Ov, Ukat Kusadilang Mitapu Yiukweta Mulong wa Kulejan Yitiyij Yey?

“OV, UYAKIN wakinakin udingaku?” Wawiy wadinga mutu wa mulong wa kubambel kwa kufund kwa muchid wawonsu wa Pologne. Yijil ya kubambel kwinoku yadinga anch: “Kituswiridinap uyakin wakinakin. Kwikil muntu uuswiridina. Chakin kamu kwikiling kwau uyakin wakinakin.” Agata, wa reng ra mivu 15, wadinga ku shikol ya sekonder ni wadinga kand Kaman wa Yehova, wakwata mupak wa kusadil chisu chinech chakwel ayileja akwau yitiyij ya relijon wend.

Pirijekay mulong wa kubambel kwinoku kwa kufund, cha kusambish Agata wamwita Yehova amutakela ni wasambisha kukimbijol yom ya kufund pa mulong winou. Watana jinsangu jambatena nich mu Chinong cha Kalam cha Kafunfut 1, 1995 (Français). Wakopirila chipul chamwipulau Yesu kudiay Pont Pilat anch: “Ov, uyakin chom ik?” (Yohan 18:38, MM) Wafunda anch, chipul chinech chamekesha ngikadil ya kwidjidjek, mudi kulond anch: ‘Uyakin? Chom ik? Uyakin kiudingakwap!’ Agata wafunda anch: “Chipul cha Pilat, chanvurisha yijil ya kubambel kwa kufund.”

Cha kaad, wisambina chitongijok chilondila anch chom chidia chakin kudi muntu kanang chikutwishap kwikal chakin kudi muntu mukwau ni awonsu aad akutwish “ayingin nich.” Ndiy wipula yipul mudi yiney, “Ov, nany wa pakach petu ukutwisha kuhamuk kwendish kajil wa yikung anch kitwatongap anch mbil ja kutwik nich jidi uyakin wakinakin?” Kupwa wakarumukina ku Bibil, walond anch: “Kuchingejin Dizu dia Nzamb kwengamidin chakin kamu mu yom yitwishikina kushinshikin.” Walejana ruchingej rend anch antu akimbina chakin kamu uyakin wakinakin chiyifanyidin kushimpish michim chakwel eza autana.

Agata watambula diplom dia pakampwil ni amwinkisha mutapu wa kusal chikunku chend kurutu kwa shikol yawonsu. Arund nend avud a ku shikol itiyija kwilej nend Bibil. Agata wasangara nakash mulong wasadila chisu chinech mulong wa kuyilej antu akwau avud yitiyij yend. Inge, kudimukin chisu chitwishikina cha kwisambin pa ritiy ren kukutwish kusong mabuj. Mitapu ik ukutwisha kusadil mulong wa kulejan yitiyij yey?