Yehova ukat kupan ukash
1 Ov mutapu ik ukata kumuman mupostol Paul? Pitutangina buku wa Midimu, tukat kusanger mutapu wadingay nich mushiku mu mudimu wa Yehova. Ov mutapu ik wawanyishay Paul yawonsu yasalay? Walonda anch: ‘Nikutwish kusal yom yawonsu mwi ndiy ukata kwinkasikesh am.’ (Filp. 4:13) Niyetu tukutwish kutambul ukwash udiokila ku ukash upaninay Yehova. Ov mutapu ik? Anch twatambul ukwash wa yitenchik musamban yarijekinay chakwel kutwinkish usu ni kutukasikesh muspiritu.
2 Dizu dia Nzamb: Mud kamu mutapu tufanyidina kudia yakudia chakwel kulam mujimbu wetu ukash, tufanyidin kwidish ayinetu nich Dizu dia Nzamb chakwel kwikal ni mwom muspiritu. (Mat. 4:4) Baibel utwinkin ukash wa kutukwash. Chakwel kushal akweta mushiku ni musangar mulong wa uyakin, tufanyidin kwipan mu kwilej kwa kashinsh kwa muntu ipend ni kutongin yitwilejina, dichuku ni dichuku anch chitwishikin.—Kus. 1:2, 3.
3 Kulembil: Chidi cha usey kumushejin Yehova, nakash kamu pa chisu tukweta kuswir kwa pakampwil (mar). Kusutin spiritu wend, ukat kupan ukash kud antu akata kumwit mu kulembil. (Luka 11:13; Efe. 3:16) Mifund yitukasikeshin ‘kulembil yisu yawonsu.’ (Rom 12:12) Ov ukakuchisalang?
4 Chikumangen: Tutambwil kand ukash ni kukasikesh kudiokila ku yikumangan ya chikumangen ni ku urund wa chirungil nau akadivar netu ni anambaz. (Heb. 10:24, 25) Pitudia ni milong, akat kutukasikesh ni kutukwash nich rukat.— Jinsw. 17:17; Mul. 4:10.
5 Mudimu wa Chingand: Kubudikin pakad kujing mu mudimu wa kulejan kutukwashin kutek yitongijok yetu pa Want ni yiyukish yau. Spiritu wetu ukat kukasikan chisu tukata kuyikwash akwau kwilej piur pa Yehova. (Mid. 20:35) Kadiap awonsu pakach petu akutwisha kusal mudimu ndond yikweta kuswir kujim ap kusal mudimu wa chisu chawonsu, pakwez tukutwish kulejan mu mitapu yikwau yiwanyidina.—Heb. 6:10-12.
6 Atulam In Kristu: Tutambwil ukwash udiokila ku kukasikesh ni ukwash upaninau kud amakurump. Yehova uyitin kulam yisak ya amikoku a Nzamb yiyinkishinau. (1 Pit. 5:2) Atulam in kwendangan akat kukasikesh yikumangan yikatau kwendil, mudi kamu mwasalay Paul pa chirung chend.—Rom 1:11, 12.
7 Yilikej ya in Kristu ashinshamena: Chikasikeshin pa kuman yilikej yiwamp ya kushinshaman kwa ambay etu mu mudimu, a pasak ni a pa chirung cha katat. (Heb. 12:1) Anch tukwet kuswir kwa kwikal ni usu, ov tukutwishap kutang rimwing ra jinsangu jikasikeshina ja mwom wa muntu mu magazet metu, rapor ukasikeshina udia mu Annuaire, ap jinsangu jimwing jikasikeshina ja chishimu cha machuku ma katat cha Atuman’a Yehova mu buku Prédicateurs?
8 Mukadivar umwing, ukweta katat mivu 90 ni kusut, witiya uyakin padingay mwanikanch. Padingay uchidi nsangarum, ritiy rend ariteka mu choziu. Chakusambish, yidi yimwing ya chikumangen yalika dirijek dia Yehova. Kupwa kwadinga mudimu wa kulejan ku chikumbu ni chikumbu wadingay ni kuman mud umukasikedin. Pakwez, ndiy wengamina sens padi Yehova. Kusut kwa machuku wasangera mudimu wa kulejan. Ov chidi nchik nlel? Chikalap nchik kuburen ukash wa mujimbu, uchidi ni katat chid cha dijuku dia Betel wa Brooklyn, ni ukat kusadin mu Chisak Chitakedina Midimu ya Atuman’a Yehova. Kinaninap mulong wa kulamat ku dirijek dia Yehova.
9 Nambaz umwing udia chid cha dijuku dia Betel wa Angleterre watambula dibatish padingay uchidi ni mivu 13. Muvu walondulap wasambisha mudimu wa uchibol pamwing ni yayend, ni kupwa kwa muvu umwing, tatukwend amukasa mu rukan mulong wa kulik kwiyandjik mu milong ya mangand pa chisu cha Njit ya Mangand II. Wadandamena kukimb ukash wa Yehova, ni kudandamen kusadin Nzamb wakin. Kupwa, watijana ni mukadivar umwing ushinshamena, ni mwaad wau awonsu adandamena pamwing kusal rusot ra Yehova. Kupwa kwa mivu 35 ya uruu, nfumwend wafa rufu rumwing ra rinkaku. Watambula kand ukash wa Yehova, ni wadandamena kumusadil djat ni nlel muten, nich ruchingej ra kusadil chikupu mu dijuku dia pa divu pawonsu dia Yehova.
10 Yehova ukat kuyikwash ni kuyikasikesh atushalapol end ashinshamena. “Ukat kupan ukash kud antu in kuswel; ni kud antu aburedina usu wa mwom ukat kwizwish sens ukash.” Tukutwish kutambul musul winou wa ukash wakad mimbu anch twatambul ukwash wa yitenchik musamban yijimbwilau kwiur oku. Vurik anch: “Antu achingejina kud Yehova akez katambul ukash. . . . Akez kuchin mau ni kakezap kuziy; ni akez kend ni kakezap kuswel.” (Isa. 40:29-31, NW) Paul wileja nakash piur pa Yehova mulong wa ukash, niyetu tufanyidin kusal chilik chimwing.