Yakul ku yipul yen

◼ Ov mulong wak chidia cha ukwash kud in kutesh kutang mifund pa chisu chiyitinau kud mwin kupan diskur kuchisal?

Milong mud mutu wa mulong ni kutal anch diskur dikwet kushinshikin kwa verse ni verse wa chikunku cha Dizu dia Nzamb yawiy yikeza kulejan uvud wa mifund yikutwishau kuyit in kutesh kutang.

Chidi cha usey kwijik anch chikatau kutangin mifund chidi mulong wa kumekesh anch yilondinau yidiokil mu Baibel. (Midimu 17:11) Pakwez rutong rikwau ridi ra kushinshikin uman wa Mifund mulong wa kukasikeshin yisambidinau chakwel ritiy ra awonsu rikala rikash. Kuman yilondina chakin Baibel chisu chitanginau mufund umwing wa usey kukukwash manangu ma in kutesh. Kuwejin ku kutang kwa mifund, chidi kand cha ukwash kufund milong yijim ni kudandamen kulondul yitongijok yivud yirumburilau.

Anch plan wa Sosait ukwet Mifund yivud yisambidinau mu mutu wa mulong kanang, Mifund yiney ayitekin mulong wa mwin kulond, ni kumukwash kwirijek. Mifund yiney yikutwish kumuvurish jinsangu ap kand kumukwash kuvurik yany ya mifund ya dishin ni kutesh kurumburik kwa mutu wa mulong. Mwin kulond ukat kujingunin mifund ik yidia ya usey mu kurumburil kwa diskur ni kuyit in kutesh kulondul pamwing nend pa chisu chiutanginay ni kuurumburil. Mifund yikwau yiletina ukwash yikutwish kwikal yijimbwilau ap yirumburilau kud mwin kulond, pakwez pa chisu mud chinech in kutesh kakwetap kuswir kwa kuyitang.

Chisu chitanginay mwin kulond mifund yitondinay, ufanyidin kutang kapamp kamwing kamu mu Baibel kangal pa dipapel dichapinau kal. Chisu chiyitinay in kutesh kutang pamwing, mwin kulond ufanyidin kwijikish nawamp buku wa Baibel, shapitre, ni verse (maverse). Kuchingel chakwel kulangwish chipul ap kurumburil pakemp chitangidinau mufund kukuyinkish in kutesh chisu cha kutan mufund. Kuchirikin kujimbul mufund kukuyikwash kand in kutesh kuvurik referans. Pakwez, kichiwapinap kujimbul nimero wa paj padia mufund, mulong Mabaibel masadidinau in kutesh makutwish mikal mashalijadina. Kutang mifund patwitinau kuchisal kukwashining in kutesh kutambul ukwash udiokila ku usu wa Dizu dia Nzamb padirumburilau pa chisu cha diskur.​—⁠Heb. 4:⁠12.