Ov, Udi mud Mutond wa Lagani Auna?

MU UL umwing wa piswimp ni Chau cha Moresby, mu Papouasie-Nouvelle-Guinée, atushalapol aad ading achirikin kwol kwau kupwa kwa mujikit wa kulejan. Padingau ni kuchirik, amana mutond umwing uwamp. Mukurump walonda anch: “Ah, lagani auna!” Wakarumukin kud nsand, wawejinaku anch: “Dijin dined dirumburikin anch ‘mutond wa pa muvu ni muvu.’ Chiushalijadina ni mitond yikwau yivud ya chikunku cha mangand chipidilau anch tropik, ukat kuruk mayij mawonsu pa muvu ni muvu ni kumekan mud waum kal. Pakwez, pa chirung cha ruval, wasapurik, waminy yisalamb, wamekesh kand kuwap kwau.”

Chitwishikin kwilej dilejan ku lagani auna, ap anch flamboyant, mud muwijingau antu avud. Kwambatan ni ansil amwing, auchindining pamwing nich mitond yitan ya yisalamb yiwamp nakash mu mangand. Ap anch ukat kuruk yisalamb ni mayij mend mu chishipu, ukat kulam mem mavud nakash. Mij yau yidi yikash ni ukutwish kuminy pa mayal mandamina pansh nakash. Mwamu, ukat kwimanang dang pantaliken nich rinkind mukash. Kulond kwa mu wiswimp, ukat kusapurik nawamp mu mikadil yikash.

Tukutwish kwitan mu mikadil yitekina ritiy retu mu choziu. Chom ik chikeza kutukwash kujijaman? Mud lagani auna, tukutwish kuna mu dijiy dia mem ma Dizu dia Nzamb makata kulet mwom. Tufanyidin kand kulamat dang ku ‘diyal dietu,’ Yehova, ni dirijek diend. (2 Samwel 22:3) Chakin kamu, lagani auna udi chivurish chikash anch ap mu mwikadil ukash, tukutwish kulam usu wetu wa muspiritu ni kuwap anch twisakin yitenchik yitenchikinay Yehova. Kusutil ku kusalang mwamu, tukez “kuswan kushilamu” kwashilayimu, pamwing nich kushilamu kwa mwom wa chikupu.—Hebereu 6:12; Kujingunik 21:4.