Ov, Chom ik Chiyakamishina Antu Avud?

STEPHEN O’LEARY, MULEJ WA KU SHIKOL YA PIUR YA KWIYAND KWA CALIFORNIEa walonda anch: “Ufanyidinap kwikal ching mukaritiy wa chirelijon chakwel utonga anch mar ma chitangil makez kutushiken.”

WITIYIJIN mazu minam madia kwinsambishil? Mitu ya milong yiney yilondulijadina yikez kachirikin mayingishil mamwing malejena mulong wak antu akamin piur pa machuku ma kurutu. Pakwez yikez kulejan kand mulong wak ukutwish kwikal nich ruchingej anch mwom udia pa divu ukez kwikal wakad nsudiel. Kudi diyingishil diwamp dia kwikal nich ruchingej, chikalap nchik yom yikash yiukutwisha kutang.

Wom wa njit ja nikleyer upandaken. Mu muvu wa 2007, buku Bulletin of the Atomic Scientists wababesha anch: “Kudiosh padjibwilau mabomb atomik mu Hiroshima ni mu Nagasaki kusheshik kwa mutapu winou kwasambisha kushiken pa mangand.” Mulong wak chifanyidin kubangin? Bulletin walejana anch mu muvu wa 2007, mamwing mat ma nikleyer mashikena ku uvud wa 27 000 ni madandamedin kwikalaku ni kudi uvud wa mat 2 000 madia “tayad chakwel amabula mu minit ni minit.” Ap anch umwing pa chitot wa mat minam aushesha, yibudikin yela kwikal yikash!

Ov, yakamish ya njit ja nikleyer yakepin kand? Piur pa mangand matan makweta usu upandikena wa nikleyer​—Chine, États-Unis, France, Royaume-Unis, ni Russie—Annuaire 2009bc wa SIPRI ulondin anch awonsu “akat kusal mat ma nikleyer masu ap akat kwijikish rusot rau ra kusal mwamu.” Pakwez annuaire ulejen kand anch kamadiap kusu mangand minam makweta mat ma nikleyer. In kukimbijol alejen anch Inde, Pakistan, ni Isarel akwet umwing ni mukwau mabomb ma nikleyer pakach pa uvud wa 60 kushik ku 80. Alondin kand anch, mu mangand mawonsu uvud wa 8 392 wa mat ma nikleyer amatenchikin katat, mulong wa kuchingel pakezau kumabul!

Kukarumuk kwa chisu kukutwish kulet mar ma chitangil. Bulletin of the Atomic Scientists twisambinanga kwinsambishil ulondin anch: “Ma ubaj ma kukarumuk kwa chisu madi piswimp chilik chimwing ni mar maletinau kudi mat ma nikleyer.” In siyans alimishinau mudi Stephen Hawking, mulej wa upandakena wa ku shikol ya piur ya ku Cambridge, ni Mwant Martin Rees, Mwant wa Collège Trinité ku shikol ya piur ya Cambridge, aleta kubabesh kwinouku kukash. Awiy atongin anch kusadil kuyimp kwa winchij ni kuswimp kwa mwikadil mulong wa yom yisadinau antu kukutwish kukarumun rawonsu mwom pa divu ap kushikij mashakamin ma antu kwinsudiel.

Kusambel kulejan piur pa kusheshik kwakamishin tutikit twa antu. Fund dizu “disudiel dia mangand” ni muvu wa “2012” mu internet usadidilau antu avud mulong wa kukimbijol, ukez kutan ma paj chitot ma yom yisambinau piur pa kwez kwa nsudiel mu muvu winou. Ov, mulong wak? Mulong kalandriye mukur wa in Maya, wijikena anch “Le compte long” uchindin anch nsudiel ukwikalaku mu muvu wa 2012. Antu avud akamin anch chinech chikutwish pamwing ap kwikal chijingidij cha nsudiel wa mashakamin mudi mutwija.

Antu avud a marelijon itiyijin anch Bibil ulejen anch divu ditumena ni mes akez kudishesh. Atongin anch in kwitiyij awonsu ashinshamena akez kuya mwiur, pakezau kuyisha antu akwau chakwel ashala mu mar pa divu diyimp ap kuyidjibul mu karung ka misiny.

Ov, Bibil ulondin chakin kamu anch divu dikez kusheshik kuyip ap kusheshik diawonsu? Kambuy Yohan wababesha anch: “Kangal witiyany aspiritu awonsu, pakwez yipakany aspiritu anch adi a Nzamb.” (1 Yohan 4:1) Pa ndond pa kwitiyij ching kusu yilondinau antu akwau, mulong wak ufanyidinap kuburil Bibil wey ni kwitangin amwiney yilondinay piur pa nsudiel ya mangand? Chifundishinay Bibil chikutwish kukukashimwish.

[Mazu madia kwishin kwa paj]

[Mazu Marumburila Yipich yidia pa page wa 4]

Kubuzik kwa bomb: U.S. National Archives photo; Foto wa chipepil mukash: WHO/​League of Red Cross and U.S. National Archives photo