Mukand Udiokila mu Nicaragua

“Anch Washik ku Wiit Coco, Karumuk ku Katatuku”

“UKUSWIRIKEN motak wa nfumb jinying, ndjek, ni tumantuku twa kasarony. Chingejin anch mwishin mwa motak mu kwizul mpwat-pwat too. Anch washik ku wiit Coco, karumuk ku katatuku.”

Nifanyin nitiyija anch mazu manlejay mbay mishoner kimakwashap mulong wa kwichingejin kwam amwinam. Chikalap nchik mwamu, Diakaad dimwing pamanch, nasambisha weny wam niya nikakumangan ku chitentam cha Ukristu mu Wamblán, ka musumb kakemp kadinga kwindum mu Nicaragua.

Natumbuka pamanch, nendisha motak wam ukur pakwez ukash ni nasutila mwinjil yiwamp ya kabudimb yijimbwilau anch Pan-American Highway. Panashika ku Jinotega, namburika nandam mwi njil ya divu yadingau ni kutazuk kudi antu akwinikwa anch feo, charumburik anch njil yiyimp. Kurutu nidiokala mu musumb winou, namana makashing maad, mamwing amapidil anch Miracle of God (Chilay cha Nzamb) ni makwau anch, The Resurrection (Disanguk).

Njil yadinga ni tunyingumok, yalandal pa mikandu ni kupwa yashirikin mwinkurubuk. Nendisha motak pakemp pakemp mu disaz. Nasutila piswimp ni dijiy diadinga mwinkurubuk ni didj diadinga dibwikin mukandu. Panashika pakach, namana milong yisatu ya mitond ya yisalamb yiwamp ni adinga akwatin kud yisalamb ya mu Espagne.

Panashika pa mater, twiyepa nayimp nich motak ukwau wadinga wezina mau nakash. Wadinga ubudishin mish nakash, ni jinfumb jadinga jidjibwil mayal piusutila. Munomu mu Nicaragua, ukutwish waman afundil kamu pa dikalash dia kurutu dia motak dijin dia mwin kuwendish ukweta chisum mudi anch: Mwin Kuyipandakan, Kapambamb, Ntok, ap anch Chibind.

Pa midi nading nisutil Mwimpay ya Pantasma. Namana chikumbu cha mitond chadinga mu rupang rakombau kal nawamp. Chadinga chimeken mudi chipich chidia mu buku mukur: Ipal a ikundj wading ushich pa chibas, kabu wading ulel mwishin mwa mutond, ni ayimbur aad ading ayikasidin mpand yimwing ading iminy ombin jinyim ku chilangumun chau cha mitond cha nfumb. Mu musumb ukwau ukemp, namana chisak chijim cha ansand adiokil ku shikol. Awonsu adjit maswin ma ulomb wa mem ma kanyik ma chilik chimwing izwil too mu mukombil ujim mudi mambek matutina ku chikum.

Muten wadinga wasambish kal kuzwek panadinga piswimp ni kushik mu Wiwilí ni namana kapamp kamwing wiit Coco. Wiit ujim wadinga kulemp mudi ubwikin musumb mudi mwadinga muyila mem mau. Navurika yanlejau, ni nakarumukina ku katatuku ni nasambisha katat njil yiyimp nakash ya makilometre 35 kuya djat ku Wamblán.

Motak wasutila mwinjil ya mayal, mu mabuku-mabuku, ni motak wadinga ni kwandamol mu yimem mu tuwit chinan ap chidivu. Mudi munadinga ni kwiyep kwendil mu malau, natwisha kulangwish rufunfut. Inge, “nadia rufunfut,” mudi mulondiningau antu a kwinikwa. Kupwa, njil yasul, ni kurutu kwadinga mwinzwizwimb ujim mwinkurubuk mwa mitond mwawiy mwadinga Wamblán, kunadinga ni kuya.

Muntu ni muntu wading umeken anch diamashik ukulank pambwidid pa 4:30 dichuku dialondulaku. Kudil kwakad kulik kwa atulambol a anzol kwanlangwisha, natumbuka nabudik pol naya kwendangan mu mukombil ujim. Rinkind rawonsu radinga rizwil nich res ra mikat ya kabak ni may yadinga yoshinau.

Ku jimbumbu ja yikumbu kwadinga yipich ya ulombu kushalijan ya paradis yasalau kudiay mwin kusal yipich wa mu musumb. Yijingidij yidia pulperías (tuyikumbu twa kunin maar), ap anch mayal ma pamakonk, padinga chipich cha maar am ap makwau. Yipich yijim yijim yadinga ni kuyivurish antu a musumb, antu asatu ayikedila. Tuyikumbu twa kuns ni jinkil jidi nich tuyom tulayina nakash.

Kapamp ka kusambish, nayilangwisha mu rudim ra in Nicaragua anch Adiós. Antu ansipa ni anlondisha nich chirungul. Twadinga ni kulond dizu piur mulong wa masok ma motak jadinga ni kusut—ni mulong wa rushind ra atubar adinga ni kusut.

Kushik Diakatan urel, majuku mavud meza mulong wa chitentam cha machuku maad. Eza amwing ra pansh, ay pa tubar, ni akwau mu motak. Anikanch amwing ansand ni ayangadim enda maweny ma aasa musamban adjit yisapat ya plastik. Ap anch kwadinga mamin piswimp ni wiit pakwez awiy amwauka ni asutila mu mem pakad kwiyakamish chikalap nchik amazambu adingamu. Amwing adiokala ku mal madia kulemp asenda yakudia yikemp—muchel nich mbij ja chibond. Ov, mulong wak wezau antu inay awonsu?

Eza chakwel akasikesha ritiy rau mulong wa dikez diwamp. Eza chakwel atesha mutapu ukuyirumburilau Bibil. Eza chakwel amusangaresha Nzamb.

Diampos diashika. Mwishin mwa malat, antu 300 ni kusut ashakama pa yibas ya mabay ni mu yitwam ya plastik. Amaku adinga ni kuyamwish atubas au. Ayibond adil lel ni atulambol ilejina kutazuk, atazwok lel mu chingand chadinga piswimp.

Kwikala chirungil nakash. Pakwez in kukumangan ata matu nakash ku chiyul ni umutakel wayinkishau. Adinga ni kuyilondul in kulond mu ma Bibil patanginau mifund, awanga miminy yadinga yengamidina pa mitu ya Bibil, ni atesha nich kalimish malembil mayilembilau.

Kupwa kwa yikunku, ninunga ni amwing au ni twasambisha kufundijan majin ni an. Kupwa twachirikina yom yafundau anikanch. Nayileja yipich ya atutumbu ni jinkong ja atutumbu jadinga mu ordinater wam. An asipa nakash, ni anvajau asangara nakash.

Kupwa kamu kwa chitentam ni muntu ni muntu waya kwol kwend. Natumbuka pamanch dichuku dialondulaku, mu mutu wam mwadinga mwizwil yom yiwamp yinadinga nivurikina ni muchim wam wizula nich rukat rinayikata arund nam asu. Nikwatin mupak wa kuyimburij ni wa kwilej kusanger yinikweta ni mutapu wa kumuchingejin ching kusu Nzamb.

[Chipich chidia pa paj wa 23]

Majuku mend makilometre mavud mulong wa kwez kukumangan ku chitentam mu Wamblán