Kupwa Kwa Kalas Ka 124 Ka Gilead
Amishoner Adi Mudi Atubol
CHIRUNG chin chawonsu cha angond musamban, Shikol ya Gilead ya Bibil ya Watchtower yisadiling program wa kupwa kwa kalas kutazukiningau dijuku diawonsu dia kabuj dia Bethel wa États-Unis. Pa dichuku dia ngond 8 dia Rish, 2008, kwezang angendj kudiokal mu jingand 30 ni kusut inunga pamwing ni dijuku dia Bethel papwa kalas ka 124 ka Shikol ya Gilead. In kukumangan awonsu 6411 asangara pamwing nau ansand a shikol pa dichuku dined dia pakampwil.
Ntakel wa program, Stephen Lett wa mu Chisak Chitakedila, wasambisha nich diskur diadinga ni mutu wa mulong ulondila anch: “Yangany Pamwing ni Atubol a Chifanikesh a Yehova.” Kuburik 9:1-4 ufanikeshin kachisak kakemp ka in Kristu azizidilau many apanda muspiritu mu muvu wa 1919 mudi chisak cha atubol asambisha kusal cha kukashimuk. Ayivurisha ansand a shikol anch chidiau yid ya “amikoku akwau,” inung kal ayinau ku chisak chinech cha atubol a chifanikesh.—Yoh. 10:16.
Lon Schilling, chid cha Komite wa Mutiy wa mu États-Unis, wamwambakena nich diskur dilondila anch: “Kwashijanany.” Diadinga diengamidin pa chilakej chidia mu Bibil chenday Akila ni Prisil (ap anch, Priska), ambay in Kristu atijadina adingaku mu mivu chitot ya kusambish. (Rome 16:3, 4) Mu kalas ka Gileyad mwadinga amakundj 28 ni akajau. Ayivurisha anch chakwel anch atwisha mudimu wau mudi amishoner, afanyidin kwikal ovijadina nakash mu uruw wau. Bibil kakatap kumujimbul Akila pakad kumujimbul mukajend, Prisil. Chawiy lel, mupostol Paul ni chikumangen ayimana mudi chom chimwing. Chawiy kand, amishoner atijadina ilel afanyidin kusal mudimu wau pamwing, kwifukwil pamwing, ni kurish nich yikokujol yimwing mu teritwar musu, chawiy kukwashijan umwing ni mukwau.—Dis. 2:18.
Diskur dialondulaku, dialonda anch: “Itiyijany Kuwap kwa Yehova,” adisala kudiay Guy Pierce chid cha Chisak Chitakedila. Mukadivar Pierce warumburila anch kwikal muntu muwamp kurumburikin yom yivud kudiap ching kusu kulik kusal yom yiyimp. Muntu muwamp usadiling yom yiwamp mulong wa kuyikwash antu akwau. Yehova Nzamb upandakenamu ku kuwap. (Zak. 9:16, 17) Kuwap ni rukat ya Nzamb kukutwish kwikal mudi etu mudi chibachikin cha kuyisadil antu akwau yom yiwamp. Payijikitishay ansand a shikol, Mukadivar Pierce wapwisha nich kulond anch: “Ukat kusalangany yom yiwamp. Tuchingejin anch ukudandamenany kwitiyij ku kuwap kwa Nzamb nich kusal yom yiwamp mu mitapu yikwau ya midimu yikukwinkishanyay Yehova Nzamb.”
Kupwa, Michael Burnett, muntu wadinga pasak mishoner, ni wikadila kal katat mulej wa Gilead, wasala diskur dilondila anch: “Madjalany Mudi Chivurikish Pakach pa Mes Men.” Ap anch adinga ni kudjal “chivurikish” pakach pa mes mau, chayita in Isarel avurika mutapu wayipandishau mu chilay chayisadilau kudi Yehova padiokalau mu Idjibit. (Kub. 13:16) Ayibabesha ansand a shikol chakwel avurikang malejan mavud mayilejau ku Shikol ya Gilead mudi anch amadjatil mudi chivurikish pakach pa mes mau. Mukadivar Burnett wakasikeshina maswir ma kwikal witudishina ni wikepishina mu kusadil yijil ya Bibil pa chisu cha kupwish kuburen kwovijan ni ambay amishoner ni antu akwau.—Mat. 5:23, 24.
