Mushejina Nzamb Piswimp
Tatuku Wakad wa Kwilikan Nend
“TATUKU.” Mazu makemp malangwishina yovil yikash mu antu. Tatuku uyikatininga chakin an end uyikwashining chakwel asangar. Bibil uyingin kamu, pamujimbwilay Yehova Nzamb mudi “Tatukwetu.” (Mateu 6:9) Yehova udi Tatuku wa mutapu ik? Chakwel twakula ku chipul chinech, el tushinshikin mazu mamulejau Yesu kudi Yehova pa dichuku diamubabatishau Yesu. Oku, mutapu wisambiningay tatuku ni an end ujinguninish yom yivud piur pa udi nvaj wa mutapu ik.
Pa Mwinkind mu muvu wa 29 C.C., Yesu waya ku Kawit wa Yordan akamubabatisha. Bibil wisambidin yasadikaku anch: “Ni Yesu, chamubabatishau kal, watuntuk mu mem; kukashimuk diur adimwanzuril, waman [s]piritu wa Nzamb ukat kushirik mudi iyemb, washirika wawil padiay ndiy; Kutesh dizu diadiokal mwiur dialond anch: Mwinou ndiy Mwanam ukatishena, mwi ndiy nikat kusanger.”a (Mateu 3:16, 17) Yehova amwinend ndiy walonda, mazu minam ma rukat matulejin etu yivud piur pa Tatuku wa mutapu ik udiay. Tal yom yisatu yamulejay Yehova Mwanend.
Cha kusambish, nich mazu “mwinou ndiy Mwanam,” Yehova wadinga ulondil chakin anch, ‘nitiyijin kwikal Tatukwey.’ Tatuku mwin jingunin upwishining nzal ya an end mulong wa kuyitiyij ni kuyibangin. An aswiridining kuyitiyikish anch akwet usey wa pakampwil mudi yid ya dijuku. Vurikany mutapu wiyovay Yesu—ap chadingay kal muntu mukurump—pakutesh kwitiyik kwinoku kudi Tatukwend!
Cha kaad, kusutil ku kumwel Mwanend mudi “ukatishena,” Yehova wamekesha patok kamu kumukat kwend Yesu. Mu mutapu ukwau, Tatuku wadinga ulondil anch, ‘Nikukatin.’ Tatuku muwamp uyilejining anend anch uyikatin nakash. Mazu minam—pamwing nich rukat rakin—mayikwashining kukul nawamp. Chamushika Yesu ku muchim mudi ik pa kutesh dizu dia Tatukwend dialond anch umukatil!
Cha kasatu, kusutil ku mazu “ndiy nikat kusanger,” Yehova wamekesha kumwitiyij Mwanend. Chadinga mudi anch Yehova ulondil anch, ‘Mwan, nisangaredin yiwasala kal.’ Tatuku mwin rukat usotining yisu ya kuyijikish an end anch usangaredin yom yiwamp yilondilau ap yisadilau. An ikasikeshining ni kukapuk anch anvaj ayisangaredin. Chakin kamu chamukasikesha Yesu pa kutesh anch Tatukwend umusangaredin!
Chakin kamu, Yehova udi Tatuku wakad wa kwilikan nend. Ov, muchim wey umuswiridin tatuku mudi winou? Anch mwawiy, ukutwish kutan rongoj mu kwijik anch ukutwish kutal urund ni Yehova. Anch mu ritiy wilej piur pend ni nich kashins wapakish kusal rusot rend, ndiy ukukwitiyij. Bibil ulondil anch: “Ikalany piswimp kudi Nzamb, ni yend ukwikal piswimp kudi en.” (Yakob 4:8) Chom ik chikutwisha kukwikadish mu diking chipandakenamu kwikal nich urund wa piswimp ni Yehova Nzamb, Tatuku muwamp upandakenamu ukutwisha kutongin?
[Mazu madia kwishin kwa paj]
a Kulondulijan nich rusangu rifanikena ni riner ridia mu Rusangu Ruwamp rafunday Luka, Yehova wasadila dilij dia muntu umwing “yey” ap anch “ey,” walond anch: “Yey Mwanam ukatishena, mu ey nikat kusanger.”—Luka 3:22.