Kutond Kwakad Manangu Kwa Nyikel Mpich

NSANGARUM nyikel mpich wadinga muntu utentamina, mwin kuziyil ku chijil, ni mwin kumwifukwil Nzamb. Weza kudi Yesu, wamwasin manungun ni wamwipula anch: “Mulej, yom ik yiwamp nikusal chakwel nez nipita mwom wa chikupu?”

Mu kwakul, Yesu wamuleja anch chakwel kutan mwom chimufanyidin alama yijil ya Nzamb. Pamwipulay amwovikesha nawamp, Yesu walonda anch: “Kangal wajipan, Kangal wasotan, Kangal wiy, Kangal watwambilan; Mulimisha tatukwey ni makwey; ni Ukamukata mukwen mudi ey amwiney.” Yiney yawiy yadinga yijil yijim yadinga mu Chijil chamwinkishau Moses. Nsangarum winou wamwakula anch: “Am naziyidil kal yijil yiney yawonsu. Ov, yom ik yikwau yinifanyidina kand kusal?”—Mateu 19:16-20, Manswik Masu.

Yesu “wamukat” wamulej anch: “Pakushadil chom chimwing: yanga ulandish yiukweta, uyipana kudi atuzwendj, ukatana rupit mwiur; weza winlondula am.”—Marko 10:17-21.

Cha ushon, nsangarum nyikel wara nich mupak ujim. Chom ik chelay kusal? Ov, wela kwitiyij kulik mapit ma ku mujimbu chakwel ikala mwin kwilej wa Yesu, ap anch wela kulamat ku mapit mend madingay nich? Ov, wela kukimb kwijindjikin mapit pa divu, ap anch wela kwijindjikin mapit mwiur? Wadinga mupak ukash kudi ndiy. Chakin wadinga usangaredin yom ya mu spiritu, mulong wadinga ulamin Chijil ni wita chom chikwau chimufanyidina kusal chakwel itiyika kudi Nzamb. Mupak ik wakwatay? Ndiy “waya kwend ni ushon uvud; mulong wading muntu ukweta mapit mavud.”—Marko 10:22.

Mupak wakatay nsangarum nyikel wadingap wa manangu. Anch wikala mwin kwilej ushinshamena wa Yesu, ing ukez kutambul chadia chikimbinay—mwom wa chikupu. Twijap chom ik chamushikena nsangarum winou. Pakwez, twij kusu anch, kupwa kwa mivu makum manying, amasalay in Rom ashesha musumb wa Yerusalem ni wa Yudea. In Yuda avud ashadisha mapit mau ni mwom wau.

Chinyim nend nsangarum nyikel, kambuy Pita ni in kwilej akwau atonda kutond kuwamp. Awiy ‘asha yawonsu’ ni amulondula Yesu. Ataninamu ik mu mupak winou! Yesu wayileja anch akez kutambul tupamp tuvud kupandakanamu yom yashau. Chikwau kand, akez kuswan mwom wa chikupu. Mupak wau wadinga mupak wakadiau kwez kwinan dichuku ap dimwing.—Mateu 19:27-29.