Ritiy Retu Rikat Kutubachik Kusal Midimu Yiwamp
1 Ritiy rayibachika Nowa, Moses, ni Rahab ku kusal yisal. Nowa watunga waat. Moses washa ukwash wa kachisu kakemp wa mwom mu chikumbu cha Farao. Rahab wayijindjika in kutentish ngand ni kuziyil ku yamulejau, ndiy wapandisha in chikumbu chend. (Heb. 11:7, 24-26, 31) Ov, ritiy retu rikat kutubachik kusal midimu ik yiwamp katat?
2 Kupan Uman: Ritiy rikat kutubachik kwisambin piur pa Nzamb wetu ukwamushena ni piur pa yitenchik yend yisadilay mulong wa musangar wetu wa chikupu. (2 Kor. 4:13) Yisu yimwing, tukutwish kwidjidjek kupan uman. Pakwez, anch ‘twamutek Yehova kurutu kwetu chisu chin chawonsu,’ tukwikal nich usu ni kupandakan wom. (Kus. 16:8) Chad lel ritiy retu rikat kutubachik kuyilej anamakwetu rusangu ruwamp, amutej netu, arund netu a mudimu, arund netu a shikol, ni antu akwau pichifanyidina.—Rom 1:14-16.
3 Kukumangan Pamwing: Kukumangan pakad kujing ku yikumangan udi mudimu ukwau uwamp udiokila ku ritiy. Mwi njil ik? Kukumangan pakad kujing kukat kumekesh kwitiyin kwetu anch Yesu udi pamwing netu kusutin ku spiritu utumbila wa Nzamb chisu tukumangena pamwing ku yikumangan ya Ukristu. (Mat. 18:20) Kukat kumekesh kuswir kwetu kwa ‘kutesh yom yilondila mwiku utumbila ku yikumangen.’ (Kuj. 3:6) Tukat kutesh nich kashinsh yany tukata kutambul mulong kusutin ku ritiy retu tukat kutesh anch utufundishina udi Mulej wetu Mujim, Yehova.—Isa. 30:20, NW.
4 Kutond Kutukata Kutond: Ritiy retu rikash ra yom ya kashinsh yakad kumekan rikat kutubachik kutek yom ya muspiritu pa ndond ya kusambish mu mwom wetu. (Heb. 11:1) Chinech chirumburikin kand kupan milambu ya mapit metu. Chilikej, mukurump umwing walika kwitiyin ndond ya piur yikweta nfalang jivud mu mudimu wend wa ku mujimbu mulong wela kumwit kusal midimu nakash ni kumukangesh kukumangan ku yikumangan yimwing, kwikal kulemp ni dijuku diend, ni kupwa kulik mudimu wend wa uchibol. Tutekany ni yetu ruchingej retu rawonsu mu kushinshikin kwa Baibel anch Yehova ukupan ukwash kud antu akata ‘kudandamen . . . kukimb bil want ni kutentam kwend.’—Mat. 6:33.
5 Usu usutina chipim ukata kusadil ritiy mu mwom wetu kiukwikalap wakad kumekan kud antu akwau. Chakin kamu, ritiy retu rijiken pa divu diawonsu. (Rom 1:8) Chawiy lel, tumekeshany etu awonsu, kusutin ku midimu yetu yiwamp anch ritiy retu ridi ni mwom.—Jak. 2:26.