“Chishany ku Mes”

¹ Chapwishay kurumburil milong yijim yikwikala chijingidij cha machuku ma nsudel ma ditenchik dia yom dined, Yesu wayikasikesha in kwilej end anch “chishany ku mes.” (Marko 13:33) Ov mulong wak ufanyidinau in Kristu kuchish ku mes? Mulong tushich pa chirung chimwing chiyimp nakash cha chishimu cha muntu. Tukutwishap kwitiy kwikal alela tul muspiritu. Chinech chikwikal chibudikin cha kukangany kwetu kuman usey wa mudimu utwinkishinay Yehova kusal mu chirung chinech cha kwisudiel. Ov udi mudimu ik?

² Yehova ukwet antwend akata kulejan pa divu pawonsu rusangu ruwamp ra Want wend​—⁠ruchingej rimwing kusu mulong wa antu. Kusadin kwetu pamwing ni dirijek dia Nzamb kutumekeshin mud in Kristu akin, onganyidina nawamp chirung ni kuswir kwa kuyikwash antu akwau kutesh “mazu makata kulet mwom wa chikupu.” (Yohan 6:68) Kusal kwetu mudimu winou wa usey nich mushiku kukat kumekesh anch tulelap tul muspiritu.

³ Abachikinau Kulejan: Chitudia Atuman’a Yehova, tuwapidil kwikal ni chitongijok chiwamp piur pa mudimu wetu. Rukat mulong wa Nzamb ni akwetu antu rikat kutubachik muntu ni muntu kubudikin mu mudimu wa kulejan. (1 Kor. 9:​16, 17) Anch twasal mwamu, tukez kwipandish etu ayinetu pamwing nau antu akututesha. (1 Tim. 4:16) Tujijamanany kubudikin chisu ni chisu mud kamu chitwishikina chisu chimwing chilemp ni chifanyidina mu mudimu wa kulejan winyikel upandakena kuwap ukutwishau kwikal nich antu​—⁠Want wa Nzamb!

⁴ Kudi mulong umwing wa usey utubachikina kuswapej nich mudimu wetu wa kulejan​—⁠disambishil dia mar majim dikez kushiken pa chisu chitusadila kamu mudimu winou. Kuburen kwetu kwijik dichuku ni chisu kutwitin kuchish ku mes ni kwikal tayad chisu ni chisu, kulembil ni kuchingejin kud Yehova. (Efe. 6:18) Mudimu wa kulejan udandamedin kwiwejinaku. Pakwez dichuku dimwing kurutu oku, mudimu ujim nakash wa kupan uman mu chishimu cha muntu ukushiken pa chintamp chimwing chijim.

⁵ Tushishamanany kulondul mbil ya Yesu ya ‘kuchish ku mes.’ Chinech chidi kamu cha usey nakash. Tuwapidil kuchisal nich chitongijok cha kuswapej. Dichuku ni dichuku, twikalany ajikishina muspiritu, ababela, ni akweta mushiku mu mudimu wa Yehova. Mwaning, tuwapidil “kuchish ku mes ni kubabal.”​—⁠1 Tes. 5:⁠6.