Mark Noumair, mulej wa Gilead wasala machuku mavud, wasala diskur dilondila anch: “Muminy Ik Ukezau Kukuwanginany?” Pa yisu ya pasak, kwadinga chaku cha kusanger kuwin kwa njit nich kuwang muminy. Umwing wa miminy yiney wayibudishina patok muchid wa Ruben, Dan, ni Asher mudi michid ya ushish, oku muchid wa Zebulon aushimana mulong wa kwipan kwau. (Ank. 5:16-18) Mudi mazu ma muminy, yisal ya mwin Kristu umwing ni umwing yikat kwijikan patok kudi antu akwau. Mushiku wa muntu wa kusal mudimu wa Nzamb ni kujijamen nich kushinshaman ku umutakel wa uteokras ukez kumwikadish muntu nich rusangu ruwamp kudiay Yehova ni ukwikal mudi chilakej chiwamp kudi akadivar nend. Pateshinau antu akwau adia mu chikumangen muminy wa chifanikesh utuwangidinau mulong wa yisal yetu, akwikala abachikinau imburija chilakej chetu chiwamp.
Mudi chikunku cha kwifumb kwau ku Gilead, yid yawonsu ya kalas ka 124, yasutisha asaa 3 000 mu mudimu wa kulejan. Mu mutu wa mulong: “Londulany Umutakel wa Spiritu Utumbila,” ansand a shikol amushimunina Sam Roberson wa ku Departema wa Shikol ja Uteokras yom yawonsu yamanau mu mudimu, ni ayichirikinaku yimwing. Kupwa kwa yom yiney yamanau yikasikeshina kwalondula ma interview, amatakela kudiay Patrick LaFranca chid cha Komite wa Mutiy wa mu États-Unis, pamwing ni antu apwisha kal Gilead asadila katat mu jingand kushalijan. Ansand a shikol asangera nakash yiyul yayinkishau kudi akadivar inay.
Anthony Morris chid cha Chisak Chitakedila wasala diskur dia nsudiel dialonda anch, “Vurikany, Yom Yimekena ku Mes Yidi ya Kachisu Kakemp Kusu.” Mifund yitubabeshin twasina pa yiyukish yidia kurutu yikezay kulet Yehova pa ndond pa kwasin pa mar ma kachisu kakemp makutwisha kututan. (2 Kor. 4:16-18) Uzwendj ukash, kuburen kutentam, mar makash, mayej, ni rufu yidi yom yitumena etu awonsu ilel unou. Amishoner akutwish ikal mu yimwing ya ngikadil yiney yikash. Pakwez kuvurikang anch yom yiney yidi ya kachisu kusu kukez kutukwash twikal isikena muspiritu ni kwikal nich ruchingej rikash.
Program wapwa pashakamau ansand a shikol awonsu pa chimet mulong wa kutesh yiyul ya nsudiel ya Mukadivar Lett. Ndiy wayikasikesha anch kangal walikany ni walonda anch: “Kwikil chom chikutwisha kushesh kushinshaman kwetu anch Yehova udi ku mutambu wetu.” Ndiy wayikasikesha amishoner asu ikala mudi atubol, adandamena mu mudimu wa Yehova ni ashala in mushiku, ashinshamena, ni in kuziyil chikupu.
[Kamushet kadia pa paj wa 30]
UVUD WA IN KALAS
Uvud wa jingand kwadiokala in kwilej: 7
Uvud wa jingand kwayitumau: 16
Uvud wa in kwilej: 56
Mwayen wa reng: 33,8
Mwayen wa mivu mu uyakin: 18,2
Mwayen wa mivu mu mudimu wa chisu chawonsu: 13,8
[Chipich chidia pa paj wa 31]
Kupwa Kwa Kalas ka 124 ka Shikol ya Gilead ya Bibil
Mu list udia kwishin oku, milong ayichindin kusambishil kurutu kuya nich kwinyim, ni majin amajimbwil kudiokal ku kamaku kuya ku katatuku mu mulong ni mulong.
(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.
[Chipich chidia pa paj wa 32]
Shikol ya Gilead yiding kwi Ndond Yijim ya Malejan ma Watchtower