Ov “Ukatil” Kuyikwash Antu Akwau?
1 Chakin kamu Yesu wadinga ni kuyibangin antu. Chisu chamwilembilau kud muyej wa mak chakwel amukwasha, Yesu wonina chikas chend, wamukwat ikundj winou, ni walond anch: “Nikatil kukok, chawiy katat yerik!” (Marko 1:40-42) Mutapu ik tukutwisha kwimburij mwikadil wa Yesu pantaliken nich kuyikwash antu akwau?
2 Antu in Kusanger: Muntu ni muntu mu chikumangen ukwet chisend cha kuyikwash antu in kusanger kwikal in kumwifukwil Yehova. Pezinau antu asu ku yikumangan, yilangwishany ni kwijikijan nau. Kimbany mutapu wa kuyikasikesh. Yijikitishany mulong wa yakul yipaninau. yijikitishany mulong wa usu usadilau chakwel kusadil yijidik ya Baibel mu mwom wau. Yikwashany kuman mitapu yikwetau ya kwikal ni arund akin mu chikumangen.
3 Anamakwetu in Ritiy: “Anamakwetu in ritiy” afanyidin kamu ukwash wetu mu mitapu kushalijan. (Gal. 6:10) Avud akat kurish nich milong ya ukash wa mujimbu. Anch waya ni kuyendil mulong wa kuyikasikesh, ukutwish kuyikwash nich urund uswiridikina ni pamwing ap kuyikwash kand mu mutapu uwamp. Amwing niyawiy akutwish kwikal arishina nich mar ma mulad kanang mu mwom wau. Tumekeshany kubangin kwetu nich kwitekinaku chisu cha kuyitesh ni kuyikasikesh. (1 Tes. 5:14) Amakurump niyawiy aswiridin kusadil kwetu pamwing nau chiwanyishilau yisend yau. (Heb. 13:17) Anch twamekesh spiritu wa kusot kukwashijan, tukutwish ‘kwikal ukwash ukasikeshina’ kud anamakwetu in ritiy.—Kol. 4:11.
4 Yid ya Dijuku: Tufanyidin kand kwikasikesh kwilikej kubangin kwa Yesu piur pa antu adia mu dijuku dietu ayinetu. Kubangin kwa kashinsh kukat kuyibachik anvaj ‘kuyikand anau nich malejan ni kubabesh kwa Yehova.’ (Efe. 6:4) An akutwish kusal ya ku mutambu wau nich kwikal tayad anch chisu cha dilejan dia dijuku, cha yikumangan ya chikumangen, ap cha mudimu wa chingand chawanyin. An akudila kal akutwish kumekesh riy ra Yesu ku kuyikwash nich rukat anvajau arishina nich mar makata kwez nich kunanap. Mu mutapu winou ni mu yikwau kand, etu awonsu tukutwish ‘kumekesh kudandamen kud Nzamb mu dijuku diau [dietu].’—1 Tim. 5:4.
5 Pitumwimburijina Yesu mu kuyikwash antu akwau, pamwing ap tukutwish kuyikwash kukepish yikokujol ni kushejish dijuku dietu ni chikumangen mu kwinung pamwing. Chipandikenamu yawonsu, tukat kulet katumb kud Yehova, ‘Tatuku mwin riy.’—2 Kor. 1:3.