kusend eswime ni masun mawanyidina ma kumubatish nich.

YIPAN Asadidin nfalang jivud mulong wa kurijek ndond ya kushakam yiwanyidina, yisaj ya mazu, yom ya kutadish nich mavideo ni midimu yikwau yivud yisadina anch kukumangan ku chitentam kwikala kwa musangar ni kutukwash chakwel tuseja piswimp ni Yehova. Yipan yen ya kwikatin yikwashining midimu yiney yitina nfalang ni yikwashin kand mudimu wa pa mangand mawonsu. Chakwel chikuswapela, atekin mishet mwi ndond ya chitentam mulong wa yipan. Ukutwish kand kupan kusutil internet anch wandam pa donate.jw.org. Yipan yawonsu ayisangaredin nakash. Chisak Chitakedila chikujikitishinany nakash mulong wa muchim wen wa kupan ukwash ku yisakin ya Want.

UKWASH WA UMWINGANG Ijikany amboku anch departema winou ud kwend wa ukwash wa swa-swa.

KUTAN YOM YISHADIKINA Yom yawonsu yikumanau pansh afanyidin kuyitwal ku Departema wa Kutan Yom Yishadikina. Anch washadish chom kanang, yang ku departema winou chakwel utala anch chom chey chidiaku. An ayila kulemp ni anvajau ni ashadikina afanyidin kuyitwal ku departema winou. Pakwez, mulong wa kwipuk kwiyakamish chamwamu, yilamany amboku anen ni shakamany nau pamwing.

NDOND YA KUSHAKAM Ufanyidin kuyitongin antu akwau. Vurik anch, ukutwish kukwatin ndond ya kushakam ching mulong wa antu a mu dijuku diey, antu wezang nau pamwing ap ushiching nau mu chikumbu chimwing ni wilejina nau Bibil. Kangal amboku kusha yom pa ndond ya kushakam yidia piswimp ney.

MUDIMU WA KWIKATIN Anch ukatin kwipan mulong wa kukwash ku mudimu kanang udia mu ditenchik dia chitentam, yang amboku ku departema winou akuleja kwi ndond kudia maswir.