Ov Chom ik Chifanyidina Kusal Anch Tour de Garde wa Kwilej Kwikil?

Chikat kushikenang anch yikumangen yilika kutambul Tour de Garde kurutu kwa chisu mulong wa kumwilej kulondulijan nich program wa mangand mawonsu. Ov chom ik chifanyidina kusal pa chinech? Kudi yom yaad ya kutal.

Cha kusambish, mu jindond jikwau ja mwab wetu Tour de Garde ukat kuchelewang kushik chisu chawonsu. Pa chinech, chisak cha amakurump chiwapidil kushinshikin nawamp anch ileja Tour de Garde nich kucheleu kwa angond aad ap asatu kulondwish ni chisu chisadilay chakwel amutambula. Chawiy lel, muntu ni muntu mu chikumangen ukwijik nimero wa Tour de Garde ukwilejau.

Cha kaad, chisu chimwing kwikil Tour de Garde wa kwilej mu chisu kanang. Chinech chikat kushiken kulondwish nich milong kanang yakad kwengamin pad Sosait. Mu yisu mud yiney, yikumangen yikwilej Tour de Garde nich kucheleu kwa muvu umwing. Chirumburikin anch chilikej tufanyidin kwilej Tour de Garde wa Ndol-Mem 1, 2001, kulondul program wa mangand mawonsu ni anch kashikinap, yikumangen yikwilej Tour de Garde wa Ndol-Mem 1, 2000. Chad anch mu chisu chinech Tour de Garde washik, yikumangen yikez kuchirikin kulondul kand program wa mangand mawonsu. Tukukimbap kwilej yom yasutina mu dilejan dia Tour de Garde yitwaburedina kwilej. Pakwez, chisak cha amakurump chikez kutenchik chakwel malejan minam amasutisha mud diskur ku mutu wa mulong umwing wa kwilej. Chawiy lel, anch mud mitu ya milong yaad ap yisatu ya kwilej, ukwikalany ni madiskur ma pibur maad ap masatu. In kulond akutondau kusal madiskur afanyidin kutal nawamp anch kangal adiokal mu mutu wa mulong ni kwipuk kwisambin yitongijok yakad kwambatan ni mutu wa mulong.

Tumukasikeshin mwin kulejan mwawonsu ni dijuku ni dijuku kulam nawamp ma Tour de Garde mau mulong wa kwikal tayad kutan swa Tour de Garde wa muvu wasutina pa chisu chikuburena Tour de Garde wa kwilej kulondwish ni program wa mangand mawonsu. Sosait ukudandamen kusal usu wend wawonsu chakwel yikumangen yitambula pa chisu chifanyidina Tour de Garde chakwel yitwisha kulondul nawamp program wa mangand mawonsu.