Sadil Magazet mu Mudimu Wey
1, 2. La Tour de Garde ni Réveillez-vous ! yikala ni usu ik mu mwom wa antu?
1 “Masangareshining, pa chisu chifanyidina, ni makasikeshining.” “Madi magazet makasikeshina nakash minatangap kal.” Yirumburil yiney yilejen kamu nawamp mutapu ukatau kwov in kutang mu mangand mawonsu piur pa La Tour de Garde ni Réveillez-vous ! Chakin, magazet metu mameken kwikal mikand ya usey nakash mu kwisambin rusangu ruwamp nau “antu awonsu”.—1 Tim. 2:4.
2 Ikundj umwing mwin kwisak watambula gazet Réveillez-vous ! ukweta mutu wa mulong wamusangarisha nakash. Kupwa, ndiy watanga nimero mukwau wa La Tour de Garde, wadinga ni mutu wa mulong wamuswakeja kushinshikin nakash chitiyij chend cha machuku mavud mu Usatu. Chinech chakasikesha kusanger kwend. Kupwa kwa angond musamban amubatisha. Ikundj mukwau wading ni kutambul magazet chisu ni chisu pakwez kadingap kwend ni kumatang ap pakemp. Chad, mukajend ndiy, wading ni kuyichin Atuman pakwez ukat kutang magazet madingau ni kumushil nfumwend. Kushilamu kwa Bibil kwa paradis wa pa divu wizwila nau antu atentamina kwashika ku muchim wend. Mu kusut kwa chisu, ndiy, mwanend ikundj, ni mwanamakwend mband ikala atushalapol a Yehova.
3. Ukwash ik udiaku wa kupan magazet mawonsu maad?
3 Tupanany Mawonsu Maad: Mud mulejena yilikej ya kwiur oku, tukutwishap kwijik nich kashinsh anany akutanga magazet metu ap yom ik yikutwisha kukasikesh kusanger kwau. (Mul. 11:6) Chawiy lel, chidi cha ukwash kupan La Tour de Garde ni Réveillez-vous ! mawonsu maad pamwing, ap anch tukukasikeshin nakash pa gazet umwing kusu mu minsamb yetu. Mu yisu kanang, chikutwish kwikal chiwamp kupan manimero kushalijan ma magazet metu pa kuchirikin kumwing.
4. Ov mutapu ik tukutwisha kusal program wa mudimu wa magazet?
4 Chidi cha ukwash kusal program wa dichuku rubing ni rubing wa kuya mu mudimu wa kwangan magazet. Pa Calendrier des Témoins de Jéhovah 2005, Diampos din diawonsu aditondin mud “Dichuku dia Magazet.” Pa chinech, ap anch mikadil ya ndond ni ya muntu ipend yishalijadin, amwing akutwish kutond dichuku dikwau dia kutongin nakash pa kupan kwa majurnal metu. Ov kupan magazet chidi chikunku cha program wey wa rubing?
5. Yisu ik ya kupan magazet tufanyidina kubabel, ni yom ik yikutwisha kutukwash kusal mwamu?
5 Itekina Rutong Rey Amwiney: Kwitekin rutong ra pakampwil ra kupan magazet pa ngond kukutwish kutukwash kupan nakash magazet. Ov ukweting njil ya kupanin magazet? Ov ukat kupan magazet kud antu ukata kusankan mu mudimu? Ov ukat kupan magazet mu mudimu wa mu mukombil, mu teritwar wa winsak, ni mu jindond ja antu awonsu? Ov ukat kusend magazet chisu uyila mu weny, mu kwisak, ni piuyila ni kutal antu wakanijadina nau? Sadil nawamp chisu chin chawonsu chifanyidina chakwel kuyikwash antu akwau kutaninamu kusutil ku La Tour de Garde ni Réveillez-vous !
6. Ov mutapu ik tukutwisha kusadil nawamp manimero makur ma magazet?
6 Tuwapidil kand kwitekin rutong ra kupan manimero makur mitukweta. Ap anch magazet kamapaninap mwi ngond umwing ap aad a machuku ma ngond ma nimero, pakwez rusangu rulamin usey war. Mapana mu makas ma antu amasangeridina. Kud tutikit twa antu, magazet La Tour de Garde ni Réveillez-vous ! mikel kal ‘dizu . . . pa chisu chifanyidina.’ (Jinsw. 25:11) Tumasadilany amboku mulong wa kukwash tutikit twa antu kumwijik ni kumusadil Yehova.