Tutakelany Malejan ma Bibil Mayila Kurutu Chikunku 6: Chisu Chipwilay Mwin Kwilej Chipul
1 Anch kamu dilejan dia Bibil diashakam nawamp, chipandikening kuwap kushinshikin mafundish ma Bibil mu mutapu umalondulijadina nawamp pa ndond pa kumatik mutu wa mulong ni kuya ku mutu wa mulong ukwau. Chinech chikat kumukwash mwin kwilej kutung mufulandal wa ronganyin rakin ni kuya kurutu muspiritu. (Kol. 1:9, 10) Pakwez, yisu yivud, in kwilej akat kwipulang yipul piur pa mitu ya milong kushalijan pa chisu cha dilejan. Ov ukusal nchik chakwel kwakul ku yipul yiney?
2 Ikal Mwin Kujingunin: Ukutwish kwakul kapamp kamwing ku yipul yambatena nich dilejan ushinshikidinany. Anch chipul achisambidin kurutu mu mukand wilejinanya, chiwapidil kusu kumulejach. Pakwez, anch chipul chambatenap nich yiwilejinanya ap anch chikwit kukimbijol chakwel kupan chakul chiwamp, chiwapidil kushinshikin mulong kupwa kwa dilejan ap pa chisu chikwau. In kulejan amwing amening anch kufund chipul kumukasikeshining mwin kwilej kuman anch chipul chend chidi cha usey ni chikwashining kwipuk kudiokal mu yom yilejinau.
3 Mafundish mavud ma mu Bibil amashinshikidin kusu mu wiswimp mu mikand yitukata kusadil mulong wa kwilej nich. Tukusal nchik anch chimukasikedin mwin kwilej kwitiy mafundish kanang ap anch uchilamatin kamu nakash ku yitiyij ya makasu? Chikutwish kwikal cha ukwash kushinshikin malejan makwau misambidina mutapu ukurukina yilondila Bibil piur pa mafundish minima. Anch mwin kwilej kitiyijinap, utula mutu wa mulong winau pansh chakwel kuwisambin chisu chikwau ni dandamenany nich dilejan diend dia machuku mawonsu. (Yohan 16:12) Chiyilay ni kwak ronganyin ruvud ra Bibil ni kuya kurutu muspiritu, ukutwish kutesh mafundish minima ma Bibil.
4 Ikal Mwin Kwikepish: Anch wijap nawamp chakul ku chipul kanang, ipuk kupan chakul cha makasu ap yitongijok yey amwiney. (2 Tim. 2:15; 1 Pi. 4:11) Rumburil anch ukuya ukakimba ni kuchirik nich chakul. Ukutwish ap kusadil chisu chinech mulong wa kumufundish mwin kwilej mutapu wa kusal yikimbijol. Muleja pakemp-pakemp mutapu wa kusadil mikand kushalijan ya kukimb nich yiletina dirijek dia Yehova. Mwi njil yiney ukez kumukwash kutwish kwakul ku yipul yend amwinend.—Midimu 17:11.