Yipul ya In Kutang

Mulong Yehova wajidika kwifukwil akish, ov mulong wak kamupupap Aron pasalay chirumbidij cha musamb a ngomb wa or?

Pasalay Aron chirumbidij cha musamb a ngomb wa or mudi mulejenau mu Kubudik shapitre wa 32, ndiy kaziyilap ku chijil cha Nzamb cha kulik kwifukwil akish. (Kub. 20:3-5) Mudi chibudikin, “[Yehova] wamwovila Aron ujim, wela kumushesh, chad chisu chinicha kand am [Moses] namulembidila Aron.” (Kuv. 9:19, 20, MN) Ov, malembil ma Moses muntu utentamina mikala nich “ukash” ku mutambu wa Aron? (Jak. 5:16) Mwaning, mulong wa malembil minam ni mulong wa mayingish makwau maad, chimeken anch Yehova wakula ku malembil ma Moses ni kamupupap Aron.

Diyingish diakusambish dimedin pa rusangu ra kushinshaman kwa Aron. Pamutumay Moses chakwel aya kudi Farao ni kuyibudish in Isarel mu Idjibit, Yehova wamutonda Aron chakwel amutwalaku Moses ni ikala kan kend. (Kub. 4:10-16) Antu inay aad aziyidila ni kuya kudi mwant wa Idjibit yisu yivud, ni amekesha yibudikin ya kukasikan kwa muchim wa Farao. Chikwau kand padingay mu Idjibit, Aron wamusadina Yehova mudimu ukash ni ushinshamena.—Kub. 4:21.

Shinshikin kand pa yom yamubachika Aron ku kusal chirumbidij cha musamb a ngomb wa or. Moses wasala machuku 40 ku mukandu wa Sinay. “Chawiy chamanau antu anch, Moses walab kal kushirik ku mukandu,” amukasikesha Aron kuyisadil mukish. Aron witiyija kupwa wayichidila chirumbidij cha musamb a ngomb. (Kub. 32:1-6, MN) Pakwez yisal ya kusambish ya Aron yamekesha anch muchim wend wadingap pakach pa antu akasikesha kwifukwil akish. Chimeken anch amubachika kusal mwamu. Palonday Moses mulong ukash piur pa kwifukwil akish, chilakej, an awonsu in Levi—kuwejaku ni Aron—asuta pakad kwidjidjek ku mutambu wa Yehova. Antu tunan tusatu ipana ku yisal ya kwifukwil akish ayijipa.—Kub. 32:25-29.

Kupwa Moses wayileja antu anch: “En wasadilany chitil chijim nakash!” (Kub. 32:30, MN) Chawiy lel, Aron kadingap amwinend kusu walikishinau ni kulik kupup mulong wa uyimp winou. Ndiy ni antu akwau atambula yiyukish mu riy rijim ra Yehova.

Kupwa kwa mulong wa musamb a ngomb wa or, Yehova wayileja anch amuteka Aron ikala mwin kupesh mujim. Nzamb wamuleja Moses anch: “Chad ukamudjik Aron yidjal yitumbila. Ukamuzizil many wamuswanish, niyend ukwinsadil mudimu wam wa win kupesh.” (Kub. 40:12, 13, MN) Chakin kamu, Yehova wamulikishina Aron ku yitil yend. Mulong mu muchim wend, Aron wading muntu ukasikeshina difukwil diakin nich kushinshaman, kadingap mbwambwol mwin kwifukwil akish.