Umwing Wakin wa Ukristu—Utwishikin Nchik?
1 Chom ik chitwishishina kunung mu umwing amiliyon musamban ni kusut a antu a jingand 234 ni yisak yilondila piswimp jindim 380 kushalijan? Ching kusu difukwil dia Yehova Nzamb. (Mik. 2:12; 4:1-3) Atuman’a Yehova ij kusutin ku uman wau ayinau anch umwing wa in Kristu akin udi wakin nlel. Mud “chisak chimwing” ni “kafung . . . umwing,” tukwatin mupak wa kurish nich mwiku wa mangand wa kwauril antu.—Yohan 10:16; Ef. 2:2.
2 Rutong rakad kukangany ra Nzamb ridi anch yitang yawonsu yikweta manangu yikal mu umwing mu difukwil diakin. (Kuj. 5:13) Kwijik usey wa chom chinech, Yesu wasala malembil ma kashinsh mulong wa umwing wa in kumulondul end. (Yohan 17:20, 21) Ov mutapu ik ukutwishay muntu ni muntu udia pakach petu kutwal umwing wa chikumangen cha Ukristu kurutu?
3 Mutapu Umwing Utwishikina: Pakad Dizu dia Nzamb ni mwiku wend utumbila, umwing wa Ukristu welap kwikalaku. Kusadil kwetu kwa yom yitutangina mu Baibel kukat kutwishish mwiku wa Nzamb usala mu mom yetu. Chikat kututwishish ‘kwikal mu umwing utwinkishinau kud mwiku utumbila mu kwinung kwa chisambu.’ (Ef. 4:3) Ukat kutubachik kudjal rukat mulong wa antu akwau. (Kol. 3:13, 14; 1 Pi. 4:8) Ov ukat kusadish umwing kusutil ku kutongijokin pa Dizu dia Nzamb pichuku-pichuku?
4 Mudimu wetu wa kulejan ni kwikadish in kwilej ukat kutunung. Pitukata kusadil pamwing ni antu akwau mu mudimu wa Ukristu, ‘tukat kurish mu umwing mulong wa kujimbish ritiy,’ tukat kwikal ‘abombakena mu mudimu wa uyakin.’ (Fil. 1:27; 3 Yohan 8) Pitusadila mwamu, mwoj wa rukat ukata kutukasin mu umwing mu chikumangen ukat kukasikan nakash. Mulong wak kulik kumulejap muntu wasala nend pakuru chakwel uya nend mu mudimu wa chingand rubing riner?
5 Chidi chisend mud ik tukweta cha kwikal umwing wa ukadivar wa michid yawonsu pa divu nlel! (1 Pi. 5:9) Palabinap nakash, tunan twa antu amen umwing winou ku Yikumangan ya Michid “Panany Uyaj Kud Nzamb.” Komb muntu ni muntu pakach petu asadil chakwel kulet umwing winou kusutil kutang Dizu dia Nzamb pichuku-pichuku, kupwish milong yetu mu rukat, ni kulejan rusangu ruwamp “nich dizu dimwing.”—Rom 15:6.