Kakatap Kwov Kand Wom wa Disudiel

KWINSUDIEL Kwa mivu ya 1970, Gary nenday Karen asambisha kwikal nich kashinsh anch disudiel dia mangand diading piswimp. Chawiy lel adiokala mu musumb wadingau mwingand ni akwata mupak wa kuwanyish ayinau maswir mau pakad kuchingejin mu yapu yitenchikinau kudi antu a mangand. Awiy asota kupand.

Atambula ukaliweny wadingau nich kuswir, alanda ma buku, andama ku mashikol, ni mu ma seminaire, ni ayileja antu avud nakash. Ipana mu kudim yir ni mitond ya mitapu 50 yibudishina mabuj. Alama mbut ni yom ya kudim nich. Ileja kudim ni kulam yakudia. Murund umwing wayileja mutapu wa kujip anam ni kulam mbij nawamp. Karen wileja mutapu wa kujingunin nawamp mitond ni mij mwitikit chakwel ela kusambish kuyidia anch aburen yakudia. Gary wileja mutapu wa kuumish kabak, wa kurijek ndond ya kupepil kasu mulong wa kulet marungul mu chikumbu, ni kutung chikumbu chiwanyidina.

Karen ulondin anch: “Mulong yom yikash yashikena mu mangand pa chisu chinicha, am niyova anch mashakamin ma antu makez kwikal ni nsudiel piswimp ap.” Gary urumburil anch: “Mudi mwadingau ansand akwau, nading nich mushiku wa kupakish kupwishish katond ka ulombu wa chikit, Njit ja Vietnam, ni kwijond. Pakwez, nashadisha kapamp kamwing ruchingej. Namana anch ang yom yadandamen mwamu antu ayil ku kwishesh ayinau.”

Gary ulondin anch: “Uchuku umwing, pinamana chisu, nasenda Bibil kupwa natanga kusambish ku Mateu djat ni ku Kujingunik. Pasuta kand uchuku umwing, natanga kand chikunku. Pamanch dichuku Diakatan, namuleja Karen anch: ‘Tudi mu machuku ma nsudiel. Piswimp ap Nzamb ukez kuwapish divu. Tufanyidin kuyikimb antu akeza kupand.’” Gary nenday Karen asambisha kuya mu marelijon ni marelijon, mulong wa kuyikimb antu inay asotina kwirijek mulong wa disudiel.

Kupwa, Kaman umwing wa Yehova washika kwol kwau, ni asambisha dilejan dia Bibil. Karen uvurikin anch: “Nakashimuka nakash, mulong anrumburila chakin kamu Bibil. Uyakin piur pa chisu cha nsudiel wawiy unadinga nikimbina, ni nashikena ku kuutan. Rading ruchingej ra kashinsh piur pa machuku ma kurutu. Pakwez, nasambisha kamu nawamp kuta urund ni Tatukwam wa mwiur, Sakatang ni Nzamb wa mangand mawonsu.”

Gary ulondin anch: “Mwom wam wasambisha kwikal nich usey wakin. Pinasambisha kwilej Bibil, kinasotap kwimik. Natanga uprofet wa Bibil, nashinshikina pa uman umekeshina anch ukez kuwanyin chakin kamu, ni nikala nich kashinsh anch Nzamb ukez kasal yom piswimp ap. Nasambisha kutong anch: ‘Antu afanyidin kwirijek, chidiap mulong wa mar, pakwez mulong wa mwom usotinay Nzamb kudi etu.’” Gary nenday Karen ikala nich chitongijok chiwamp piur pa machuku ma kurutu. Pa ndond pa kwakam mulong wa disudiel dia mangand, nikala nich ruchingej anch Nzamb ukez kadiosh milong yiyishikena antu ni kusal anch divu dikala paradis.

Ov, chom ik chisadinau Gary nenday Karen katat pasutin kal mivu 25? Karen ulondin anch: “Nidandamedin kukasikesh rukat ram mudiay Yehova Nzamb ni ritiy ram mudi ndiy, ni nipakishin kuyikwash antu akwau chakwel asala chilik chimwing. Am ni Gary twikasikeshin umwing ni mukwau pitulamina dijuku dietu kwikal dikash ni kwikal mu uumwing mu kumwifukwil Nzamb. Tusadil usu wa kwirijek, ni kupipesh mwom wetu chakwel tudandamena kushinshikin pa antu akwau ni pa maswir mau.”

Gary ulondin kand anch: “Nikat kulembil dichuku ni dichuku chakwel Want wa Nzamb weza ni woka mamiliyon ma antu. Nidandamedin kulejan dichuku ni dichuku rusangu ruwamp ra Want wa Nzamb kudi antu akwau, Nikat kulembil chakwel nitwisha kupan ruchingej ra Bibil kudi muntu ap umwing. Mu mivu 25 yasuta, Yehova wangakula nawamp ku malembil minam. Karen ni am twitiyija anch Yehova ukez piswimp ap kukarumun yom pa divu mu mutapu ukash, pakwez tukatap kwov wom wa disudiel.”​—Mateu 6:9, 10; 2 Pita 3:11, 12.

[Chipich chidia pa paj wa 9]

Nlel unou, Gary nend Karen akwet musangar wa kuyikwash antu akwau chakwel ikala nich ruchingej ridiokila ku uruu wa Bibil