Mutapu ik Tukutwisha Kumukwash Mwin Nkwetu Wakad Kwikal Kaman?
1 Atushalapol avud a Yehova atijadin ni antu adia arund a Atuman ni asangaredin nakash chikumangen pakwez akat kwidjidjek pakwel anch ikal atushalapol a Nzamb. Nfumwend a nambaz umwing walonda anch: “Chitongijok cha kuya ku chikumbu ni chikumbu chadinga chikangesh chijim kud am.” Amwing akwet chaku chakad kwambatan nich mifund chisotinau kupandikan, pamwing ap akutwish kwiyov anch kakutwishap kulam program wa uteokras ukwetau in kwol kwau. Ov mutapu ik tukutwisha kuyikwash?
2 Mekesh Kusanger Kwey: Kumekesh kuyisanger kwey antu akwau ni kushinshikin milong yau kukutwish kuyifungwil njil chakwel kwakul ku uyakin wa Baibel. (Flp. 2:4) Antu adinga akad kwikal nich ritiy ra in kwol kwau akat yisu yivud kulondinang kuyisanger kwa rukat kwayimekeshinau atuman akwau. Ngatan wajimbulangau kwisambishil warumburila anch: “José mukurump umwing wa chikumangen, wa mekeshina kusanger kwend kwa pakampwil.” “Nitongin anch chidi mulong wa dikasikesh diend nashikena ku kwilej chakin kamu.” Ngatan mukwau niyend wavurika anch akadivar adinga ni kumwendil asala usu chakwel kwisambin piur pa milong yend. Walonda anch: “Nasambisha kuman ritiy [ra mukajam] mu mutapu windjing,” “Arund nend adinga antu in manangu nakash adinga ni kwisambin pa jinsangu kushalijan.”—1 Kor. 9:20-23.
3 Pan Ukwash Uwamp: Mwin kwol kwey wakad kwikal Kaman ukutwish kushimok mulong wa ukwash wa rukat umukwashina. (Jinsw. 3:27; Gal. 6:10) Pa wafa motak wa ngatan umwing wakad kwitiyij, nsand umwing Kaman weza kumukwash. Ndiy walonda anch, “Chakin kamu chom chinech chanshimosha nakash.” Mukadivar mukwau wasutisha dichuku diakabuj mulong wa kumukwash nfumwend a nambaz umwing kutung rupangu kwol kwend. Pasadilau ni kwambamb pamwing, akudisha urund. Kwinyim kwa mbing jaad, ikundj winou wa mushejina mukadivar ni kulond anch: “Chisu cham chawanyin kal cha kusal yikarumun kanang mu mwom wam. Ov ukutwish amboku kwilej ni yamam Baibel?” Waya kurutu swa-swa ni katat wikadil kal Kaman ubatishinau.
4 Pituyila kuyisot antu afanyidina mu teritwar wetu, lik tudandamenany kuyikwash akweta ambay’a uruw akad kwikal akaritiy.—1 Tim. 2:1-4.