2 Nzamb Kakatap Chakin Kamu Kubangin—Ov, Chidi Chakin?
Wateshap kal pamwing ap anch: “Anch Nzamb ukat chakin kamu kuyibangin antu, pa chinech ukudiosh uyimp ni mar pa mangand. Ni ap kand anch ubangidin piur pa antu awonsu mu uvud wau, kakatap kumubangin muntu ni muntu ipend.”
Chifundishinay Bibil: Yehova Nzamb kakatap kulet uyimp ap mar. (Jakobu 1:13) Ap anch ukutwish kudiosh yiney pa chisu chin chawonsu, ulikidil chisak chijondil chikalaku katat mulong wa kupwish mulong wa ukaleng ni kushinshaman kwa antu walanka kwinsambishil kwa rusangu ra muntu. Ukushiken ching ku kusal pantaliken ni antu ni kudiosh kanvundangesh kawonsu kaletinau kudi antu alikina winyikel wend.—Disambishil 3:1-6; Isay 65:17.a
Kuwejinaku ku kubangin dijuku dia antu mu uvud wadi, Nzamb utukatin nakash muntu ni muntu ipend. Mateu 10:29-31 ulejen anch ukat kushinshikin tuyom tukemp tukemp piur petu ap anch twijap: “Akat kulandish amiswesu aad ku rufalang rumwing, pakwez kwikil muswesu ukutwisha kuwa pansh wakad Tatukwen kwitiy. Chawiy niyen, Nzamb wachindil kal nswich jawonsu jidia ku mitu yen. Chad en, kangal wovany wom, mulong ukwetany usey uvud kupandakanamu amiswesu avud!”
Mutapu kukukwashina kwijik uyakin: Yisu yivud tukat kwipukang antu in chisum ap akad kuyibangin akwau. Chishimokishinap, makasu makwel anch Nzamb kakatap kubangin mayisadil antu avud niyawiy ipuka kumwijik rawonsu ap kumushejin ching kusu anch aman anch kwikil kwa kuya. Kwijik anch Yehova Nzamb ukat chakin kamu kubangin kukutwish kukubachik kusot kwilej nakash piur pend ni kuta nend uruund.
Chilakej, chitwishikin wamulembilap kal Nzamb chad wiyipula anch wading uteshin ap ukukwakul. Bibil utwinkishin kashinsh anch: mwin “Kutesh kulembil” udandamedin kwazuril njil yiney ya kwambambin chisu chawonsu mulong wa antu awonsu amushejidina chakin kamu.—Kuseng 65:2.
Nzamb ukwitin kutek “yakamish yen yawonsu kudi ndiy, mulong ukat kukulamany.” (1 Pita 5:7) Tukutwish kuchingejin pa kubangin kwend ap mu yisu ya mar makash, mulong Dizu diend dilondin anch: “[Yehova] udi piswimp nau awiy akweta michim yinenganena, ukat kuyipandish akweta michim yitudishila.”—Kuseng 34:18.
[Dizu didia Kwishin kwa paj]
a Mulong wa jinsangu jivud piur pa kulikidil kwa mar kudi Nzamb, tal shapitre 11 wa buku Chom ik Chakin Kamu Chifundishinay Bibil?
[Tablo wa jinsangu udia pa paj wa 5]
Anch Nzamb kakatap kubangin, ov, mulong wak utwitin tumulembila?