Yipul ya in Kutang

Bibil ulondin anch pa kumufund muntu chifanyidin kwikal ni atuman anch akep aad. (Kuch. 35:30; Kuv. 17:6; 19:15; Mat. 18:16; 1 Tim. 5:19) Pakwez mu Chijil alejana anch, ang ikundj wamulal changadim watondinau kal ku usu “mu masuku” chad changadim winou watazwok, changadim kafanyinap kufa nich ku mulong wa masandj pakwez ikundj wafanyina kufa nich. Chad mulong kwadingap antu in kupan uman, mulong wak lel changadim kafanyinap kufa nich ching ikundj?

Rusangu ridia mu Kuvurik Yijil 22:25-27 karilejenap chakusambish mulong wa kumufish nich ikundj, mulong ndiy ufil kal kwend nich. Chijil chinech chading chishinshikidin pa kuman anch mband kakwetap kwend mulong. Shinshikin mutapu wading yom.

Maverse makusambish misambidin ikundj walalang ni mband watondinau kal “mu musumb.” Kusutil kusal mwamu, ikundj winou wading ufil nich ku chitil cha masandj, mulong mband watondinau kal ading amukwatin mudi mband watinau kal. Chading nchik piur pa mband? “Ndiy kabarokap kutazuk mu musumb.” Mulong anch watoya, antu akwau afanyina chakin kamu kumutesh ni afanyina kumukamunin. Pakwez ndiy katoyap. Chawiy, wading niyend wiyandjikin mu masandj, mwamu awonsu ading afil nich.—Kuv. 22:23, 24.

Kupwa, chijil chisambina mwikadil ushalijadina ni wakusambish: “Anch ikundj waya mu masuku, wamutan changadim mu masuku watondilau kal, chad ndiy wamukwat changadim ku usu, walal nend, akez kumujip ching ikundj amwinend. Kangal wasalany chom kudi changadim, mulong kakwetap kwend chitil cha kumujipil. Mulong wa mutapu winou ufanaken mudi muntu umwing ukumuturikina mukwau, wamujip. Ndiy wamutanyin mu masuku, ni changadim watondau kal [wabaroka, pakwez kwadingap muntu mwin] kumukamunin.”—Kuv. 22:25-27.

Mu mwikadil winou, anzwij itiyijang yom yalondangay mband. Mu mutapu ik? Chading chimeken anch “[wabaroka, pakwez kwadingap muntu mwin] kumukamunin.” Chawiy, ndiy kasalap chitil cha masandj. Pakwez ikundj wading ufil nich ku chitil cha masandj mulong ndiy “wamukwat[a] changadim ku usu, walal nend,” changadim wading watondinau kal.

Ap anch chijil chading chimedin nakash pa kumekesh anch mband kakwetap mulong, rusangu rimekeshin patok anch ikundj wading ufil nich ku chitil cha masandj. Tukutwish kwikal nich kashinsh anch anzwij ‘apompishang nawamp’ ni akwatang mupak kukwatijan ni mbil jatekay Nzamb ni jachirikinay tupamp tuvud.—Kuv. 13:14; 17:4; Kub. 20:14.