Chiyul Chetu—Kulondul Njil ya Nzamb ya Mwom
1 Chikunku chijim cha Chikunguril cha distrik “Njil ya Nzamb ya Mwom” chading chiyul twakwata mu diskur dia nsudel. Chikunku chinech chasambisha nich mazu malondwila anch: “Etu . . . twitiyidin nich muchim umwing anch Njil ya Nzamb yidi njil yipandikena kuwap.” Tuvurikany milong yimwing yijim ya chiyul chinech kutwakula anch “MWAWIY!”
2 Chidi chiyul chetu kushal ishitwila kurutu kwa Yehova, pakad manans ku mutambu wa mangand. Tukudandamen kutek rusot ra Nzamb pa ndond ya kusambish mu mwom wetu. Chitusadidila Dizu diend, Baibel, mud ntakel wetu, tukukarumukinap ku katatuku ap ku kamaku, chad lel tukumekesh chakin anch njil ya Nzamb yidi yipandikena kulemp njil ya mangand.
3 Mu mutapu ujim mangand makat kudiwul njil ya Nzamb ni makat kwangul yibudikin ya ngikadil winou. (Yer. 10:23, NW) Chawiy lel tufanyidin kudandamen kwikal afundishinau kud Mulej wetu Mujim, Yehova, ulondina anch: “Yiney yawiy njil. Endilanyimu.” (Isa. 30:21, NW) Njil ya Yehova, mud chiyilejenau mu Mifund, yipandiken kulemp mu mitambu yawonsu. Chakwel kuyilondul, tufanyidin kwisakin nakash yawonsu yitufundishinay Yehova.
4 Kujimb kwa Mafundish ma Yehova: Yehova utufundishin rutong ra kashinsh ra mwom ni mutapu wa kusadil nawamp kupandikan mwom wetu. Utufundishin mutapu wa kurijek mulad wa mwom wetu mu manangu, mu ngikadil, ni muspiritu. Utufundishin kand mutapu wa kushakam mu chisambu ni akadivar netu, dijuku dietu, ni akwetu antu. Yawonsu yiney uyisadiling kusutin buku wend, Baibel ni dirijek diend.
5 Pa chinech, yikumangan yetu yikwet usey ujim. Anch tukumangening ni kwinungin ku yikumangan yawonsu yitan pakad kujing, tutambwil diyiy dimwing diwamp mud aministre a rusangu ruwamp ni mafundish misikena nawamp mu mwom wa Ukristu. (2 Tim. 3:16, 17) Chikwau kand, Mulej wetu Mujim ukat kupan mafundish ma uteokras kusutin yikumangan ni yikunguril. Rutong retu rifanyidin kwikal ra kulik ap pakemp kuburen chikumangan ap chimwing ap chikunguril mud kamu mututwishishina ngikadil wetu.
6 Tudandamenany nich mushiku kulondul Njil ya Nzamb pichuku pichuku, mwi njil yiney tukumushiman Yehova ni kuman kuwap kwa chikupu!—Isa. 48:17, NW.