Pan uman mud mutej muwamp
1 Yesu walonda ‘kumukat mukwen mud muwikatila amwiney.’ (Mat. 22:39) Chakin kamu, “usadilany nawamp” kud ambay akaritiy, ov ukutwish kujimbish rukat rey kud antu ushichinga nau piswimp? (Gal. 6:10) Ov mu mitapu ik?
2 Nich Kwiyijikish Amwiney: Ov amutej ney ij anch ey udi Kaman? Anch bwat, ov mulong wak kulik kuyendil mu mudimu wa chingand? Yibudikin yikutwish kukukashimwish! Ap anch wiyovil nawamp, pakish kuyilej uman wa kukashimun. Pa chisu chidau ku yikumbu yau, ukutwish kuyiman akat kusal mudimu mu rupang rau ap chisu chimwing akat kwipuwangej mwi njil. Isamba nau nich masip. Pakish kwisambin yitiyij yey, kuyilej ndond yidia Chot cha Want, ni yikatau kusal mwinimwa, ni kuyijikish muntu mukwau ushichanya nend piswimp ukata kukumangan. Yitazuka kwez ku yikumangan. Kwat chiyul cha kupan uman piur pa rusangu ruwamp kud muntu mwawonsu wija.—Mid. 10:42; 28:23.
3 Nich Chilikej cha Ngikadil Yey: Ngikadil yey yikat kulond yivud kud arund ney piur peyey amwiney ni yikutwish kufungul chis cha kupanin uman. Yikat ‘kutumbishang kand malejan ma Nzamb.’ (Tit. 2:7, 10) Mekesh kuyibangin akwen kwa kashinsh. Ikal murund ni mwin chovu. Limish mbil yau ya kulik kwandam mu milong yayen ni kushakam ku matu zoong mwi nsulangen. Anch umwing pakach pau wayel, ikal mwin kutongin ni udia tayad kupan ukwash. Anch dijuku disu diahamin piswimp ni ndond ushicha, yang ni kuyilangwish. Yisalijok mud yiney ya rukat yikat kupanang chitongijok chiwamp cha kwitiyik ni yikat kumusangaresh Yehova.—Heb. 13:16.
4 Nich Chifu cha Kwinang: Kwikal mutej muwamp kurumburikin kand kulam chikumbu chey chakwel chikala chimekena nawamp. Chikumbu ni rupang yinangina ni yisangareshina yidi ni yawiy uman. Pakwez chikumbu chikisina ap chikweta yom yidia mu upalakas chikukisish uruu wa Want. Chawiy lel, chidi cha usey nakash kulam chikumbu chey, rupang rey, ni motak (ap nking) wey yinanginang ni ya kurijek nawamp.
5 Kuyitongin antu adia pol pa chikumangen cha Ukristu kumekeshining rukat riuyikatina amutej ney. Ov chom ik chikutwisha kubudikinaku? Chikutwish kwikal chiwamp anch “aman midimu yen yiwamp,” amwing pakach pau akez ‘kumutumbish Nzamb.’—1 Pit. 2:12.