Muntu Kanang Udi Mwi Ndond ya Muspiritu Ov, Nany?

Mwimputu, ipal a mband umwing wandamin mu egliz nich usang wend mu chikas, kupwa was manungun nich kalimish kurutu kwa mukish wa Mariy. Mu Afrique, dijuku dimwing dikat kuzizil maar makatau kutazuk anch gin ku jinzay ja anamakwau akatish. Mu Amérique, nsand umwing ukat kujil yakudia ni kuchingejin kwambamb ni utonginay anch udi mwangel wend wa kumulam. Mu Asie, mwin kupesh umwing ukat kwosh yom yasalau nich mapapel ma ulombu mulong wa kuyilambul kudi aspiritu a angak.

OV, CHOM ik chidia chapamwing pakach pa antu inay? Antu awonsu itiyining anch kuding yitang ya manangu mwi ndond ya muspiritu yikutwishau kwambamb nau ni yikweta ukaliweny wa kwikal nich usu piur pa mwom wa antu. Pakwez, yitiyij yiney yidiap yisu ap yishimokishina. Chishimokishina chidi anch kudi yitongijok yivud yipwitijadina piur pa nany udinga mwi ndond ya muspiritu.

Amizilima akat kumwifukwil Nzamb umwing​—Allah.a Antu adia mu Kristendom akat kulond anch Nzamb udi Usatu, ukweta Nzamb Tatuku, Nzamb Mwan, ni Nzamb Spiritu Utumbila. In Hindu akat kwitiyij anch kudi tunan twa anzamb ni anzamb amband. Antu akwau alondining anch aspiritu inay ading mu anam, mu mitond, mu mayal, ni mu tuwit. Chikwau kand antu akwau akat kuyibachik kudi mabuku, mafilim, ni ma program ma televizion malejena piur pa angel ni ayilembil, afu ni akish a ulaj, anzamb ni anzamb a mband.

Mulong kudi yitongijok yivud yipwitijadina piur pa anzamb ni pa kwifukwil, kudi kand yitongijok yivud yipwitijadina piur pa mutapu wa kwambamb nau. Choviken anch yidiap mitapu yawonsu ya kwambamb nau yikutwisha kwikal yiwamp. Tongin bil pa chinech: Kurutu kwa kumutazuk muntu ku telefon, tuswiridin kumwijik muntu ututazukina ni kuchingejin anch udingaku chakin kamu ni ukez kututesh. Kupakish kutazuk muntu wa kutongin kusu mu manangu kukutwish kwikal kwakad usey. Chipandakena kand kuyip, kumutazuk muka makasu kukutwish kwikal kwa ubaj.

Chawiy lel, ov, nany udinga chakin kamu mwi ndond ya muspiritu? Bibil kakwilap ching kusu ku chipul chinech pakwez urumburil piur pa nany tufanyidina kwambamb nend ni yitukutwisha kuchingejin. Dandamen kutang mitu ya milong yilondwilaku. Ukutwish kushimok piur pa yom yilejinay Bibil.

[Dizu didia Kwishin kwa paj]