Kukasikeshin Nakash pa Bibil!

1. Pa kusambish, apalangesha La Tour de Garde mulong wa anany, ni L’Âge d’Or mulong wa anany?

Nimero wa kusambish wa gazet L’Âge d’Or amupalangesha pa Mwinkind 1, 1919. Wamekana kwikal chom cha mudimu cha usey nakash mu mudimu wa kulejan. Mulong wak? Amutenchika pakampwil mulong wa antu akad kwikal Atuman. Kichadingap mwamu nich La Tour de Garde, wamekana mivu yivud cha kusambish mud gazet wa “kachisak kakemp ka amikoku.” (Luka 12:32) In kulejan a Want azanguroka nakash mulong wa mukand winou usu mu chilik cha kwel anch mu mivu yivud angana makopi mavud ma L’Âge d’Or kupandikanamu La Tour de Garde.

2. Nlel unou dijin dia L’Âge d’Or didi dijin ik, ni risu rutong rend kudiosh kwinsambishil?

² Gazet L’Âge d’Or amupalangesha chakwel kuyilej antu anch dipwishil dia kashinsh dia milong ya antu udi Winyikel wa Mivu Kanan wa Kristu, ukeza kutwal kamu chakin antu ku chirung cha musangar ujim. Mu makum ma mivu yalondula yitenchik yivud yasadika ku L’Âge d’Or chakwel kumwambatanish nich maswir ma pa yisu. Mu muvu wa 1937 dijin diend adiswimpa dikal Consolation. Mu muvu wa 1946 wikala Réveillez-vous !, dijin twija djat ni nlel unou.

3. Réveillez-vous ! wikala chom cha mudimu cha usu nakash mu kuwanyish kwa uprofet ik?

³ Kudiosh kwinsambishil kwend, gazet winou wakwashin kal nakash ku uman ujim wapanau kudiosh mu muvu wa 1919. (Mat. 24:14) Pakwez, mulong wa kuswapej kwa yisu yetu, chimeken kwikal cha manangu kusal yitenchikiril yikwau ku Réveillez-vous !

4. (a) Chom ik chiswiridinay muntu kusal anch usotil anch eza amupandisha pa “dichuku dia ujim wa Yehova”? (b) Kukwatijan ni Kujingunik 14:​6, 7, chom ik chilondilay kusal ‘mwangel utwikina pakach pa diur’ kud antu awonsu?

⁴ Tutikit twa antu akat kusangar kutang Réveillez-vous ! mulong ukat kwisambinang mitu ya milong kushalijan yakad kwikal ya chirelijon mu mutapu usangareshina. Pakad kwidjidjek antu avud akata kukumangan ku Chivurikish pa muvu ni muvu adi in kutang chisu chawonsu Réveillez-vous ! Djat ni nlel unou, anch muntu uchingejin kwez kupand pa “dichuku dia ujim wa Yehova,” uswiridin ukwash chakwel kusal yivud pa ndond pa kwikal kwau mwin kutang wa chisu ni chisu wa mikand yetu.​—⁠Sof. 2:​3, NW; Kuj. 14:​6, 7.

5. (a) Kusambish nich Réveillez-vous ! wa Chiwong 2006, yom ik yikezau kukasikeshin nakash? (b) Antu avud akez kutwish kwikal abachikinau kusal ik, ni mu kuwanyin kwa uprofet ik?

⁵ Pa chinech, kusambish pa Chiwong 2006, Réveillez-vous ! ukez kukasikeshin nakash pa Want wa Nzamb. Ukez kuyikasikesh in kutang kwasin nakash nich kashinsh pa Bibil mulong wa kuman mutapu wa kupwish milong yau ni ukez kukasikeshin nakash pa yirumburil ya Bibil piur pa yinship ya katat. Mu mutapu winou, in kutang akez kwikal nich chovu chiwamp nakash cha kurumburik kwa yinship ya katat ni kwikal kand abachikinau kusutil ku yikutangau kwilej yivud piur pa Yehova​—⁠Zak. 8:23.

6, 7. (a) Mutapu ik ukezau kumutenchik Réveillez-vous ! chakwel ayikwasha antu avud kusadil 1 Tesalonik 2:13? (b) Tupamp twinch tukezau kumupalangesh Réveillez-vous ! ni jindim jinch jikeza kukwachik ku kuswimp kwinoku?

⁶ Réveillez-vous ! ukez kudandamen kwisambin pa mitu ya milong kushalijan yisangareshina. Pakwez, akukasikeshin nakash pa Bibil. (1 Tes. 2:13) Mulong La Tour de Garde ukwet rusangu rukurikina ra Bibil chad Réveillez-vous ! ukez kwisambin jinsangu jivud nakash jengamidina pa Bibil, chikezap kwikal cha usey kudandamen kubudish Réveillez-vous ! tupamp twaad pa ngond. Chawiy lel, kusambish nich nimero wa Chiwong 2006, Réveillez-vous ! akez kumupalangesh mud gazet wa kapamp kamwing pa ngond. Chom chinech chikez kukwash mu kupipesh kujimb mu kurijek, kukarumun, ni kutum kwa mikand yetu.

⁷ Kuswimp kwinoku kukez kukwat piswimp jindim 40 pa chitot mukatau kupalangeshin Réveillez-vous ! Mu jindim jivud, Réveillez-vous ! akat kumupalangesh kapamp kamwing pa ngond ap tupamp tunying pa muvu. Kukezap kwikal kuswimp mu kupalangesh kwa La Tour de Garde.

8. Ov mutapu ik ukutwishau in kulejan kusadil Réveillez-vous ! pamwing ni La Tour de Garde?

⁸ In kulejan akutwish kupan Réveillez-vous ! pa ngond ni ngond nich manimero ma La Tour de Garde ukupalangeshau tupamp twaad pa ngond winiwa. Antu akupana Réveillez-vous ! akutwish kusadil nimero ndiy umwing ngond mwawonsu pakad kuswimp mazu mau ma kusambish nich minsamb pakach pa ngond, mud muchidia katat.

9. Réveillez-vous ! ukudandamen kusadil mwaz ik?

⁹ Kudiosh kamu ku nimero wend wa kusambish wa mu muvu wa 1919, gazet wijikana mu dijin dia L’Âge d’Or, Consolation, ni katat unou anch Réveillez-vous ! wasadidil kal mwaz ujim nakash mu mujikit wa kulejan. Tukat kulembil anch Yehova ukez kudandamen kuyukish kwangan kwa gazet mu mulad wend usu wakarumwinau ni anch ukez kuyikwash antu avud nakash a “michid yawonsu ni majuku mawonsu, antu a mangand mawonsu ni jindim jawonsu” kukarumukin ku Want wa Nzamb mud ruchingej rau rumwing.​—⁠Kuj. 7:⁠9.