Dichuku dia Yehova Didi Piswimp
1 In Kristu aswiridin kamu nakash kwez kwa dichuku dia Yehova, dichuku dikezay kashesh ditenchik dia yom dia katat ni kutwal mwi ngand yisu ya kutentam. (2 Pi. 3:12, 13, note) Mulong twijap kwetu nawamp chisu chikushika dichuku dinidia, tufanyidin kudandamen kulam kubabal kwetu ni kuyikwash akwetu kusal mwamu. (Ezek. 33:7-9; Mat. 24:42-44) Kutongijokin pa Dizu dia uprofet dia Nzamb kukez kukasikesh ruchingej retu anch “dichuku dijim dia [Yehova, NW] didi piswimp.”
2 Kuswinkanijan kwa Mant Majim ma Mangand: Mud mutapu mulejenau ku Kujingunik 17:9-11, mupostol Yohan ujimbwil “ant sambwad,” afanakeshina kuswinkanijan kwa mant majim sambwand ma mangand. Yohan uchirikidin kand ku ‘mwant wa chinan,’ ufanakeshina katat Uumwing wa Michid. Ov, tuchingejin kumekan kwa mant makwau majim ma mangand? Bwat, uprofet ulondil anch mwant winou wa chinan ‘uyil ku kujiy’ kupwa kwendendiy kwikil kand ant akwau a mangand ajimbwilau. Ov, uprofet winou ukukwashin kuman pisu tudia mu kulep kwa chisu?
3 Daniel 2:31-45 utukwashin kwov kurumburik kwa kwez kwa dichuku dia Yehova. Mu uprofet winou, chirumbidij chijim chamanay Nebukadinezar mu chilat chifanakeshin kuswinkanijan kwa mant majim ma mangand. Umwing ni umwing wa mant majim minam wameken kal. Ov, nlel unou tudi mu chirung cha rusangu ra kuyikel kwa want ik ujim? Mu chirung chifanakeshina yilaz ya chirumbidij. Uprofet urumburil kamu patok yikushikenaku kupwa kwa chinech. Want wa ukauntu ukujiy kamu shutit, ni kusha ndond mulong wa “want ukwau wakad kwez kwikal nich disudiel chikupu.” Ov, ukutwish kuman mutapu ik chom chinech chilejena anch dichuku dia Yehova didi piswimp?
4 Uman Ukwau: Twimedinap ni mes metu uman ukwau anch dichuku dia Yehova didi piswimp. Tumen kuwanyin kwa yom yasambelay kulond mupostol Paul yitadila yijingidij ya antu “mu machuku ma kwisudiel.” (2 Tim. 3:1-5) Ni twipanin mu kulejan uman ufanyidina kupan pa mangand mawonsu kurutu disudiel dieza. (Mat. 24:14) Elany lel amboku mudimu wetu wa patok udandamen kumekesh kuswapej kwa rubil ra mwangel anch: “Mwovany Nzamb wom, umwinkany uyaj; mulong muten wa kwimikish kwend wez kal.”—Kuj. 14:6, 7.