Ov, Wirijekin Mulong Wa Kuchidij Ritiy Rey?
OV, WIKALAP kal mu mwikadil umwing muwiyova anch ufanyidin uchidij ritiy rey? Shinshikin chom chamushikena Susana, nambaz ukweta mivu 16 udinga mu Paraguay. Padingay mu kalas ku shikol ya piur, alonda anch Atuman a Yehova kitiyijiningap “Testament Mukur,” Yesu Kristu, ap Mariy. Alonda kand anch Atuman adi atubwebu asotininga kufa pa ndond pa kwitiyij ayoka ku rupital. Ov, ey wela kusal nchik anch wadingap?
Susana wamulembila Yehova ni wazambula chikas chend. Kalas kawonsu kasota kutesh yikulonday, chadi wamwita mulej mbil chakwel arumburila piur pa yitiyij yend mudi Kaman wa Yehova. Mulej witiyija kapamp kamwing. Mbing jaad jalondulaku, Susana wirijeka pa mulong winou, wasadila broshir ulondila anch: Les Témoins de Jéhovah : Qui sont-ils ? Quelles sont leurs croyances ?
Dichuku dia kusal minsamb yiney diawanyina. Susana warumburila kudiokila dijin Atuman a Yehova. Warumburila kand ruchingej retu mulong wa dikez ni mulong wak tulikininga kututek mash. Kupwa wayita ansand a shikol ipula yipul. Ansand avud azambula makas mau. Mulej wakashimuka pa kumutesh changadim mutapu wakwilay yipul nich kusadil Mifund.
Nsand a shikol umwing walonda anch, “Nayap kal kapamp kamwing ku Chot cha Want, ni kimwadingap kakapwany ap kamwing.” Mulong wasota kwijik mulong wak. Susana watanga Kuseng 115:4-8 ni Kubudik 20:4. Washimoka, mulej walonda anch, “Ov, mulong wak lel mu maegliz metu mwizwil too tupwany oku Bibil uyilikishin?”
Yipul ni yakul yadandamena yasal minit 40. Pipulay Susana kalas anch asotil kutal video Pas de sang : la médicine relève le défi, awonsu akula anch inge. Chawiy mulej watenchika program mukwau dichuku dialondulaku. Kupwa kwa kutal video, Susana warumburila mulad wa kwokan nich mon yindjing yitiyijiningau Atuman a Yehova. Pa chinech, mulej walonda anch: “Kinadingap nija anch kudi mon yindjing; ni kinadingap nija ukwash wa kwokan pakad kusadil mash. Kwok kwinoku—ov, kudi ching kusu kwa Atuman a Yehova?” Pateshay anch kimwawiyap, mulej walonda anch, “Pakwezau Atuman a Yehova kwol kwam, nikez kwambamb nau.”
Susana wirijeka anch minsamb yend yikusal minit 20 pakwez yeza kusal asaa asatu. Pa kusut kwa rubing, ansand a shikol akwau asala minsamb piur pa yitiyij yau mudi yidi ya maegliz. Kwinsudiel, ayipula yipul yivud, pakwez ansand ashikol katwishap kuchidij ritiy rau. Mulej wayipula anch, “Ov, mulong wak utwishinanyap kuchidij ritiy ren mudi mwasalay mbay nen nsand a shikol udia Kaman wa Yehova?”
Chakul chadinga anch: “Awiy ilejining Bibil chakin kamu. Etu kitwilejiningap Bibil.”
Mulej wakarumukin kudi Susana, wamwel anch: “Chakin kamu en wilejiningany Bibil ni usadilingany usu wa kusal yilondinay. Chifanyidin kukujikitishany.”
Susana katwishap kushakam zoong. Pakwez, palonday mulong wa kwonan yitong ya ambay nend a shikol, walondula chilakej chiwamp cha changadim mwin Isarel wakadiau kujimbul dijin watwalau mu ubindj kudi in Siriy. Changadim winou amuteka mu chikumbu cha Naman kalal mujim wa in Siriy, muntu wadinga uyedila musong wa mayej mayimp ma chikit cha mujimbu. Changadim mwin Isarel walonda anch, pamulejay mwant mwad wend: “Anch mwant wam waya kurutu kwa muprofet udia mu Samaria! Ukumwok musong wend wa mak.” Changadim katwishap kamu kuninet alika kupan uman piur pa Nzamb wakin. Chawiy chamushikija nsalejend, Naman, ikala mwin kumwifukwil Yehova.—2 Ant 5:3, 17, NW.
Chilik chimwing, Susana katwishap kulik kupan uman piur pa Yehova ni piur pa antu end. Kusutil ku kwikal wa kusambish kuchidij ritiy rend pasarumunau yitiyij yend, Susana wadinga uziyidil ku chijil cha Mifund chilondila anch: “Mulimishany Kristu mu michim yen mudi Mwant. Irijekany machuku mawonsu ku kwakul kudi muntu wawonsu ukukwipulany ya ruchingej ridia mu en, pakwez nich kwitudish ni kalimish.” (1 Pita 3:15) Ov, udi tayad kuchidij ritiy rey ni kwikal wa kusambish pichitwishikina kusal mwamu?
[Chipich chidia pa paj wa 17]
Yom yiney ya mudimu yikutwish yakukwash kuchidij ritiy rey