Akat Kuyishimunin Atujikamatu Rusangu Ruwamp

“AKULETIDINANY yom ya muspiritu!” Wawiy mutapu warumburilay ntakel wa chikumbu chikatau kuyilamin amapal kwez kwa Atuman a Yehova ku chikumbu chau, mu Espagne, mu Madrid, ku Navalcarnero. Yom ik yamubachika kulond mwamu?

Antu avud adia ku chikumbu cha Rosas del Camino adi kwau atujikamatu. Chawiy lel, mulong Atuman ikasikeshin kwilej Rudim ra Yijingidij ra in Espagne, awiy atwishin kwisamb nau antu ashicha ku chikumbu chinech. Ntakel wayibaza Atuman mulong wa kupan chisu chau pakad kwit difut chakwel kuyifundish antu adia mu kuswir kwa pakampwil kwa kwilej yom ya muspiritu. Ndiy wamana anch mafundish ma rusangu ruwamp ra Want makwet usu usangareshina padiau antu ashicha ku chikumbu chau. Ni antu adia ku chikumbu—pakampwil antu akad kutwish kuman ap kutesh nawamp—amen kand nich usey ujim nakash kuyendin kukatau kuyendin kud Atuman.

Eulogio, ikundj udia mputames ni kamam ushicha ku chikumbu chinech, wilejin katat Bibil nau Atuman a Yehova. Dichuku dimwing padingau ni kwilej, ipal umwing weza ni kumwinkish Kaman nkumbu yarijekau mulong wa kumekesh kujikitish kwau. Nkumbu yiney yadinga nich mutu wa mulong: “Chakwel Kwikal Kaman.” Mu wiswimp, yading yilondil anch: “Akweting mwom umwing uwamp, mwom wa kalimish ni wisikena, ni Yehova ukat kuyinkish manangu ni musangar. Chisu chawonsu akat kuya ku yikumbu mulong amuchingejidin Yehova.”

Ruchingej riner mudiay Yehova rawiy rayishikijina Atuman avud mu mangand mawonsu kwilej rudim ra yijingidij ra atujikamatu adia mwi ngand yau. Mu mutapu winou akat kuyishimunin antu a mulad winou uruu ukasikeshina wa ruchingej udia mu Bibil.