Yimekeshinany “An Anshon” Rukat Ridimukina
1 Yehova udi “tatuku wa an anshon.” (Kus. 68:5) Kubangin kwend mulong wa kuwap kwau kumeken mu chijil chapanay ku muchid wa pakur wa in Isarel: “Kangal kumumesh mwadiamufu mar ap mwan anshon. Anch ey wamumesh mar, chad ndiy wadidil kudi am, chawiy am nikez kutesh kwinan kwend.” (Kub. 22:22, 23, NW) Chijil cha Nzamb chadinga kand ni yitenchik ya kuyikwash antu mud inay mu maswir mau ma yom ya ku mujimbu. (Kuv. 24:19-21) Mu ditenchik dia Ukristu, in kwifukwil akin ayinkin chiyul cha “kuyikwash an anshon ni adiaafu [mu mar mau, NW].” (Jak. 1:27) Mutapu ik tukutwisha kwimburij rukat ridimukina ra Yehova mulong wa antu alidinau mu majuku makweta nvaj umwing ap maurikina mu ritiy?
2 Mafundish ma Muspiritu: Ang udi nvaj ulidina an amwiney ap anch mwin kwol kwey udi wakad kwikal mu ritiy, kutakel kwey dilejan dia Baibel pakad kujing pamwing ni aney chikutwish kwikal chikasikeshina. Pakwez dilejan dia Baibel diakad kujing ni dirumburikina didi dia usey nakash ang usotin anch aney akula ni kwikal amakurump amwing isikena ni akudila mu manangu. (Jinsw. 22:6) Kwisamb nau pichuku-pichuku piur pa yom ya muspiritu kudi ni kwawiy kwa usey. (Kuv. 6:6-9) Yisu yimwing, ukutwish kwov kuziy, pakwez kangal walik. Karumukin kud Yehova mulong wa kwit usu ni umutakel ni ‘dandamen kuyikand ni kuyibabesh [aney] nich malejan ma Yehova.’—Ef. 6:4.
3 Anch usotin ukwash kanang mu kuwanyish kwa yisend yey ya Mifund, yijikisha amakurump maswir mey. Akutwish kwikal tayad kukwinkish yiyul yisadila ap kukukwash kutenchik chaku chiwamp cha muspiritu mu dijuku diey.
4 Mutapu Ukutwishau Antu Akwau Kuyikwash: Mu mivu chitot ya kusambish, Timote wikala kashalapol wa Yehova ukweta mushiku ap anch ndiy wapamina mu dijuku diaurikina mu ritiy. Mushiku wa makwend ni ngakend mband wa kumufundish mifund yitumbila mu wanikanch wend wasala mudimu umwing ukash. (Midimu 16:1, 2; 2 Tim. 1:5; 3:15) Ap mwamu, watana kand ukwash ku urund wend pamwing nau in Kristu akwau, ni mupostol Paul, muntu wisambina padiay Timote mud “ndiy udi mukarukat nam ni mwan ujijamedina mu Mwant.”—1 Kor. 4:17, TMK.
5 Chilik chimwing kand ni nlel, chidi cha ukwash mud ik anch akadivar akudila muspiritu ni anambaz amekesh rukat rudimukina pantaliken nau an anshon amakundj ni amband adia mu chikumangen! Ov umwij umwing ni umwing pa dijin diend? Ov ukat kwisambang nau ku yikumangan ya Ukristu ni mu yisu yikwau? Yitazuka chakwel kubudikin ney pamwing mu mudimu wa chingand. Pamwing ap ukutwish kuyandjik, pamwing ni nvaj wau ap nvaj mwin ritiy, mu dilejan diey dia dijuku ap kwitenchik nawamp mulong wa kwiswedish nau pamwing. Anch ansangarum inay akuman mud murund nau, chakin akutwish kwimburij chilikej chey ni kwitiy dikasikesh diey.—Flp. 2:4.
6 Yehova uyibangidin nakash an anshon amakundj ni amband, ni ukat kuyukish usu tusadila nich rukat mulong wa kuyikwash kwitiy, kukat ni kushakam kwambatan nich uyakin. An avud apamina mu majuku makweta nvaj umwing ap maurikina mu ritiy atambula dikasikesh mud dined ni akat kusadil katat mud ayibol a rawonsu, ankwash’a mudimu, amakurump, atulam a minyimuku, amishoner, ap mud yid ya dijuku dia Betel. Etu awonsu tukimbany mitapu ya ‘kukudish nakash’ rukat retu mulong wa an anshon, ni kumwimburij Tatukwetu wa mwiur.—2 Kor. 6:11-13.