Shikol ya mujimbu ni rutong rey ra muspiritu
Kutambul malejan mamwing mawamp ma dishin piuchidia nsand kukutwish kukwinkish ukaliweny kanang uswiridina mulong wa kutang ni kufund nawamp ni kwikal ni ronganyin ritandurikina mu jografi, mu histwar, mu tupampish ni mu yisans. Pa chinech, ukutwish kwilej mutapu wa kutong nawamp, kushinshikin milong, kupwish yikokujol, ni kubudish yitongijok yikweta ukwash. Kwilej mud kwinoku kukukukwash mu mwom wey. Ov, shikol ya mujimbu yikutwish kwambatan nchik nich rutong rey ra muspiritu mu mwom ni yikukwashin nchik kwikal ni “manangu makin ni kashinsh”?—Jnsw. 3:21, 22.
2 Ikal mwin ukwash mu mudimu wa Nzamb: Piudia ku shikol, tang matu mu kalas ni kusal nawamp madevwar makwinkishinau. Anch wakulish yaku yiwamp ya kutang ni kwilej, ukutwish kushinshikin Dizu dia Nzamb nawamp nakash ni kulam ukash wey muspiritu. (Midimu 17:11) Ronganyin ritandurikina nawamp rikukukwash kuyishimwin antu a yaku ya ngand kushalijan, yisakin, ni yitiyij kushalijan, antu ukusankana mu mudimu wa kulejan. Shikol yiwilejina yikez kwikal ni ukwash piusendina yisend yey ya Ukristu mu dirijek dia Nzamb.—Tal 2 Timote 2:21; 4:11.
3 Ileja kwikwash amwiney: Anch wikasikesh, ukutwish kand kwilej ukaliweny uswiridikina mulong wa kushakam nawamp anch wapwish shikol. (Tal 1 Timote 5:8.) Tond nawamp shikol yiukwileja. Pa ndond pa kwasil dis ku shikol yakad kutwishish kuman midimu yivud, tongin kwilej shikol ap mudimu umwing ukeza kukukwash kuman mudimu ufanyidina ndond yawonsu. (Jnsw. 22:29) Kwilej mud kwinoku kukutwish kukukwash anch wakwat chiyul cha kusadil ndond kudia kuswirin kujim.—Tal Midimu 18:1-4.
4 Kutambul malejan mamwing ma dishin ku shikol kukutwish kukukwash kutanduril mudimu wey. Ikasikesha kutambul ukaliweny uswiridikina mulong wa kwikwash amwiney piuyila kurutu mu mudimu wa Yehova. Chad lel shikol yey yikez kakukwash kushiken rutong rey ra muspiritu.