Ov, Chom ik Tukutwisha Kwilejin Kudi Mpongarik?

Mpongarik tukutwisha kwilejin piur pend udi muntu umena wisambina ni Yesu pa chipich. Mpongarik winou witin dilikishin mulong wa yisal yend ya chisum. Ndiy ukat kumwipul Yesu anch: “Winvurikang am piukwandama mu want wey.” Katat, mudi kamu umena pa chipich, Yesu wisambin ni mpongarik winou. Ov, wij yimulejinay Yesu?—a Yesu ukat kumushilamu anch: ‘Chakin am nalond kudi ey ilel unou, ukwikal ni yamam mu Paradis.’

Ov, utongin anch Paradis wisambidinay Yesu pinap ukez kwikal nchik?— Chakwel twikala nich kashinsh anch chakul chidi chakin, isambinany amboku piur pa Paradis wasalay Nzamb mulong wa mband ni ikundj wa kusambish, Adam nenday Eve. Ov, kwisu kwadinga Paradis winou? Ov, wadinga mwiur, ap pa divu?—

Uyingin anch walond anch wadinga pa divu. Chawiy lel anch twatongin piur pa mpongarik anch ukwikal “mu Paradis,” tufanyidin kwijik anch ukez kushakam pinap pa divu pa chisu dikeza kwikal paradis. Ov, Paradis winou ukwikal nchik?— Tal amboku.

Bibil ulejen anch kupwa kwa Yehova Nzamb kuyitang antu aad akusambish, Adam nenday Ev, Bibil ulejen anch ndiy wayiteka mu paradis panap pa divu. Ading amutazukin anch chir cha “mu Eden.” Ov, ukutwish kutong pa mutapu chafanyina kwikal cha ufun chir chinech cha “mu Eden”?— Chakin, chading cha ufun ni ndond yiwamp ya kushakam kupandakanamu yikutwishay muntu ap wisu kuman nlel unou!

Ov, chom ik utongina? Ov, Yesu ukwikal panap pa divu ni mpongarik wita dilikishin mulong wa yitil yend?— Bwat, Yesu ukwikal mwiur ukat kuyikel mudi Mwant mu Paradis pa divu. Chawiy lel, Yesu ukwikal nend mpongarik mu kulond anch ukez kumuvumbul kumudiosh ku rufu ni kuman mutapu ukezau kumubangin mu Paradis pa divu. Pakwez, ov, mulong wak Yesu ukusal chakwel muntu wadinga mpongarik ashakama mu Paradis?— Tushinshikinany pa chinech.

Chakin anch mpongarik winou wasala yom yiyimp nakash. Pakwez mudi mamiliyon ma antu akwau ashakama pa divu. Avud pakach pau, asala yom yiyimp mulong ading kandikal ilejap piur pa Yehova ni pa yom yasotay anch awiy asala.

Chawiy lel, antu mudi inay, kuwejinaku mpongarik walejay Yesu ku mutond, akuvumbuk kwikal aom mu Paradis pa divu. Akwilej chidia rusot ra Nzamb. Pa chinech akutwish kumekesh anch amukatin Yehova.

Ov, wij mutapu ik ukutwishau kumekesh chinech?— Kusutil ku kusal yisotinay Nzamb anch awiy asala. Chikwikal cha musangar mudi ik kushakam mu Paradis ni kwikal pamwing ni antu amukatina Yehova!