Yesu Kristu​—Mutapu Ik Tufanyidina Kumuvurik?

Pa Kachirikin antu avud adia pa mangand mawonsu amening yipich ap yifwatul yimumekeshina Yesu mudi mwan. Udi mwindond yikat kudilau annam ap mushet ujim mutekinau yakudia ya annam. Pakwez, ov, tukutwish kumuvurik kusu Yesu mudi mwan uvadilau lel?—a Twisambinany katat amboku piur pa mutapu umwing wa usey utukutwisha kumuvurukin. Tukutwish kwilejin pa chinech kusutil ku yom yamanau kudi chisak cha atufung ading mwisuku uchuku piswimp ni Betlehem.

Mwangel wayimekena atufung. Wayilej anch: “Akuvadilany kal Mupandish pa dichuku dined . . . ndiy Kristu Mwant.” Mwangel wayileja kand mutapu ukutwishau kumuman Yesu anch “ukumanany mwan amuvungidil mu maswin, ulel mu chidil.” Pawiy pin pa, angel akwau avud amekana ni asambish “kumushiman Nzamb.”

Ov, wela kwov nchik ang wayitesha angel akat kumushiman Nzamb?— Atufung ova musangar mudi ik! Alonda anch “Chifanyidin tuyany ku Betlehem, tutalany chom chashika kal.” Kwinikwa amutana “Mariy ni Josef, amumana kand mwan ulel mwi ndond yikat kudilangau annam.”

Kapamp kamwing akwau eza ku Betlehem kwadingay Mariy nenday Josef. Payirumburilau kudi atufung yom yawonsu yasadika, awonsu ashimoka. Ov, usangaredin pa kwijik yom yiney yamushenang?— Etwawonsu tumukatina Nzamb tusangaredin. Katat talany mutapu kwaleta kuvadik kwa Yesu musangar upandakena. Chakwel tusangera niyetu, tufanyidin kuvurik yasadika kurutu kwa kumwat Mariy.

Dichuku dimwing mwangel utazukinau anch Gaburiel waya kudi Mariy. Washilamu anch ndiy ukez kuval mwan ni “ukwikal mujim, akez kamutazuk anch Mwan wendendiy Udia Piur.” Gaburiel walonda kand anch “ukez kwikal Mwant, . . . want wend kiukez kupwap.”

Mariy wasota kwijik mutapu wela yom yiney kushiken, mulong wading kandikal amanijana ni ikundj. Gaburiel wamurumburila anch: “Ukash wa Nzamb ukez kwikal ni yeyey,” ni “mwan winou utumbila akez kumupil anch, Mwan a Nzamb.” Kumudiosh mwan a Nzamb mwiur ni kutek mwom wend mwivum mwa Mariy chakwel avadika mudi mwan​—chading chilay chijim mudi ik!

Ov, wamanap kal yipich ap mafilim mamekeshina “in manangu” asatu ayila pamwing ni atufung kumutal Yesu udia mwan uvadinau katat?— Pa chisu cha Nowel yipich yiney akat kuyimekeshang ndond yawonsu. Pakwez, yidiap yakin. “In manangu” inay ading chakin kamu in kwilej yom ya atutumb, antu asadina yom yikisinay Nzamb. Talany katat chasadika pashikau. Bibil ulejen anch: “Andama mu chikumbu, amuman mwan ni makwend Mariy.” Pinap Yesu kadingap kand mwan ulela mu chidil; wading mwan ushicha ni Josef nenday Mariy mu chikumbu!

Mutapu ik wamutanau Yesu kudi in kwilej yom ya atutumbu?— Chakusambish “katumbu” kayitalekap mulong wa kuya ku Betlehem, wayitwala kudiay Mwant Herod ku Yerusalem. Bibil ulejen anch Herod wasota kwijik kudiay Yesu chakwel amujipa. Katat tongin pa chinech. Ov, nany utongina anch ndiy wasala anch katumbu amekana mulong wa kuyitwal in kwilej yom ya atutumbu kudiay Herod?— Kadingap Nzamb wakin, Yehova, pakwez wading mukankuny nend, Satan Djabul!

Nlel, Satan usadin usu wend wawonsu chakwel antu amuman Yesu mudi mwan uvadilau nlel wakad diking. Pakwez mwangel Gaburiel wamuleja Mariy anch: “Ndiy ukez kwikal Mwant . . . , want wend kiukez kupwap.” Katat Yesu utakedil mwiur mudi Mwant, ni ukez kashesh akankuny awonsu a Nzamb piswimp ap. Chawiy tufanyidina kuvurik piur pa Yesu, ni chawiy tufanyidina kuyilej antu akwau.