Kupwa Kwa Kalas Ka 123 Ka Gilead
In Kupwish Shikol Ya Gilead Ayikasikeshin “Asambisha Kupund”
DIAMPOS, Mwinses 8, 2007, chisak cha antu 6 352 adiokala mu jingand 41 adingaku pa chisu chapwa kalas ka 123 ka Shikol ya Gilead ya Bibil ya Watchtower. Pa chisu cha 10:00 pamanch, ntakel wa program, Anthony Morris wa mu Chisak Chitakedila, wayezishaku in kukumangan. Kupwa kwa mazu ma kusambish, wamutazuka mwin kulond wa kusambish, Gary Breaux wa ku Komite wa Mutiy wa mu États-Unis.
Mukadivar Breaux wayikasikesha in kwilej anch chikalap nchik yifu ya mijimbu yau, antu asadila rusot ra Yehova ading yiliz ku mes Mend. (Yer. 13:11) Ndiy wayikasikesha in kupwish shikol alama mwikadil winou uwamp. Wambakedinap, Gerrit Lösch wa mu Chisak Chitakedila wakasikeshina anch chiwapidil kuchingejin matapish pitumusadidila Yehova. (Heb. 11:6) Pakwez, rukat ra kashinsh rifanyidin kwikal chibachikin chetu.
Kalam wa Departema wa Mashikol ma Uteokras, William Samuelson, wayikasikesha kand in kupwish shikol alamata dang ku mudimu wa usey wa kulejan Mwant uyikedina ni kumekesh kalimish kau kusutil ku yisal yiwamp.a Sam Roberson, kalam nkwash wa Departema wa Mashikol ma Uteokras, wayikasikesha in kupwish shikol anch akimba chisu chawonsu ngikadil yiwamp mudiau antu akwau. Chawiy lel in kupwish shikol akutwish nawamp ‘ayikat anamaku in Kristu.’—1 Pita. 2:17.
Kupwa kwa madiskur minam makasikeshina, mulej wa ku Gilead Mark Noumair wayipula in kupwish shikol avud ashimunina padingau ni kwilej ku Gilead yom yayishikena mu mudimu wa chingand. Kayishap in kuyitesh mu kwidjidjek piur pa rukat rau mulong wa mudimu ni rusot rau ra kuyikwash antu akwau. Chawiy lel, Kent Fischer wa ku Biro wa Betel wa ku Patterson wayipula yid ya Komite wa Mutiy adiokala mu jingand jisatu mudiau a mishoner. Mazu ma akadivar awamp inay mayikasikesha in kutesh, pamwing ni anvaj a in kupwish shikol avud, amishoner inay asu asangeridina nawamp ndond yayitumau. Kupwa Izak Marais wa ku Departema wa Midimu ya Kukarumun wayipula amishoner asala kal mivu yivud, yom yayishikena yatakela kuyinkish in kupwish shikol musangar ukwikalau nich.
Diskur Dijim dia program, diasalay Geoffrey Jackson wa mu Chisak Chitakedila, diading nich mutu wa mulong ulondin anch: “Kwambatan Nich Yawonsu Wateshany Kal—Ov, yik Ukusalanya?” Mukadivar Jackson, wasala mivu 25 mu umishoner Kurul kwa Pacifique, wisambidina dipwishil dia Mafundish ma pa Mukandu. Mu diskur dined, Yesu wisambina amakundj aad, umwing ubabela ni mukwau chisup, atunga yikumbu. Mwin kusal diskur walejana anch yikumbu yawonsu yaad ela kuyitung pa ndond yimwing. Pakwez, chisup watunga pansh, pa usukuril, pakwez, muntu ubabela wapunda bil djat ni pa diyal pawiy patekinay mufulandal wa kutungin. Pezay rinkind mukash, chikumbu chatunginau pa diyal chapanda pakwez chatunginau pa usukuril chawa pansh.—Mat. 7:24-27; Luka 6:48.
Yesu walejana anch muntu chisup uyifanikan antu atesha kwau kusu malejan ma Yesu pakad kumasadil. Mwin kubabal wading mudi antu atesha ni asadila mazu ma Yesu. Mukadivar Jackson wayileja in kupwish shikol anch: “Anch wasadilany mu chingand cha umishoner yom yiwilejanya kal kusutil dilejan dia Bibil ukwikalany mudi mwin kubabal.” Chawiy lel, mu dipwishil, wayikasikesha in kupwish shikol “asambisha kupund” mu mudimu wau wa umishoner.
Kwinsudiel, in kupwish shikol atambula ma diplom mau ni ayileja ndond ya kusadil, ni Mukadivar Morris wapana yiyul yimwing ya dipwishil. Ndiy wayikasikesha in kupwish shikol amulondul chisu chawonsu Yesu ni kafanyidinap kukangany dichuku ap dimwing kumuchingejin Yehova mulong wa kuyikasikesh. Wawiy mutapu wapwa program wa shikol.
[Mazu madia kwishin kwa paj]
a Departema wa Mashikol ma Uteokras, udi mu wintakel wa Komite wa Malejan, utakedil Gilead, Shikol wa yid ya Komite wa Mutiy, ni Shikol wa atulam in kwendangan.
[Kamushet kadia pa paj wa 31]
UVUD WA IN KALAS
Uvud wa jingand kwadiokala in kwilej: 10
Uvud wa jingand kwayitumau: 24
Uvud wa in kwilej: 56
Mwayen wa reng: 33,5
Mwayen wa mivu mu uyakin: 17,9
Mwayen wa mivu mu mudimu wa chisu chawonsu: 13,8
[Chipich chidia pa paj wa 32]
Kupwa kwa Kalas ka 123 ka Shikol ya Gilead ya Bibil ya Watchtower
Mu list udia kwishin oku, milong ayichindil kusambishil kurutu kuya kwinyim, ni majin amajimbwil kudiokal ku kamaku kuya ku katatuku mu mulong ni mulong.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.