Ijikishany Uyakin Piur pa Yesu
1 In Kristu azizidilau many, pamwing ni arund nau amikoku akwau, ‘akwet mudimu wa kupan uman wa Kristu.’ (Kuj. 12:17) Winou udi mudimu wa usey nakash, mulong dipandish ditwishikin ching mudiay ndiy.—Yohan 17:3; Midimu 4:12.
2 ‘Njil, Uyakin, ni Mwom’: Yesu walonda anch: “Am yam njil, yam uyakin, yam kand nikata kupan mwom.” “Kwikil muntu ukutwisha kwiyil kwa Tatuku ching wasutil kudi am.” (Yohan 14:6) Ching kusu kusutin kud Yesu, udia “njil,” kwawiy tukutwisha kusejin kud Nzamb mu malembil ni kwitapil dilau dia urund pamwing nend ndiy. (Yohan 15:16) Yesu ndiy “uyakin” chirumburikin anch uprofet wawonsu ni mwizuzwimb wa yom yidia mu Mifund ya Uhebereu yikala uyakin mwi ndiy. (Yohan 1:17; Kol. 2:16, 17) Chakin kamu, rutong ra kusambish ra uprofet wakin ridi ra kupan chitokish pa ndond yend ya kusambish mu kuwanyish kwa rutong ra Nzamb. (Kuj. 19:10) Chikwau kand, Yesu ndiy “Mwom.” Chakwel kutambul chiyukish cha mwom wa chikupu, antu in awonsu afanyidin kusadil ritiy mu yakupesh ya difut diend.—Yohan 3:16, 36; Heb. 2:9.
3 Mutu ni Mwant Uyikedila: Antu afanyidin kand kwijik usu ujim wa wintakel wamwikinshay Yehova, Mwanend. Yesu amudisha kal kwikal Mwant wa Want wa Nzamb—“ndiy ukez kuziyilau kud antu.” (Dis. 49:10) Chikwau kand, Yehova wamutonda kal ndiy kwikal Mutu wa chikumangen. (Ef. 1:22, 23) Tufanyidin kuyikwash in kwilej netu Baibel kutesh mutapu ukatay Yesu kutakel chikumangen ni kumusadil “kashalapol wakin ukweta manangu” mulong wa “kuyangen yakudia pa chisu chiwanyidina.”—Mat. 24:45-47.
4 Mwin Kupesh Mujim Ukweta Riy: Chamupakau mu yoziu ni kuman mar mud muntu, Yesu “ukutwish kuyikwash antu adia mu yoziu.” (Heb. 2:17, 18) Chidi cha musangar mud ik ku mutambu wa antu akad kuwanyin kwilej anch Yesu ukat kuyovil riy mulong wa kuziy kwau ni ukat kuyitin nich riy dilikishin! (Rom 8:34) Pa dishin dia yakupesh ya difut dia Yesu ni kusutin ku mudimu wend mud Mwin Kupesh Mujim, tukutwish kumusejin Yehova “nich ruchingej” chakwel “kutukwash pa chisu chitukweta kuswir.”—Heb. 4:15, 16.
5 El usu wetu wa kusot kuyijikish antu akwau uyakin piur pa Yesu uyibachika kuziyil ni kumusadil pamwing netu.—Yohan 14:15, 21.