Yakul ku Yipul Yen

◼ Ov yibabesh ik tufanyidina kuta muchim pitupanina uman kud antu a rukan?

Mu mangand ma kabuj mudi piswimp antu a rukan mamiliyon chinan, amwing pakach pau amekeshin kusanger mulong wa rusangu ruwamp. (1 Tim. 2:⁠4) Biro umwing wa mutiy ukat kutambulang ngond ni ngond piswimp mikand 1400 yidiokila kud antu a rukan ni kud yid ya majuku mau akat kwit mabuku ap kuya ni kuyendil. Ap anch kusanger kwa antu avud a rukan kudi kwa kashinsh, uman ulejen anch amwing akat kumekeshang kusanger kwa makasu, chakwel kukimb kutaninamu ukwash wau wa choy kudiokal kud antu a Nzamb. Pa chinech, antu awonsu afanyidin kuta muchim ku yibabesh yilondwila ey piur pa kupan uman kud antu a rukan.

Chisu chivud antu a rukan akat kuyishimuninang kusutil ku kuyifundin mikand. Chifanyidinap anch anambaz ayifundinang amakundj akasinau mu rukan, ap anch chidi mulong wa kuyikwash muspiritu. Chisend chinech afanyidin kuchisend ching kusu kud akadivar awanyishinau nawamp. Anambaz awanyishinau nawamp akutwish kuyit kuyifundin amband adia mu rukan amekeshina kusanger kwa kashinsh mulong wa uyakin wa Baibel. Chifanyidinap kuyitumin antu a rukan nfalang ap yipan ya muntu ipend, ching anch ayit yom yiney.

Anch muntu a rukan wamekesh kusanger, chifanyidin kupan dijin diend ni adres wend ku chikumangen chidia mu teritwar mudia rukan. Chisu ni chisu akadivar awanyishinau nawamp ijing mutapu wa kupwish milong kushalijan yikutwisha kulank. Anch chikumangen chijikenap kwau, chifanyidin kutum rusangu riner ku biro wa mutiy.

Chidiap kwau chiyimp kud akadivar inkinau chisend chinech kusal yikumangan nau antu a rukan chakwel atwisha awonsu kwilej kapamp kamwing. Pakwez, yinship ya pakampwil yiyitina in kulejan kukumangan mu wan ipau pamwing nau antu a rukan yifanyidinap kusadikin mu rukan. Chikwau kand, chidiap cha manangu kud in kulejan kumwendil muntu udia mu rukan pakad rutong rijikena ni kwikal ni urund wa piswimp nakash nau antu adia mu rukan.

Tufanyidin ‘kubabal mud nnak, chad kwikal wakad mulong mud atwinkudimb’ pituyilejina antu a rukan rusangu ruwamp.​—⁠Mat. 10:⁠16.