Ov, Wij?

Mulong wak kwadinga in kuswimp nfalang mu tempel wa ku Yerusalem?

▪ Chisu chikemp kurutu kwa rufu rend, Yesu wayopata antu adinga asadina yom yiyimp mu tempel. Bibil ulejen anch: “Yesu . . . wayopat in kuland ni in kulandish. Wabumburola mes ma in kuswimpish nfalang, ni yipwan ya in kulandish atwinkudimb. Ndiy wayileja anch: ‘Afundil mu mukand wa Nzamb anch: “Chikumbu chamam akez kuchitazuk anch, chikumbu cha kulembil.” Pakwez en wachikarumunany kal kwikal mandam mau ambwitan!’”—Mateu 21:12, 13.

In Yuda a mu mivu chitot ya kusambish adiokala ku jingand ni mal mavud mulong wa kuya ku tempel mu Yerusalem, ni nfalang ja kwol kwau. Pakwez, awiy ading afanyidina kusadil nfalang jiwanyidina mulong wa kufut yisend yau ya pa muvu ya chikumbu cha Nzamb, kuland anam a kupesh, ni kulambul yom yikwau kwa kwisotil. Chawiy lel, in kuswimpish nfalang ading ni mudimu wa kuswimp nfalang jidiokila ku jingand kushalijan chakwel jikala nich usey padingau ni kujisadil. Padinga ni kushejin piswimp misambu ya in Yuda, in kuswimp nfalang inay adinga ni kushakam mu Rupang ra Akamichid radinga mu tempel mulong wa kuswimp nfalang jau.

Yesu walonda anch in kuswimp nfalang inay akarumuna tempel “kwikal mandam mau ambwitan” chinech chimekeshin anch ading akat kupandikesh usey mu kuswimp.