Yipul ya in Kutang

Mulong wak muntu ap umwing kafanyidinap kutek mikand ya Atuman a Yehova pa tupend tukwau twa web ap twa kupalangesh nich jinsangu?

Antu amwing atongin anch mulong tukat kupan mikand yetu chamwamu, akutwish kwau kuyikopiril ap kuyitek pa tupend tukwau twa web ap twa kupalangesh nich jinsangu. Pakwez chinech chikutwish kulet milong yijim nakash ni chikwatijadinap ni mazu madia mu Mutapu wa Kusadila (tal mazu ma kwinshin) tupend twetu. Mazu minam malejen patok anch kwikil muntu ap umwing ufanyidina “kutek yifatul, mikand yidia pa kapend, yijingidij, mizik, yipish, mavideo ap mikand yikwau ya kapend kinak pa kapend kakwau (mudi kapend ka kwanganijadin yom, ka kutumijadin mavideo ap kakupalangeshin jinsangu).” Mulong wak mbil jinej jidi ja usey?

Yom yin yawonsu yidia pa tupend twetu ayichidijin kudi chijil. Chinech chidi cha usey mulong chikwashin kwipuk kusadin kuyimp. Yisu yimwing in kupumbok nau antu akwau asotina kuyipish mudimu wetu akat kutek mikand yetu pa tupend twau mulong wa kupwit manangu ma Atuman a Yehova ni ma antu akwau. Pakwez pa tupend twau twinetu akat kutekap kand yom yikata kuletish kwidjidjek mu yitongijok ya antu. (Kuseng 26:4; Jinswir 22:5) Akwau asadina yom yidia pa kapend ketu ap chipich cha chijingidij cha jw.org mulong wa kusal nich ma piblisite, kutek ma applications mu telefon ap pa yom yilandishinau. Pakwez mulong yom yetu ni chipich cha chijingidij chetu ayichidijin kudi chijil, tukutwish kuya ku ma tribinal majin ni kuyikangesh kusal mwamu. (Jinswir 27:12) Pakwez ma tribinal makutwishap kutukwash anch twayilik antu amwing, ap kand akadivar netu, kutek mikand yetu pa tupend tukwau ap kusadin chipich cha chijingidij cha jw.org mulong wa kulandish nich yom yau.

Chikutwish kwikal cha ubaj anch twatambul yichap yetu pa tupend tukwau, pa ndond pa kusadin jw.org. Yehova ukat kutwinkish yakudia ya mu spiritu kusutin ching “kashalapol ushinshamena ni kubabal.” (Mateu 24:45,TMK) “Kashalapol” winou ukat kusadin tupend twend twa web twijikena mulong wa kupan yakudia ya mu spiritu: www.jw.org, tv.jw.org, ni wol.jw.org. Ni tukwet kwetu ma applicattions masatu mafanyidina kutek mu telefon ap mu tablet: JW Language^®, JW Library^®, ni JW Library Sign Language^®. Pa tupend twinetu ni mu ma applications minam, tukutwishap kutan ma piblisite ap yom yikwau ya mu mangand ma Satan. Pakwez anch twatambul mikand yetu pa kapend kakwau ka web ap mu application mukwau, kudi ubaj anch pamwing ap aswimpinamu kal yom kanang.—Kuseng 18:26; 19:8.

Chikwau kand, anch twatek mikand yetu pa tupend tukutwishau antu kufundol yom, chinech chikutwish kuyiswapel in kupumbok nau antu akwau kufund yom yiyimp piur pa dirijek dia Yehova. Akadivar nau anambaz amwing akat kutadikijan nau antu inay, ni chinech chikatap kumuletin Yehova ntumb. Mambamb mudi minam ma pa Internet udiap mutapu uwamp wa kuswimp yitongijok ya muntu ap wa kumukwash kutesh uyakin. (1 Timote 6:3-5; 2 Timote 2:23-25) Kupwa, antu amwing akat kusal tupend twa web ap twa kupalangeshin jinsangu tumekena mudi twa dirijek ap twa akadivar adia mu Chisak Chitakedila. Pakwez minam madi makasu. Kwikil muntu ap umwing wa mu Chisak Chitakedila ukweta kapend kend ka web ap kont pa kapend ka kupalangeshin nich jinsangu.

Anch twayilej antu kwandam pa jw.org, tukwashin mudimu wa kulejan “rusangu ruwamp.” (Mateu 24:14) Tupend twetu twa web ni ma applications metu yiyil kupandakan kuwap nakash. Tukatin anch muntu mwawonsu ataninamu. Chawiy twitiyijin anch antu ayitumina antu akwau mesaj mulong ikala ni kopi wa mukand ap kuyilej mutapu wa kwandam pa kapend ketu. Mu kusal mwamu tuyitwadin antu ku musul umwing usadidinay Yehova mulong wa kupan yakudia ya mu spiritu, udia “kashalapol ushinshamena ni kubabal.”