‘Kufund Salal Mazu ma Uyakin’

Tuyukin kwikal nich mikand mu jindim jisadidinau nakash mu teritwar wetu. Chinech chambaten nich mazu ma uprofet malejena anch “antu dikum a michid ya jindim jawonsu” akez kubombakan ni atushal a in Kristu azizidilau many mu kumusadil Yehova. (Zak. 8:​23, NW) Mwishin mwa umutakel wa Chisak Chitakedina, biro wa Mutiy wetu usadin chisu chivud, usu ni nfalang mulong wa kutwinkish ‘yakudia ya muspiritu pa chisu chifanyidina.’

Ap anch jindim jinej jivud akat kujisadin mu minsamb ya pichuku-pichuku, kudi kusu jikemp jifundinau mu mikand. Mud chibudikin, mutapu wa kujifund wijikenap nawamp ni mazu makutwish kushalijan kulondulijan ni ndond. Chawiy lel, chikasiken kubudish mikand mu jindim jetu ja chivadik. Pakwez, Chisak Chitakedina chitwinkishin yom ya mudimu ya usey nakash yitukwashina kubudish mikand ya ufun.

Yisu yimwing, yilim yikutwish yamekan rikalap nchik rusot retu ra kukarumun ‘mazu masangareshina ni kufund salal mazu ma uyakin.’ (Mul. 12:10) Anch ntwarubil usotin kulet yitongijok yend piur pa dizu kanang ap yimenay mud chilim, ukutwish kufund ku biro wa Mutiy. Pakwez, kurutu kwa kufund, uwapidil kushinshik anch chitongijok chikwetay chidi cha kashinsh ni chidi salal. Chikwikal bil chiwamp kwisambin dizu dinidia ni mukadivar wija nawamp rudim ap ni kalam wa munyimuku pezinay ni kwendil chikumangen. Chipandiken kuwap kusal mwamu pa ndond pa kwisambin dizu dined ni chid cha dijuku dia Betel.

Kukarumun kwa mikand yetu mu jindim kushalijan ja chivadik kwita kutomb mazu ma uteokras. Mazu minam akat kumasadil mu mikand mud Tour de Garde ap Mudimu Wetu wa Want ching kupwa kwa kumatongijokin ni kumashinshikin nakash. Chakwel kukasikesh umwing pakach pa antu a Nzamb, tuyitin yikumangen yawonsu, nakash kamu amakurump kusadin mazu minam ni kulik kusambish kusadin mazu mindjing pa ndond pa minam. Shinshikinany amboku anch mazu usadidinany mambaten nich mazu ma uteokras madia mu mikand yetu.